Ajcišniku, jakoha źbiŭ bus siłavikoŭ, prysudzili 3 hady «chimii»
Sudździa Frunzenskaha sudu stalicy Natalla Buhuk 5 lutaha vyniesła prysud inžyneru-prahramistu Ściapanu Čykilovu, jakoha 15 listapada źbiŭ milicejski bus na sustrečnaj pałasie. Chłopca abvinavačvali ŭ złosnym chulihanstvie, nibyta jon paškodziŭ busy siłavikoŭ, piša «Svaboda».
Ściapana Čykilova asudzili na 3 hady abmiežavańnia voli z nakiravańniem u papraŭčuju ŭstanovu adkrytaha typu (tak zvanaja «chimija»). Jaho vyzvalili ŭ zali sudu da ŭstupleńnia prysudu ŭ zakonnuju siłu.
Dziaržabvinavaŭca Kryścina Asran śćviardžała, što 15 listapada Ściapan Čykiloŭ z chulihanskich namieraŭ, naŭmysna, biespryčynna razam z hrupaj asobaŭ zrabiŭ nia mienš jak try kidki ŭ bok milicejskich aŭtamabilaŭ, u vyniku čaho byli paškodžanyja sama mieniej 3 milicejskija aŭtamabili — defarmavalisia lakafarbavyja pakryćci busaŭ, i tym samym vajskovaj častcy 3033 naniesiena materyjalnaja škoda ŭ sumie 1180 rubloŭ.
Inžynera-prahramista abvinavačvali ŭ złosnym chulihanstvie pavodle častki 2 artykułu 339 Kryminalnaha kodeksu.
Dziaržabvinavaŭca prasiła pakarać Čykilova 3 hadami abmiežavańnia voli z nakiravańniem u papraŭčuju ŭstanovu. Advakatka Kryścina Piečkurava nastojvała, što jaje padabaronny nievinavaty.
Što adbyłosia na praspekcie Puškina 15 listapada apoŭdzień
Na šmatlikich videa, jakija źniali i žurnalisty, i kamery videanazirańnia, vidać, jak chłopiec u šeraj kurtcy zamachvajecca rukoŭ u bok milicejskich busaŭ. Ruch na praspekcie Puškina ŭ toj momant byŭ pierakryty. U hety momant pa sustrečnaj pałasie jedzie jašče adzin sini bus, jaki i źbiŭ piešachoda. Siłaviki vyskačyli z aŭtamabila, zaciahnuli tudy chłopca i źjechali. Krasoŭki jaho tak i zastalisia na darozie. Uviečary maładoha čałavieka z pastarunku dastavili ŭ špital chutkaj dapamohi sa šmatlikimi traŭmami, a praz paru dzion viarnuli na Akreścina. U adnosinach da inžynera-prahramista Ściapana Čykilova zaviali kryminalnuju spravu pavodle častki 2 artykułu 339 — Złosnaje chulihanstva.
Dvoje z šaści śviedak apaznali Ściapana Čykilova
U sudzie śviedkami vystupili šeść bajcoŭ specyjalnaha atradu chutkaha reahavańnia. Śviedak dapytvali biez vyśviatleńnia ich asoby, asabistych źviestak, kab zabiaśpiečyć ich niepaznavalnaść. Tvary ich całkam zakrytyja bałakłavami, na vačach ciomnyja akulary, usie jany vystupali pad niesapraŭdnymi proźviščami.
Tolki dvoje z šaści skazali, što paznali Ściapana pa ciełaskładzie i pryčoscy.
U busiku i aŭtazaku Čykilova mocna pabili — z pastarunku jaho zabrała «chutkaja»
Sam ža Ściapan Čykiloŭ na sudzie raskazaŭ, što paśla zatrymańnia jaho žorstka bili ŭ mikraaŭtobusie. Padziei pamiataje słaba, bo traciŭ prytomnaść.
«Pamiataju, što mianie zaciahnuli ŭ bus, naciahnuli kurtku na hałavu. Pakłali na padłohu, supracoŭnik milicyi nacisnuŭ kalenam na hrudzi, było ciažka dychać. Traciŭ prytomnaść, u busie bili, užyli elektrašokier. Potym pierasadzili ŭ aŭtazak i doŭha vazili pa horadzie», — raskazaŭ Ściapan padčas dopytu ŭ sudzie.
U Frunzenskim RUUSie dziažurnaja advakatka nastajała, kab Ściapanu vyklikali chutkuju dapamohu. U lakarni chutkaj dapamohi medyki dyjahnastavali spałučanuju traŭmu, strasieńnie mozhu, šmatlikija ślady ŭdaraŭ, drapiny, paškodžańnie nyrki. Paciarpiełamu nakłali švy, na šyju nadzieli fiksavalny kaŭnier. U špitali mužčynu trymali pad kanvojem, praz try dni pieraviali na Akreścina, a potym u Žodzina, dzie jon prasiedzieŭ amal 3 miesiacy.
34-hadovy Ściapan Čykiloŭ — viadučy inžyner-prahramist bujnoj IT-kampanii. Kalehi kažuć, što jon «naradziŭsia prahramistam», «čałaviek-lehienda», «zvyšmehaŭraŭnavažany i dobrazyčlivy chłopiec».
«Naradziŭsia prahramistam» i «čałaviek-lehienda». Sudziać minčuka, na jakoha najechaŭ milicejski bus
