Pierad prysudam źnik taksist, jakoha paśla vybaraŭ mocna pabiŭ AMAP
Sud Kastryčnickaha rajona Hrodna 3 sakavika pavinien byŭ vynieści prysud pa kryminalnaj spravie miascovaha taksista Alaksieja Łapy. Mužčynu abvinavačvajuć pavodle art. 364 KK (Hvałt albo pahroza hvałtu ŭ dačynieńni da supracoŭnika orhanaŭ unutranych spraŭ). Ale ŭsio pajšło nie tak, paviedamlajuć pravaabaroncy.
Heta adzin z samych praciahłych sudoŭ pa kryminalnaj spravie pa artykule 364 KK za apošni čas, sud raspačaŭsia jašče 5 listapada i doŭžycca amal čatyry miesiacy.
U jakaści paciarpiełych vystupajuć dva supracoŭniki AMAPa — Arciom Łohiš i Pavieł Konan.
Spravu razhladaje sudździa Dźmitryj Kiedal. Dziaržabvinavaŭca — prakuror Hieorhij Smolski.
Pa viersii abvinavačvańnia, Alaksiej 11 žniŭnia z metaj pieraškodzić dziejnaści supracoŭnikaŭ milicyi ŭžyŭ hvałt nad imi, to-bok najechaŭ na ich na mašynie. Pry hetym tolki ŭ Konana byli siniaki i ranki: siniaki na łokci i kalenie, drapina na iłbie, jakija vyklikali karotkačasovuju stratu zdaroŭja. Nahadajem, 11 žniŭnia kala płoščy Dziekabrystaŭ mašynu Alaksieja spynili supracoŭniki AMAPa i žorstka zatrymali ŭsiu kampaniju. Taksi siłaviki raźbili, ludziej, jakija znachodziacca ŭnutry, vyciahnuli na darohu i źbili.
Alaksiej Łapa atrymaŭ množnyja cialesnyja paškodžańni paśla zatrymańnia.
Tak Alaksiej vyhladaŭ paśla źbićcia. Spring96.org
Prakuror Smolski prasiŭ pryznać Łapu vinavatym i pryznačyć jamu 3 hady pazbaŭleńnia voli va ŭmovach ahulnaha režymu i ŭziać pad vartu ŭ zale suda.
Čytajcie padrabiaznaści:
Prakuror patrabuje dla hrodzienskaha taksista Łapy, jakoha mocna źbili pry zatrymańni, try hady kałonii
3 sakavika Alaksiej Łapa ŭ sud nie źjaviŭsia ź nieviadomych pryčyn, miescaznachodžańnie jaho nieviadomaje. Na telefanavańni nie adkazvaje. Prakuror kaža: abvinavačvany nie źjaviŭsia, abjavić jaho u vyšuk i źmianić mieru strymańnia. Sudździa zrabiŭ pierapynak i syšoŭ u daradčy pakoj.
Sudździa pastanaviŭ: zhodna z padpiskaj ab niavyjeździe Łapa pavinien źjaŭlacca ŭ sud pa pieršym patrabavańni. Jon parušyŭ mieru strymańnia, abviaścić u vyšuk i zaklučyć pad vartu. Vytvorčaść pa spravie prypynić, kopiju pastanovy nakiravać prakuroru Hrodna.
