Fitnes-trekiery mohuć stać praryvam u baraćbie z karanavirusam
Daśledčyki vyjavili, što źviestki, zapisanyja fitnes-trekierami, naprykład Apple Watch, źjaŭlajucca dobrym indykataram taho, ci budzie va ŭładalnika hadzińnika stanoŭčy test na kavid. Heta moža stać sapraŭdnym praryvam u baraćbie z pandemijaj.
Fota Depositphotos.com
Padstupnaść karanavirusa ŭ tym, što jaho raznosiać i bieśsimptomnyja nośbity. Daśledčyki z Mount Sinai Health System (sietka balnic u Ńju-Jorku) znajšli patencyjny dyjahnastyčny instrumient dla bieśsimptomnych vypadkaŭ — Apple Watch.
Navukoŭcy vyjavili, što razumny hadzińnik pakazvaŭ źmieny ŭ sercabićci ludziej za siem dzion da taho, jak u ich byŭ dyjahnastavany kavid, piša DW.
Daśledčyki zasiarodzilisia na varyjabielnaści sardečnaha rytmu ŭdzielnikaŭ ekśpierymientu. Vysokaja varyjabielnaść sardečnaha rytmu śviedčyć pra aktyŭnaść niervovaj sistemy, a taksama sihnalizuje, što imunnaja sistema čałavieka pracuje dobra.
«Hadzińnik pakazaŭ značnyja źmieny ŭ varyjabielnaści sardečnaha rytmu za tydzień da taho, jak va ŭdzielnikaŭ daśledavańnia test na karanavirus pakazaŭ stanoŭčy vynik», — adznačyŭ aŭtar daśledavańnia doktar Robiert Chirtan (Robert Hirten) ź miedycynskaj škoły Icahn School of Medicine at Mount Sinai.
U daśledavańni, jakoje pravodziłasia z 29 krasavika da 29 vieraśnia, uziali ŭdzieł 297 miedycynskich rabotnikaŭ z Mount Sinai Health System. Usie jany nasili hadzińnik Apple Watch i karystalisia adpaviednym dadatkam na telefonie. U ludziej, u jakich paźniej dyjahnastavali kavid, čas pamiž dvuma ŭdarami serca varjiravaŭsia mienš, čym u tych, u kaho test na karanavirus pakazaŭ admoŭny vynik.
Takaja infarmacyja moža mieć vyrašalnaje značeńnie ŭ baraćbie z karanavirusam.
«Raspracoŭka sposabu identyfikacyi chvorych na kavid da taho, jak pacyjenty pra infiekcyju daviedajucca praz test, stanie praryvam u kantroli nad karanavirusam, — śćviardžaje doktar Chirtan. Jakraz bieśsimptomnyja pacyjenty ŭskładniajuć strymlivańnie infiekcyi».
Padobnaje daśledavańnie pravodziłasia i ŭ Stenfardskim univiersitecie. Jaho vyniki byli apublikavanyja ŭ časopisie Nature Biomedical Engineering. Navukoŭcy vyjavili, što razumny hadzińnik moža vyjavić karanavirus da taho, jak jon budzie dyjahnastavany z dapamohaj testa. Daśledčyki vyvučali takija faktary, jak puls, kolkaść krokaŭ za dzień i čas snu.
U daśledavańni ŭziali ŭdzieł 5262 udzielniki. Navukoŭcy praanalizavali źviestki z hadzińnika 32 udzielnikaŭ, jakija zarazilisia karanavirusam.
Aŭtary vyznačyli, što 63% vypadkaŭ kavidu možna było vyjavić da prajaŭleńnia simptomaŭ, bo ŭ infikavanych naziraŭsia pavyšany puls u stanie spakoju.
