Makiej raskazaŭ pra temy pieramoŭ Łukašenki i Pucina
Maskva i Minsk rychtujucca da sustrečy Pucina i Łukašenki, paviedamiŭ RBK ministr zamiežnych spraŭ Biełarusi Uładzimir Makiej. Buduć abmiarkoŭvacca pytańni intehracyi, nie vyklučana abmierkavańnie temy kredytaŭ.
Jon taksama nie vyklučyŭ, što moža być zakranutaja tema ŭzajemadziejańnia ŭ finansava-kredytnaj śfiery. «Ale heta nie značyć, što Biełaruś budzie prasić abaviazkova kredyty ŭ Rasii i prasić niejkaj dapamohi. Mahčyma, budzie abmiarkoŭvacca pytańnie finansava-kredytnaha ŭzajemadziejańnia z punktu hledžańnia realizacyi roznych vyhadnych sumiesnych prajektaŭ, jakija abmiarkoŭvalisia, darečy, padčas vizitu vice-premjera Barysava ŭ Biełaruś», — skazaŭ ministr. Na jaho dumku, krainam treba ruchacca pa šlachu sumiesnaj kaapieracyi, jakaja dazvolić vyvieści intehracyju na novy ŭzrovień.
Makiej zapeŭniŭ, što praca pa pahłybleńni intehracyi Rasii i Biełarusi nie była spynienaja z-za pandemii i pratestaŭ u Biełarusi: «Pytańni našaha bolš ciesnaha intehracyjnaha ŭzajemadziejańnia abmiarkoŭvalisia pastajanna. Kiraŭniki halinovych ministerstvaŭ sustrakalisia adzin z adnym. Byli ździejśnienyja ŭzajemnyja vizity». Makiej čakaje, što apošnija padziei, «jakija adbyvajucca ŭnutry i vakoł našych krain, jany mohuć i abaviazkova padšturchnuć nas da bolš ciesnych intehracyjnych pracesaŭ u dvuchbakovym farmacie, i rana ci pozna ŭ šmatbakovym farmacie ŭ ramkach Jeŭrazijskaha ekanamičnaha sajuza».
Pa infarmacyi «Kommiersanta», padčas vizitu Łukašenki ŭ Rasiju boku mohuć zakranuć temy novaha rasijskaha kredytu ŭ pamiery $3 młrd z rešty srodkaŭ, vyłučanych rasijskim uradam na budaŭnictva Biełaruskaj AES. Pradstaŭnik Minfina Biełarusi nie paćvierdziŭ hetuju infarmacyju.
Makiej upeŭnieny, što hramadzianie Biełarusi padtrymlivajuć uzmacnieńnie intehracyi ŭ ramkach Sajuznaj dziaržavy. «Kali intehracyjnyja pracesy buduć nakiravany na ŭmacavańnie dziaržaŭnaści, ja nie dumaju, što heta vykliča niejkaje abureńnie ŭ biełaruskich hramadzian», — skazaŭ jon.
Praca pa pahłybleńni intehracyi pačałasia ŭ kancy 2018 hoda. Baki damovilisia padrychtavać płan zbližeńnia krainy i apisać ich u intehracyjnych kartach (usiaho 31). Adnak kančatkova ŭzhadnić usie karty i padpisać ich da hetaha času nie ŭdałosia.
Apošniaja asabistaja sustreča Pucina i Łukašenka adbyłasia ŭ vieraśni ŭ Sočy. Pucin na joj padtrymaŭ namier Łukašenki pravieści kanstytucyjnuju reformu. 11 lutaha Łukašenka paviedamiŭ, što novy varyjant Kanstytucyi krainy budzie raspracavany ŭ 2021 hodzie, a na refierendum jon moža być vyniesieny ŭ 2022 hodzie.
