Hamialčanku sudzili ŭžo šeść razoŭ — nabiehła 90 sutak. Imaviernaja pryčyna — raspracavała łakalny ściah
Pravaabaroncy «Viasny» prainfarmavali śpiecyjalnych dakładčykaŭ AAN pa fakcie šmatrazovaha i paśladoŭnaha pryznačeńnia administracyjnaha aryštu za ŭdzieł u mirnych akcyjach pratestu žycharcy Homiela Anastasii Pieravoščykavaj.
Pieraśled dziaŭčyny pačaŭsia naprykancy studzienia 2021 hoda, i da hetaha času jaje sudzili nie mienš za šeść razoŭ, a ahulnaja kolkaść pryznačanych sutak dasiahnuła 90. Taksama pa miescy žycharstva Anastasii Pieravoščykavaj i ŭ domie jaje dziaduli byli praviedzienyja vobšuki, u vyniku jakich kanfiskavanaja ŭsia technika.
Pa słovach maci, pieraśled u dačynieńni da jaje dački pačaŭsia praz toje, što jana raspracavała makiet ściaha Navabielickaha rajona Homiela. Taksama dziaŭčynu vinavaciać va ŭdziele nie mienš čym u 10 mirnych akcyjach pratestu.
Z hetaj nahody pravaabaroncy «Viasny» źviarnulisia da Śpiecyjalnaha dakładčyka pa pytańni ab stanoviščy ŭ halinie pravoŭ čałavieka ŭ Biełarusi Anais Maren, Śpiecyjalnaha dakładčyka pa pytańni ab pravie na svabodu mirnych schodaŭ i asacyjacyj Klemana Ńjaletsosi Vula i Śpiecyjalnaha dakładčyka pa pytańni ab zaachvočvańni i abaronie prava na svabodu mierkavańniaŭ i ich svabodnaje vykazvańnie Iren Chan.
«Z 8 lutaha i da siońnia Anastasija Pieravoščykava znachodzicca ŭ źniavoleńni za realizacyju svaich pravoŭ na mirny schod i vykazvańnie mierkavańnia», — adznačajecca ŭ paviedamleńni.
Pravaabroncy padkreślivajuć, što takoha kštałtu praktyka prymianieńnia normaŭ KaAP źjaŭlajecca zahannaj, maje palityčna matyvavany charaktar, užyvajecca z metaj akazańnia cisku na Anastasiju Pieravoščykavu.