Hałoŭčanka ab sankcyjach: Suśviet nie zakančvajecca ni jeŭrapiejskim, ni paŭnočnaamierykanskim rehijonam
Biełaruski ŭrad ličyć, što zachodnija sankcyi nie ŭjaŭlajuć pahrozy ekanomicy našaj krainy. Ab hetym zajaviŭ žurnalistam premjer-ministr Raman Hałoŭčanka siońnia pa vynikach narady ŭ Alaksandra Łukašenki, pieradaje BiełTA.
Kamientujučy na prośbu žurnalistaŭ situacyju z sankcyjami ŭ adras Biełarusi, Raman Hałoŭčanka padkreśliŭ: «Tut nastolki adsutničaje łohika, što ciažka pakul prahnazavać. Dastatkova roznyja zajavy hučać z roznych bakoŭ. My spakojna sočym za hetaj situacyjaj, hatovy da roznych varyjantaŭ raźvićcia padziej i ŭpeŭnieny, što ekanomika Biełarusi nie tolki vystaić i pieraadoleje, ale i atrymaje novy zarad badzioraści, jak kažuć, kab bolš aktyŭna pracavać na inšych rynkach. Tamu što suśviet nie zakančvajecca ni jeŭrapiejskim rehijonam, ni paŭnočnaamierykanskim. Pierad nami vializnaja Azija, vializny Uschod. U pryncypie, ciapier nie tak šmat unikalnych tavaraŭ abo technałohij, jakimi vałodaje tolki adna abo niekalki krain na adnym kantyniencie».
Urad zrabiŭ adpaviednyja padliki, dałažyŭ kiraŭniku dziaržavy situacyju.
Pavodle słoŭ Ramana Hałoŭčanki, ciapier biełaruskaja ekanomika pracuje absalutna ŭstojliva. Pa vynikach piaci miesiacaŭ jana demanstruje ŭstojlivy rost, dynamičnaje raźvićcio, asabliva pa eksparcie. Za nazvany pieryjad pakazčyki ekspartu pierasiahnuli ŭžo ŭzrovień minułaha hoda na 35 pracentaŭ. Pry hetym upeŭniena raście vytvorčaść pradukcyi mašynabudaŭničaj haliny, naftachimičny siektar taksama pakazvaje vysoki vynik raboty.
«My hatovy da lubych varyjantaŭ raźvićcia padziej, ale nijakaj katastrofy nie pradbačym. Usio ŭ štatnym režymie», — reziumavaŭ kiraŭnik urada.
