Žurnalistcy Tut.by Nadziei Kalininaj pahražaje 25 sutak. Sud pieranieśli
1 lutaha ŭ sudzie Leninskaha rajona pačaŭsia praces pa spravie žurnalistki Tut.by Nadziei Kalininaj. Jana była zatrymanaja 29 studzienia, kali sprabavała patrapić na źjezd delehataŭ VNS pa Minsku, jaki prachodziŭ u DK «Kamvol».
Nadzieja Kalinina. Archiŭnaje fota Nadziei Bužan
Nadzieju zabrali ŭ RUUS, ale jaje advakata tudy nie puścili. U sudzie stała viadoma, što na žurnalistku skłali dva pratakoły: za ŭdzieł u niesankcyjanavanym masavym mierapryjemstvie (paŭtorna na praciahu hoda) i za niepadparadkavańnie patrabavańniam supracoŭnika milicyi.
Žurnalistka paśpieła pieradać advakatu, što ŭtrymlivajecca ŭ kamiery na piać čałaviek, dzie ź joj 12 žančyn. Pieradačy, u tym liku bializnu i srodki hihijeny, ni dla kaho nie prymajuć.
Spravu razhladaje sudździa Taćciana Šocik. Nadzieja znachodzicca ŭ izalatary na Akreścina, suviaź ź joj — praz skajp. Jana paśpieła paviedamić, što vosiem razoŭ prasiła supracoŭnikaŭ milicyi dapuścić da jaje advakata, jaki 29 studzienia pryjazdžaŭ u Leninskaje RUUS, adnak prava na abaronu było parušana. Heta Kalinina adznačyła i ŭ pratakole. Akramia taho, žurnalist raspaviała advakatu, užo ŭ sudzie, što drenna siabie adčuvaje, abvastryłasia mihreń, u kamiery na piać čałaviek utrymlivajuć 12 žančyn.
U sudovym pracesie pierapynak da 14:15, advakat znajomicca z materyjałami spravy.
Nadzieju Kalininu abvinavačvajuć pa dvuch artykułach KaAP: udzieł u niesankcyjanavanym masavym mierapryjemstvie prosta ŭ DK «Kamvol», dzie prachodziŭ źjezd delehataŭ, u jakim udzielničali top-palityki: Maryjana Ščotkina, Natalla Kačanava, Andrej Savinych i inšyja. A taksama ŭ niepadparadkavańni patrabavańniam supracoŭnika milicyi.
Raniej Nadzieju Kalininu ŭžo sudzili nibyta za ŭdzieł u akcyi, kali jana pracavała na šeści studentaŭ, tady jana atrymała troje sutak aryštu.
Pavodle pratakoła, 29 studzienia kala 15:50 na zakonnyja i adnarazovyja patrabavańni supracoŭnika milicyi akazvała niepadparadkavańnie supracoŭniku milicyi padčas niesankcyjanavanaha pikietavańnia. Taksama jana nibyta pikietavała kala 16 hadzin z metaj publičnaha vykazvańnia patrabavańnia pravieści ŭ Biełarusi sumlennyja vybary, vykrykvała «pravakacyjnyja łozunhi» kala prajeznaj častki.
— Ja vinu nie pryznaju, - skazała Kalinina.
Jana raspaviadaje, što ničoha z paznačanaha ŭ pratakole, akramia adrasa, nie adpaviadaje rečaisnaści. Nadzieja kaža, što pa zadańni redakcyi pryjechała zarehistravacca i aśviatlać źjezd delehataŭ UNS u Minski haradski dom kultury. Achoŭnik praviaraŭ dakumienty i zaprašalnyja. Kalinina pakazała bejdž «presa» i pradstaviłasia žurnalistam.
Spytała, ci moža jana trapić na schod i aśviatlać mierapryjemstva. Joj adkazali, što jana nie zarehistravanaja, tamu nielha. Tady žurnalistka spytała, ci možna zarehistravacca, kanśjerž skazaŭ pačakać. Nadzieja čakała ŭ chole, jana ŭspaminaje, što za hety čas mima jaje prajšli dziasiatki čałaviek, u tym liku Arciom Curan, Natalla Kačanava, Marjana Ščotkina i Andrej Savinych.
— «Ja vas paprašu pakinuć pamiaškańnie», - skazaŭ mnie potym achoŭnik-kanśjerž. Jak tolki ja adkryła dźviery na vychad, to pačuła, što chtości biažyć zzadu. … Heta byli supracoŭniki ŭ čornym, jany pierakryli mnie darohu. … Mianie praviali ŭ šery mikraaŭtobus, pasadzili ŭ jaho i pavieźli. Nichto nie pradstaŭlaŭsia i nie pytaŭsia pryčyn, čamu ja tam znachodžusia, u tym liku na praciahu niekalkich hadzin, kali ja znachodziłasia ŭ Leninskim RUUS — — cytuje słovy Kalininaj BAŽ.
Kalinina paprasiła vyklikać u sud Kačanavu, Savinych i Ščotkinu. Pa słovach žurnalistki, jany bačyli jaje i mohuć paćvierdzić — nijakaha pikietu jana nie ładziła.
