Za hod pandemii ekanomika Irłandyi vyrasła. Miascovy ŭrad mieŭ tuz u rukavie
Bolšaść ekanomik u zamožnych krainach pieražyvała letaś zaniapad praz pandemiju, ale Irłandyja prademanstravała rost. Pryčyna — roskvit farmaceŭtyčnych i technałahičnych kampanij, jakija Irłandyja pryvablivała na praciahu mnohich hadoŭ nievialikimi padatkami. Padčas pandemii heta pieratvaryła Irłandyju ŭ jašče bolš pierśpiektyŭnaje miesca dla raźvićcia.
Fota Depositphotos.com
Šmat hadoŭ miascovy ŭrad zaachvočvaŭ transnacyjanalnyja karparacyi pracavać u hetaj maleńkaj krainie, prapanoŭvajučy im nizkija staŭki padachodnaha padatku dla pradpryjemstvaŭ.
Vialikija technałahičnyja kampanii ad Facebook Inc. da Google arhanizavali sabie ŭ Dublinie šykoŭnyja rehijanalnyja štab-kvatery, a farmaceŭtyčnyja hihanty nakštałt Pfizer Inc. pabudavali ŭ Irłandyi bujnyja zavody, paviedamlaje The Wall Street Journal.
Ciapier ź vialikich dachodaŭ ad hetych siektaraŭ dziaržava atrymlivaje padatki, jakija dazvalajuć irłandskamu ŭradu dapamahać inšym siektaram ekanomiki, mocna paškodžanym padčas pandemii. Niahledziačy na rost u ekanomicy, uzrovień biespracoŭja ŭ Irłandyi dasiahnuŭ 25%.
Pandemija spryjała rostu popytu na irłandskija leki i inšyja miedycynskija tavary, asabliva ŭ ZŠA. Dziakujučy hetamu ekspart u 2020 hodzie dasiahnuŭ rekordnych pamieraŭ. U toj ža čas vyras popyt na ličbavyja servisy nakštałt videastryminhavych resursaŭ. Tamu ŭ śniežni siektar infarmacyi i suviazi irłandskaj ekanomiki prademanstravaŭ rost na 9,7% u paraŭnańni z papiarednimi hadami.
Dziakujučy hetym faktaram Irłandyja trapiła ŭ vielmi maleńkuju hrupu krain, u jakich paśla pačatku pandemii naziraŭsia ekanamičny rost. Za 2020 hod VUP Irłandyi vyras na 3,4% — navat bolš, čym rost VUP Kitaja, jaki skłaŭ 2,3%.
Takim cudoŭnym pakazalnikam VUP paspryjali pierš za ŭsio transnacyjanalnyja kampanii. Politico.eu pryvodzić słovy Patryka Chonachana, viadomaha ekanamista i byłoha kiraŭnika Centralnaha banka Irłandyi. Chonachan ličyć, što ŭ krainie nastolki šmat vialikich transnacyjanalnych karparacyj, što, kali jany karystajucca spryjalnym padatkovym asiarodździem u Irłandyi, heta vyklikaje vielizarny rost VUP. Takim ža čynam na irłandskuju ekanomiku ŭpłyvaje i pieranos u krainu mižnarodnych štab-kvater karparacyj.
Adnak kali aceńvać ekanamičny ŭzrovień Irłandyi praz VUP, nie atrymajecca ŭličyć nadzvyčaj vysoki košt žyćcia ŭ krainie: jon na 25% vyšejšy za siarednija pakazalniki pa ES. Dla irłandcaŭ charakternaja adnosna nievysokaja pakupnickaja zdolnaść. Tamu kali acanić dabrabyt irłandcaŭ pa indeksie faktyčnaha indyvidualnaha spažyvańnia, jon dasiahnie tolki 95% ad siaredniaha pakazalnika pa ES.
