Baćka Safii Sapiehi zapisaŭ videazvarot da Łukašenki, u jakim prosić taho pamiłavać dačku
Baćka zatrymanaj u Minsku 23 maja razam z Ramanam Pratasievičam Safii Sapiehi źviarnuŭsia da Alaksandra Łukašenki z prośbaj ab asabistaj sustrečy i miłasernaści da jahonaj dački.
Videazvarot 53-hadovaha Andreja Sapiehi raspaŭsiudziŭ u Youtube dalokaŭschodniaje vydańnie PrimaMedia. Sam jon žyvie va Uładzivastoku.
«Maja dačka ŭ ciapierašni momant utrymlivajecca ŭ minskim SIZA biełaruskaha KDB, pa abvinavačvańni ŭ ździajśnieńni šerahu złačynstvaŭ. Joj pahražajuć vielmi surjoznyja turemnyja terminy. U hetym zvarocie napiaredadni vizitu Łukašenki ŭ Prymorski kraj, ja b chacieŭ źviarnucca da asabista da jaho, jak baćka da baćki», — skazaŭ Sapieha.
«Alaksandr Ryhoravič, ja prašu vas ab miłasernaści. Chopić žorstkaści, u apošni čas śviet joju pierapoŭnieny. Luby razvažny čałaviek razumieje, što Safija apynułasia nie ŭ tym miescy i nie z tym čałaviekam. Da sustrečy z Ramanam Pratasievičam jana była zvyčajnaj dziaŭčynaj.
Padčas pratestaŭ u Minsku jana była ŭ Litvie, i, kali niešta jana i rabiła ŭ toj pieryjad, kali była znajomaja z Pratasievičam, — heta dakładna historyja kachańnia, a nie pierakanańniaŭ», — skazaŭ Sapieha.
Baćka zatrymanaj rasijanki taksama paprasiŭ Łukašenku ab asabistaj sustrečy.
«Alaksandr Ryhoravič, jak baćka baćku ja prašu ab asabistaj sustrečy, ja hatovy pryvieści ŭsie nieabchodnyja harantyi taho, što maja dačka bolš nie budzie ŭciahnutaja ŭ supraćpraŭnyja dziejańni. U hetym ža zvarocie ja prašu hubiernatara Prymorskaha kraja Aleha Mikałajeviča Kažamiaku sadziejničać u arhanizacyi asabistaj sustrečy z prezidentam Łukašenkam, mahčyma, mnie ŭdasca pierakanać jaho pamiłavać maju dačku, jana prosta maleńkaja dziaŭčynka, jakaja tolki pačynaje žyć», — skazaŭ jon.
