U Vieniesuele vysokaja śmiarotnaść, ale realnaja statystyka pa zaražeńni karanavirusam nie razhałošvajecca
U krainie mała vakcyn i pravodzicca mała testaŭ, u toj čas jak šmat ludziej pamiraje doma, bo ŭ balnicach nie chapaje elektryčnaści i kisłarodu.
Fota The Wall Street Journal
Pa aficyjnych źviestkach vieniesuelskaha ŭrada, siaredniaja kolkaść pamierłych ad kavidu ŭ krainie nie pieravyšaje siamnaccać čałaviek za dzień, piša The Wall Street Journal.
Adnak vieniesuelskija rabotniki pachavalnych słužbaŭ śćviardžajuć, što im prychodzicca kremiravać u šeść razoŭ bolš cieł štodnia, čym zvyčajna. Heta z ulikam taho, što mašyny dla kremacyi pracujuć 16 hadzin na dzień, a pachavalnyja biuro nastolki pierapoŭnienyja, što apracoŭka cieł časta zatrymlivajecca bolš, čym na tydzień. Heta jaskravy pakazalnik realnaj śmiarotnaści, bo orhany achovy zdaroŭja Vieniesueły nastojvajuć, kab tyja, chto pamior ad reśpiratornaha zachvorvańnia, byli kremiravanyja, a nie pachavanyja.
Pravaachoŭnyja arhanizacyi i ekśpierty ŭ śfiery achovy zdaroŭja pierakananyja, što Vieniesueła značna zanižaje źviestki ab achviarach pandemii ŭ krainie. Vieniesuelski režym nieadnarazova abvinavačvali ŭ zatojvańni i manipulavańni miedycynskimi źviestkami, a taksama ŭ aryštach daktaroŭ, jakija pišuć pra realnaje stanovišča ŭ balnicach.
U krainie z 28-miljonnym nasielnictvam aficyjna zarehistravana 2500 śmierciaŭ ad kavidu. Niekatoryja ekśpierty ŭ halinie achovy zdaroŭja paviedamlajuć, što kožny dzień ad virusa pamiraje ŭ 20 razoŭ bolš hramadzian, čym śćviardžaje ŭrad. Heta značyć, što ŭ Vieniesuele nasamreč mohuć być dziasiatki tysiač śmiarotnych vypadkaŭ zaražeńnia karanavirusam z pačatku pandemii.
«Ludzi viedajuć, što kolkaść vypadkaŭ zaražeńnia pa aficyjnych ličbaŭ nie adlustroŭvaje rečaisnaści, - adznačaje Maryna Hansales, ekśpiert u halinie achovy zdaroŭja z Univiersiteta Simona Balivara ŭ Karakasie. — I jany viedajuć, što rašeńnie hetaj prablemy ŭ bližejšy čas nie pradbačycca».
Niezaležnaja hrupa «Doctors United» zajaŭlaje, što jana zadakumientavała 580 śmierciaŭ miedycynskich rabotnikaŭ ad karanavirusa, što ŭ piać razoŭ pieravyšaje ličbu, jakuju nazvaŭ režym.
U balnicach rehularna nie chapaje vady, elektryčnaści, kisłarodnych bałonaŭ i lekaŭ, tamu mnohija infikavanyja karanavirusam vieniesuelcy pamirajuć doma.
Navukoŭcy ličać, što biez vakcyn i lačeńnia kavidu ŭ krainie mohuć chutka raźvicca novyja varyjanty, što ŭjaŭlaje saboj patencyjnuju niebiaśpieku i dla inšych krain.
Ekśpierty dapuskajuć, što ŭzrovień śmiarotnaści ŭ Vieniesuele moža być nižejšy, čym u inšych krainach rehijona, bo ekanamičny kryzis u krainie izalavaŭ jaje ad turystaŭ. Da taho ž, z 2013 hoda bolšaść mižnarodnych avijakampanij spynili paloty ŭ Vieniesuełu. A vostry niedachop bienzinu pryvioŭ da taho, što ŭ krainie ciapier mienš hramadskaha transpartu i ŭsio bolš pradpryjemstvaŭ zakryvajucca. Ale navat z ulikam hetaha ŭrad značna zanižaje sapraŭdnyja ličby zachvorvalnaści.
Centralnaja ŭniviersiteckaja balnica ŭ Karakasie, samaja hałoŭnaja ŭ krainie, letaś pravodziła kala 120 testaŭ na dzień, ciapier — tolki 15, bo ŭ spravazdačy nieabchodna abhruntavać praviadzieńnie kožnaha testa, što značna zamarudžvaje praces.
