Prakuror patrabuje dla hrodzienskaha taksista Łapy, jakoha mocna źbili pry zatrymańni, try hady kałonii
U sudzie Kastryčnickaha rajona Hrodna 22 lutaha praciahnuŭsia razhlad kryminalnaj spravy miascovaha taksista Alaksieja Łapy. Mužčynu abvinavačvajuć pavodle art. 364 KK (Hvałt albo pahroza hvałtu ŭ dačynieńni da supracoŭnika orhanaŭ unutranych spraŭ), paviedamlaje spring96.org.
Heta adzin z samych praciahłych sudoŭ pa kryminalnaj spravie pa artykule 364 za apošni čas, sud raspačaŭsia jašče 5 listapada i doŭžycca try z pałovaj miesiacy.
U jakaści paciarpiełych vystupajuć dva supracoŭniki AMAPa — Arciom Łohiš i Pavieł Konan.
Spravu razhladaje sudździa Dźmitryj Kiedal. Dziaržabvinavaŭca — prakuror Hieorhij Smolski.
Pierapynak ad 24 śniežnia byŭ abumoŭleny nieabchodnaściu praviadzieńnia ekśpiertyzy videazapisu incydentu.
Pa viersii abvinavačvańnia, Alaksiej 11 žniŭnia «z metaj pieraškodzić dziejnaści supracoŭnikaŭ milicyi ŭžyŭ hvałt nad imi, to bok najechaŭ na ich na mašynie». Pry hetym tolki ŭ Konana byli siniaki i rany: siniaki na łokci i kalenie, drapina na iłbie, jakija vyklikali karotkačasovuju stratu zdaroŭja.
Tak Alaksiej vyhladaŭ paśla źbićcia. Spring96.org
11 žniŭnia kala płoščy Dziekabrystaŭ mašynu Alaksieja spynili supracoŭniki AMAPa i žorstka zatrymali ŭsiu kampaniju. Taksi siłaviki raźbili, ludziej, jakija znachodziacca ŭnutry, vyciahnuli na darohu i źbili.
Prakuror pierakanany, što «pa art. 364 KK RB fakt prymianieńnia siły z metaj pieraškodzić zakonnaj dziejnaści supracoŭnikaŭ AMAPa znajšło paćviardžeńnie ŭ poŭnym abjomie. Udziełu ŭ niesankcyjanavanym masavym mierapryjemstvie nie prymaŭ. A b-č-b ściah nie jahony, a pakinuty ŭ sałonie pasažyram.
Vina Łapy paćviardžajecca taksama pakazańniami paciarpiełych, śviedak, materyjałami spravy. Pakazańni śviedak supracoŭnikaŭ AMAPa paćviardžajuć pakazańni paciarpiełych.
U suviazi z vykładzienym, pakazańniami paciarpiełych i śviedak, fakt atrymańnia cialesnaha paškodžańnia paćviardžajecca zaklučeńniem sudmiedekśpiertyzy».
Prakuror Smolski zapatrabavaŭ pryznać Łapu vinavatym i pryznačyć jamu 3 hady kałonii va ŭmovach ahulnaha režymu i ŭziać pad vartu ŭ zale suda. Taksama spahnać ź jaho pracesualnyja vydatki ŭ pamiery 164 rubli, a ściah źniščyć.
