Spačatku samit pa klimacie, potym — pieramovy z Łukašenkam: Piaskoŭ raskazaŭ pra paradak dnia Pucina
Pres-sakratar prezidenta Rasii Dźmitryj Piaskoŭ raspavioŭ žurnalistam pra paradak udziełu Pucina ŭ samicie pa pytańniach klimatu, a taksama ab pieramovach z Alaksandram Łukašenkam, jakija «piarojduć u poźni viečar», piša TASS.
Fota Kanstancina Zaŭražyna, RH
Pavodle Piaskova, Pucin spačatku voźmie ŭdzieł u anłajn-samicie pa klimacie, jaki startuje ŭ 15:00.
«Klimat — heta adzin z pryjarytetaŭ, jaki byŭ ahučany ŭčora na pasłańni. Tema važnaja, i prezidentu jość, što skazać. Praŭda, vystupleńni buduć dastatkova dynamičnyja — pa try chviliny praduhledžvajecca rehłamientam», — skazaŭ Piaskoŭ.
Akramia taho, pa słovach pres-sakratara, u kiraŭnika rasijskaj dziaržavy zapłanavana na pieršuju pałovu dnia mižnarodnaja telefonnaja razmova, ab jakim Kreml paźniej prainfarmuje ŚMI.
Kala 17:00 Pucin pačnie pieramovy z Alaksandram Łukašenkam, jaki prybyŭ u Maskvu. «Razmova dvuch prezidentaŭ, jak praviła, dastatkova praciahłaja. Vidavočna, što jana piarojdzie ŭ poźni viečar», — reziumavaŭ pres-sakratar.
«Viadoma, [adbudziecca] abmien dumkami pa ciapierašniaj situacyi ŭ płanie i apošnich padziej z raskryćciom dyviersijnych płanaŭ u dačynieńni da Biełarusi i hetak dalej», — skazaŭ pradstaŭnik Kramla.
Adkazvajučy na pytańnie, jaki vynik pieramovaŭ Maskva budzie ličyć pośpiecham, Piaskoŭ nahadaŭ, što prezidenty RF i Biełarusi časta kantaktujuć, a pamiž dźviuma krainami naładžanyja «šmathrannyja adnosiny». «My nastolki ŭzajemazaležnyja krainy, i nastolki abjomnyja zadačy stajać i ŭ ramkach Sajuznaj dziaržavy, i ŭ ramkach asablivych handlova-ekanamičnych adnosin, intehracyi mnohich pradpryjemstvaŭ», — zajaviŭ Piaskoŭ.
Jon adznačyŭ, što Pucin i Łukašenka ŭ tym liku «pastajanna abmiarkoŭvajuć biahučyja pytańni».
«I kožny raz pytańniaŭ mienš nie stanovicca», — dadaŭ pres-sakratar rasijskaha lidara.
U adkaz na pytańnie, ci ličać u Kramli Łukašenku nadziejnym partnioram, Piaskoŭ tolki nahadaŭ, što toj uznačalvaje Biełaruś, ź jakoj u Rasii ŭtvorana Sajuznaja dziaržava.
Taksama Piaskoŭ dadaŭ, što situacyja z zamacham nie paŭpłyvaje na intehracyju dźviuch krain.
