U Minpadatkaŭ prakamientavali viartańni z Wildberries, jakija adlustroŭvajucca ŭ dekłaracyi jak dachod z-za miažy
Niadaŭna biełarusy vyjavili, što viartańni za tavar na Wildberries u padatkovaj dekłaracyi adlustroŭvajucca jak dachod z-za miažy. Źviazana heta z tym, što Wildberries u Biełarusi ciapier pracuje jak rasijskaja internet-krama. Situacyju prakamientavali ŭ Ministerstvie pa padatkach i zborach: zvaroty ułasnych srodkaŭ prybytkam nie ličacca, płacić padatki nie treba, adnak u budučyni padatkovyja orhany mohuć paprasić prakamientavać hetyja pastupleńni. Pra heta raspavioŭ načalnik Hałoŭnaha ŭpraŭleńnia padatkaabkładańnia fizičnych asob Ministerstva Andrej Kavaleŭski, piša Tut.by.
Fota Voli Aficeravaj
Andrej Kavaleŭski padkreślivaje, što asnoŭny pasył hučyć tak: viartańnie ŭłasnych srodkaŭ nie źjaŭlajecca prybytkam i nie padlahaje padatkaabkładańniu.
— Pavodle zakanadaŭstva, biełaruskija banki, adździaleńni paštovaj suviazi pradstaŭlajuć u padatkovyja orhany źviestki ab usich hrašovych pieravodach, jakija pastupili z-za miažy. Heta mohuć być i zarobak, i padarunki, i pazyki, i dyvidendy, i vyjhryšy, i ŭ tym liku viartańnie ŭłasnych srodkaŭ z roznych handlovych placovak. Heta Wildberries, AliExpress, heta navat viartańnie ad Uber — raspaviadaje Andrej Kavaleŭski. — Heta značyć, usia infarmacyja ab lubym zaličeńni z-za miažy pastupaje ŭ padatkovyja orhany. Ale heta nie značyć, što hetyja sumy abkładajucca padatkam.
Pa słovach ekśpierta, u zakanadaŭstvie vyrazna vyznačana, što prybytak — heta ekanamičnaja vyhada, a viartańnie ułasnych srodkaŭ za tavar, jaki nie padyšoŭ, pasyłku, jakaja nie pryjšła, pajezdku za miažu, jakaja nie adbyłasia, da dachodu nie adnosicca. Tym nie mienš, źviestki ab hetych zvarotach sapraŭdy možna ŭbačyć u aŭtamatyčna zhienieravanaj dekłaracyi ŭ asabistym kabiniecie płacielščyka.
— Ale čałaviek sam viedaje, što heta viartańnie hrošaj, tamu jon śmieła heta vydalaje z prajekta padatkovaj dekłaracyi, i da jaho nijakich pretenzij niama. Padavać dekłaracyju tolki z-za takich zvarotaŭ čałavieku nie patrabujecca. Padatkam nie abkładajecca, — udakładniaje Andrej Kavaleŭski.
Razam z tym ekśpiert źviartaje ŭvahu na toje, što padatkovyja orhany ŭ ramkach mierapryjemstvaŭ pa kantroli za vypłataj padatkaŭ mohuć paprasić dać tłumačeńni z nahody hetych pastupleńniaŭ. U takoj situacyi dastatkova budzie «prosta heta prakamientavać».
— Heta možna zrabić anłajn praz asabisty kabiniet. Kali jość mahčymaść, prymacujcie dakumienty, jakija paćviardžajuć, što pieršapačatkova adbyŭsia płaciež, — raić Andrej Kavaleŭski.
