58 krain padpisali dekłaracyju, jakaja asudžaje advolnyja aryšty zamiežnych hramadzian
U paniadziełak Kanada inicyjavała stvareńnie dekłaracyi, nakiravanuju na spynieńnie advolnych zatrymańniaŭ zamiežnych hramadzian. Hetu inicyjatyvu padtrymali ŭžo 57 krain.
Fota Depositphotos.com
Inicyjatyva ŭźnikła ŭ suviazi z aryštami zamiežnych hramadzian u Kitai, Rasii, Iranie i Paŭnočnaj Karei. Kanada nazyvaje heta «dypłamatyjaj zakładnikaŭ». Meta dekłaracyi — akazać cisk na dziaržavy, jakija zatrymlivajuć zamiežnych hramadzian, a paśla vykarystoŭvajuć ich dla dypłamatyčnaha ŭpłyvu, piša DW.
Naprykład, u 2018 hodzie dvuch kanadcaŭ zatrymali ŭ Kitai paśla taho, jak palicyja ŭ Vankuviery zatrymała finansavaha dyrektara Huawei.
Niadaŭna brytanski ŭrad ustupiŭ u sprečku ź Iranam z nahody zatrymańnia asob z dvajnym hramadzianstvam. Brytanski parłamient nazvaŭ aryšt zamiežnych hramadzian u Iranie zachopam zakładnikaŭ.
«Heta niezakonnaja i amaralnaja praktyka pahražaje hramadzianam luboj krainy i supiarečyć viaršenstvu prava», — śćviardžaje kanadski ministr zamiežnych spraŭ Mark Harno.
Dekłaracyju padpisali ZŠA, Aŭstralija, Vialikabrytanija, Japonija i amal usie krainy ES. Choć dekłaracyja i nie maje abaviazkovaj siły, jana ŭzmacniaje cisk na inšyja krainy, jakija zatrymlivajuć zamiežnikaŭ u svaich metach.
ZŠA zajavili, što praktyka advolnych zatrymańniaŭ źjaŭlajecca źniavahaj mižnarodnych dypłamatyčnych norm.
«Mnohija krainy aryštoŭvajuć zamiežnych hramadzian, kab atrymać ryčahi ŭpłyvu ŭ adnosinach pamiž dziaržavami. Heta akt parušeńnia pravoŭ čałavieka», — zajaviŭ dziaržsakratar ZŠA Entani Blinkien.
