U Mjanmie sotni tysiač ludziej vyjšli na akcyi pratestu suprać chunty
Sotni tysiač čałaviek vyjšli na vulicy Mjanmy, dzie niadziela stała dziaviatym dniom pratestaŭ suprać niadaŭniaha pieravarotu. Tym časam, novyja vajskovyja ŭłady sprabujuć strymać strajk dziaržsłužačych, jaki moža pieraškodzić im kiravać krainaj, paviedamlaje «Hołas Amieryki».
Uviečary ŭ dziełavoj stalicy krainy, Janhonie, upieršyniu ź pieravarotu 1 lutaha była zaŭvažanaja braniatechnika.
Pavodle miascovych ŚMI, u niekatorych rajonach krainy spyniŭsia ruch ciahnikoŭ, paśla taho jak piersanał admoviŭsia vyjści na pracu. Tym časam vajskoŭcy nakiravali sałdat na elektrastancyi, dzie ich sustreli razhnievanyja natoŭpy.
Kampanija hramadzianskaha niepadparadkavańnia pačałasia ŭ znak pratestu suprać pieravarotu, u vyniku jakoha byŭ zrynuty cyvilny ŭrad na čale z Aun San Su Čžy. Pieršymi da pratestu dałučylisia daktary, ale ciapier jon zakranuŭ ceły šerah uradavych viedamstvaŭ.
Chunta zahadała dziaržsłužačym viarnucca da pracy, prystrašyŭšy pryniać suprać ich miery. Vajskoŭcy pravodziać načnyja masavyja aryšty, a ŭ subotu nadzialili siabie paŭnamoctvami zatrymlivać ludziej i abšukvać pryvatnuju ŭłasnaść.
Tym nie mienš, sotni čyhunačnikaŭ uziali ŭdzieł u demanstracyjach u Janhonie ŭ niadzielu, niahledziačy na zahady palicyi, jakaja patrabavała viarnucca da pracy.
Sałdaty byli skiravanyja na elektrastancyi ŭ paŭnočnaj pravincyi Kačyn, što pryviało da kanfrantacyi z demanstrantami, jakija vyrašyli, što vajskoŭcy chočuć adklučyć elektryčnaść, kab pravodzić načnyja aryšty.
Z nadychodam nočy sałdaty ŭžyli vadamioty, kab razahnać demanstrantaŭ kala elektrastancyi ŭ administracyjnym centry Kačyna — horadzie Mjičyna.
Niekalki enierhietyčnych pradpryjemstvaŭ u Janhonie zajavili, što admoviacca adklučać elektryčnaść, i vykazali padtrymku demanstrantam.
