U Turcyi pratestujuć studenty: raniej rektara vybirali, a ciapier jaho pryznačyŭ Erdahan
Studenty i vykładčyki Basforskaha ŭniviersiteta, adnaho z najbolš viadomych u Turcyi, pratestujuć suprać pryznačeńnia novaha rektara prezidentam Redžepam Taipam Erdahanam.
Fota Depositphotos.com
Na praciahu niekalkich tydniaŭ u samym prestyžnym univiersitecie Turcyi praciahvajucca pratesty. Kožny dzień vykładčyki vychodziać na hałoŭny dvoryk, pavaročvajucca śpinaj da kabinieta rektara i maŭkliva vykazvajuć pratest suprać jaho pryznačeńnia, paviedamlaje The New York Times.
Tradycyjna ŭniviersitet samastojna abiraje rektara sa svaich kołaŭ. Ale na hety raz novy rektar byŭ pryznačany prezidentam. Takim čynam Erdahan sprabuje ŭstalavać kantrol nad adnoj z hałoŭnych adukacyjnych ustanoŭ Turcyi.
Basforski ŭniviersitet — adzin z najlepšych univiersitetaŭ Turcyi, raźmieščany na jeŭrapiejskim baku praliva Basfor u Stambule. Kaliści jon byŭ častkaj amierykanskaha kaledža, zasnavanaha Krystafieram Robiertam u 1863 hodzie. Univiersitet viadomy svajoj libieralnaj kulturaj.
Univiersitet užo daŭno pryciahvaŭ uvahu Erdahana i jaho kansiervatyŭnych prychilnikaŭ, jakija asudžajuć libieralnyja pohlady ŭstanovy.
Pryznačeńnie biznesoŭca z kołaŭ prezidenta Mielicha Bułu na post rektara było rascenienaje jak jašče adzin krok raspaŭsiudžvańnia ŭpłyvu Erdahana na ŭsie aśpiekty sacyjalnaha i kulturnaha žyćcia Turcyi.
Erdahan atrymaŭ šyrokija paŭnamoctvy paśla sproby dziaržaŭnaha pieravarotu ŭ 2016 hodzie, jaki skončyŭsia pravałam. Va ŭmovach nadzvyčajnaha stanovišča jon raspačaŭ žorstkija represiŭnyja miery ŭ adnosinach da svaich apanientaŭ. Paciarpieli i tyja, chto nie mieŭ nijakaha dačynieńnia da zamovy pieravarotu, u tym liku žurnalisty, palityki i pravaachoŭniki.
U 2016 hodzie prezidenckim ukazam Erdahan zajaviŭ ab svaim pravie pryznačać rektaraŭ univiersitetaŭ.
Mielich Bułu byŭ pryznačany 1 studzienia. Na praciahu niekalkich dzion sotni studentaŭ vychodzili na pratest, a niekatoryja sutyknulisia z palicyjaj. Jak minimum 30 studentaŭ zatrymali z pačatku pratestaŭ. U adkaz na heta studenty pačali vykarystoŭvać inšyja formy pratestu. Jany stvarajuć karykatury, arhanizoŭvajuć vystavy i śpiavajuć pieśni ŭ kampusie.
Spačatku novy rektar sprabavaŭ stasavacca sa studentami, razmaŭlaŭ ź imi ŭ kampusie, ale pratesty ŭsio roŭna praciahvalisia, u vyniku čaho Mielich Bułu ŭzmacniŭ miery biaśpieki vakoł svajho kabinieta.
Navukoŭcy ŭźniali pytańnie nakont kvalifikacyi novaha rektara. Jaho navukovyja artykuły i dysiertacyi abvinavacili ŭ płahijacie, na što Mielich Bułu adkazaŭ žurnalistam, što prosta zabyŭsia pastavić dvukośsie ŭ niekatorych miescach.
U paniadziełak pratestoŭcy pačali zaklikać prafsajuzy i palityčnyja partyi dałučycca da masavych pratestaŭ, ale palicyja pierakryła hałoŭny ŭvachod u kampus i zatrymała dziasiatki studentaŭ paśla patrabavańnia razyścisia.
Studenty Basforskaha ŭniviersiteta nastojvajuć na tym, što buduć praciahvać pratest, pakul pryznačeńnie nie admieniać abo Mielich Bułu nie sydzie ŭ adstaŭku.
Pa słovach pratestoŭcaŭ, studenty nie vystupajuć suprać samoha Mielicha Bułu, jany vystupajuć suprać taho, jak jon zaniaŭ hety post. Pratestoŭcy paraŭnoŭvajuć jaho pryznačeńnie z vypadkami zamieny bolš za 100 meraŭ za apošnija hady, miesca jakich zaniali dziaržaŭnyja pryznačency.
