Futbalisty zbornaj Iranu dałučylisia da pratestaŭ
17 červienia iranskim internaŭtam znoŭ udałosia prarvać fajervoł i danieści da śvietu kadry z padziejaŭ u Tehieranie.
Častka futbalistaŭ zbornaj Iranu pa futbole nadzieli zialonyja napulśniki i nižnija majki na matč sa zbornaj Paŭdniovaj Karei. Takim čynam jany vykazvajuć salidarnaść z pratestoŭcami, što damahajucca źmianieńnia režymu ŭ krainie.
Za 16 červienia nie źjaviłasia nivodnaha fota i videa ź Iranu - tolki aficyjnyja, ź mitynhu padtrymki Achmadzinedžada. Zamiežnym žurnalistam pad karaj zabaroniena pracavać za miežami hatelnych pakojaŭ i ofisaŭ. U krainie zabłakavanyja Huhł Tok i Jahu, hłušycca mabilnaja suviaź i adklučany servis sms-paviedamleńniaŭ. Pierabitaja i praca błohaŭ, jakim było ŭdałosia prarvać błakadu ŭ paniadziełak i vystavić fatazdymki z šmatsottysyčnaha šeścia prychilnikaŭ pieramienaŭ u Tehieranie.
Adnak 17 červienia iranskim internaŭtam znoŭ udałosia prarvać fajervoł i danieści da śvietu kadry z padziejaŭ u Tehieranie. Videazapisy źjavilisia ŭ Tvitery.
U sutyčkach manifiestantaŭ z basidžami - anałah našaha SACHRu - u paniadziełak zahinuli prynamsi 8 čałaviek. Heta zdaryłasia, kali moładź atakavała rajadździeł hetaj siłavoj struktury, a śpiecnazaŭcy adkryli z vakon pa ich ahoń. Źviestki pra śmierć jašče piaci studentaŭ u časie načnoha šturmu univiersiteckaha miastečka pakul nie paćvierdžanyja haradskimi ŭładami.
Ułady nazyvajuć padziei biesparadkami i zajaŭlajuć, što za imi stajać ZŠA i Kanada. Zavadataram pahražajuć śmiarotnym pakarańniem. Aryštavana nie mienš za 150 čałaviek, u tym liku były vice-prezident krainy, brat eks-prezidenta Chatami, redaktar haziety biznes-kołaŭ, a taksama vidny juryst z pravaabarončaha centru, zasnavanaha łaŭreatkaj Nobieleŭskaj premii miru Šyryn Ebadzi.
Musavi zaklikaŭ hramadzianaŭ da praciahu mirnych demanstracyj i malitvaŭ u miačetach.
U błahaśfiery i Tvitery množacca fłeš-moby salidarnaści ź iranskim rucham za svabodu. Błohiery mianiajuć avatary na zialonyja, a čas - na iranski. U sieradu karystalniki Tviteru vyjavili taksama, što na raspaŭsiudžanym aficyjnym iranskim ahienctvam fota ź mitynhu ŭ padtrymku Achmadziniedžada z dapamohaj fatašopu była pavialičana kolkaść hałovaŭ, kab tłum zdavaŭsia huściejšym. Śmiech, dyj hodzie.
