Łukašenka anansavaŭ «maštabnaje sacyjałahičnaje daśledavańnie»
Alaksandr Łukašenka 2 lutaha na naradzie pa pytańniach padrychtoŭki i praviadzieńnia VI Usiebiełaruskaha narodnaha schodu raskazaŭ ab praviadzieńni ŭ krainie maštabnaha sacyjałahičnaha daśledavańnia i paprasiŭ sadziejničańnia hramadzian, jakija buduć prymać u im udzieł, pieradaje BiełTA.
«Chaču źviarnucca da ludziej — biełaruskaha naroda. My pryniali rašeńnie (mnoju jano daŭno pryniata) ab maštabnym sacyjałahičnym daśledavańni ŭ Biełarusi. I tady było daručeńnie, kab my hetyja sacyjałahičnyja daśledavańni zaviaršyli da Usiebiełaruskaha narodnaha schodu i pastavili tam dla adkazu ludziam kankretnyja pytańni, ad jakich zaležyć raźvićcio Biełarusi i jakija chvalujuć ludziej. Hetyja sacyjałahičnyja daśledavańni pačalisia. Daśledavali častku haradoŭ, pracoŭnych kalektyvaŭ i hetak dalej. U bližejšyja niekalki dzion my apytajem ludziej (my nie daśledavali faktyčna viosku, małyja harady, rajonnyja centry) i asobnyja pradpryjemstvy, jakija nas bolš za ŭsio chvalujuć u haradach», — raskazaŭ Łukašenka.
«Tamu ja źviartajusia da ludziej: kali pryjduć da vas pradstaŭniki našych sacyjałahičnych słužbaŭ i zadaduć niejkaje kankretnaje pytańnie, vielmi prašu abjektyŭna i sumlenna adkazać na hetyja pytańni. Dla mianie asabista heta vielmi važna. Dla ŭsich nas vielmi važna, kab my mahli pryniać dobryja, vyvieranyja rašeńni. Ananimnaść harantuju poŭnaściu», — zajaviŭ Alaksandr Łukašenka.
Što datyčycca ananimnaści sacdaśledavańnia, to Łukašenka zrabiŭ na hetym momancie asablivy akcent, bo niekatoryja hramadzianie nie žadajuć publična vykazvać svaju pazicyju. «Našy hetyja pratestuny i inšyja pačali piersanalnyja danyja publikavać u Telegram-kanałach i hetak dalej. U ich jość mierkavańnie, jany viedajuć, što rabić, viedajuć, kamu daviarać — nie daviarać, ale publična vykazvacca nie chočuć. Tamu apytańnie budzie piersanalnaje i poŭnaja ananimnaść. Nijakich proźviščaŭ i hetak dalej, — skazaŭ kiraŭnik dziaržavy. — Jašče raz paŭtaraju: vielmi prašu ludziej adkazać na tyja pytańni, ź jakimi pryjduć pradstaŭniki sacyjałahičnych słužbaŭ. Heta buduć vielmi prystojnyja ludzi. Nijakaha vykładańnia pastoŭ i fatahrafij ni ŭ internecie, nidzie nie budzie».
Alaksandr Łukašenka taksama padkreśliŭ važnaść poŭnaj abjektyŭnaści pry praviadzieńni sacdaśledavańnia, vyniki jakoha buduć apublikavany. «Pytańni vielmi cikavyja i vielmi nadzionnyja, jakija datyčacca žyćcia našych ludziej», — adznačyŭ palityk.
Jon raskazaŭ, što asnoŭnym daśledčykam vystupaje nie biełaruskaja, a zamiežnaja kampanija. «Treba padklučyć na hetym etapie jašče, moža być, rasijan. Kali našy «śviadomyja» pačnuć nahami špylać rasijan, prośba padklučyć ukraincaŭ. Jany cudoŭna razmaŭlajuć na ruskaj movie i z našymi ludźmi svabodna zmohuć razmaŭlać. I inšych ludziej, jakija chočuć padklučycca i dapamahčy nam abjektyŭna pravieści sacyjałahičnyja daśledavańni. Tak, buduć padklučany biełaruskija sacyjołahi, ale jany nie pavinny być hałoŭnymi, kab byŭ davier da sacyjałahičnych daśledavańniaŭ usich hrup nasielnictva», — reziumavaŭ palityk.
