Hałoŭnaha redaktara Intex-press za intervju ź Cichanoŭskaj aštrafavali na 580 rubloŭ
26 krasavika ŭ Baranavičach sud razhledzieŭ administracyjnuju spravu ŭ dačynieńni da hałoŭnaha redaktara Intex-press Uładzimira Janukieviča za «parušeńnie zakanadaŭstva ab ŚMI». Padstavaj dla razboru stała apublikavanaje na sajcie 14 krasavika intervju sa Śviatłanaj Cichanoŭskaj, piša Tut.by.
Uładzimir Janukievič. Fota Stanisłava Koršunava
Uładzimira Janukieviča vyklikali ŭ sud jak uładalnika sajta Intex-press, na jakim była raźmieščana elektronnaja viersija materyjału.
Jaho abvinavačvali ŭ parušeńni zakanadaŭstva ab ŚMI — č. 5 art 23.5 KaAP (Raspaŭsiud uładalnikam internet-resursu, nie zarehistravanaha ŭ jakaści sietkavaha vydańnia, infarmacyi, raspaŭsiudžvańnie jakoj zabaroniena na internet-resursach u adpaviednaści z zakanadaŭčymi aktami).
Jamu dali maksimalna mahčymaje dla fizasoby pakarańnie — 20 bazavych (580 rubloŭ).
Milicyja taksama pačała administracyjny praces u dačynieńni da jurydyčnaj asoby «Vydaviecki dom «Inteks-Pres» za drukavanuju viersiju intervju ź Cichanoŭskaj. Na hety raz pa č. 4 art. 23.5 (Raspaŭsiud ŚMI infarmacyi, raspaŭsiud jakoj zabaronieny). Tut pahražaje da 200 bazavych (5800 rubloŭ) štrafu dla jurydyčnyaj asoby. Hety materyjał budzie razhladać Ekanamičny sud Bresckaj vobłaści. Data pasiadžeńnia pakul nie pryznačanaja.
Akramia taho, u milicyi paviedamili, što pa fakcie publikacyi pravodzicca pravierka pa art. 361 KK RB (Zakliki da dziejańniaŭ, nakiravanych na pryčynieńnie škody nacyjanalnaj biaśpiecy).