U sudzie pačaŭ davać tłumačeńni śviedka Šymanovič (heta niesapraŭdnaje proźvišča), suviaź niestabilnaja, z-za čaho davodzicca pieraryvać praces. Jon zajaviŭ, što 29 studzienia nios słužbu pa achovie hramadskaha paradku ŭ rajonie vulicy Majakoŭskaha. Ubačyŭ, jak žančyna (jak potym budzie ŭstanoŭlena — Kalinina) pikietavała ŭzdoŭž prajeznaj častki, vykrykvała łozunh «Žyvie Biełaruś!», na nieadnarazovyja zaŭvahi nie reahavała. Paśla čaho jaje zatrymali supracoŭniki śpiecpadraździaleńnia, supracivu jana nie akazvała.
Zajava śviedki nie supadaje z danymi, nazvanymi ŭ pratakole: pa-pieršaje, nie supadaje miesca «pikietu» — uzdoŭž darohi pa pratakole i prajeznaja častka darohi, pa tłumačeńniach Šymanoviča; pa-druhoje, łozunh: pa pratakole heta byŭ łozunh «Za sumlennyja vybary», pa słovach milicyjanta — «Žyvie Biełaruś»; pa-treciaje, zhodna z pratakołam, Kalinina akazvała supraciŭ pry zatrymańni, a śviedka pakazaŭ, što supracivu z boku Kalininaj nie było.
Paźniej milicyjant źmianiŭ svaje tłumačeńni, zajaviŭ, što Kalinina ŭsio ž stajała ŭzdoŭž darohi, tvaram da prajeznaj častki, i vykrykvała pravakacyjnyja łozunhi — «Žyvie Biełaruś!».
U sudzie dała tłumačeńni redaktar palityka-ekanamičnaha błoka partała Tut.by Volha Łojka. Jana patłumačyła, što 29 studzienia a 15.15 dała zadańnie Nadziei Kalininaj padrychtavać repartaž sa źjezdu minskich delehataŭ UNS. Kalinina ŭziała taksi ad vulicy Tanka da vulicy Majakoŭskaha, u 15.40 užo była na miescy, napisała redaktaru, što na ŭvachodzie ŭ DK praviarajuć zaprašalnyja ŭdzielnikaŭ, papiaredziła, što budzie pakazvać achovie žurnalisckaje paśviedčańnie i pasprabuje akredytavacca na miescy. U 16.15 Volzie patelefanavała siabroŭka Nadziei, jakaja paviedamiła, što atrymała SOS-paviedamleńnie, jakoje žurnalisty adpraŭlajuć na vypadak zatrymańnia.
Taksama ŭ sudzie apytali žurnalista Tut.by Alenu Tałkačovu, jakaja apieratyŭna prybyła ŭ Leninskaje RUUS, jak tolki stała viadoma, što tam utrymlivajuć Nadzieju. Alena paviedamiła, što dziažurny supracoŭnik milicyi paćvierdziŭ, što «Kalinina zatrymanaja i znachodzicca ŭ nas», advakata da zatrymanaj nie puścili, choć prava na abaronu harantavanaje Kanstytucyjaj, advakat Valeryj Zinkievič u suviazi z hetym pakinuŭ skarhu ŭ RUUS.
Nadzieja Kalinina pastajanna zaznačaje što nie čuje, što kažuć udzielniki pracesu. U zale sudovaha pasiedžańnia ŭstalavanyja mikrafony, ale kali advakat pasprabavaŭ havaryć u mikrafon, sudździa zrabiła zaŭvahu:
- Mikrafon nia pryznačany dla ŭzmacnieńnia vašaha hołasu. Vy možacie kazać hučniej abo padyści (da manitora, pa jakim ŭstalavanaja videasuviaź z Kalininaj).
Taksama advakat pacikaviŭsia, jak pasučvajecca Nadzieja. Jana pakazała, što ŭ jaje tachikardyja, byŭ vostry prystup mihreni, jaki dapamahła kupiravać miedsiastra na Akreścina: zrabili ŭkoł. U kamiery na 5 čałaviek znachodziacca 12, nie chapaje kisłarodu. Dźvie nočy žurnalistka spała na padłozie na svajoj kurtcy. U kamiery šmat piensijanierak, jany taksama vymušanyja spać na padłozie, pastajanna ŭklučanaje śviatło. Adzin dzień bieź pierapynku hučna hrała muzyka-heta mahło spravakavać prystup mihreni, ličyć Nadzieja. Umovy jana nazyvaje «dalokimi ad narmalnych». Sudździa spyniła advakata, kali jon pasprabavaŭ udakładnić jašče detali ŭtrymańnia, Šocik zajaviła, što da hetaha pracesu heta dačynieńnia nie maje.
Dapoŭniena: Žurnalistku Tut.by Nadzieju Kalininu pakul što vyzvalać.
Sud pryjšoŭ da vysnovy, što treba paprasić videa zatrymańnia Kalininaj u minskim haradskim domie kultury, dzie jaje schapili, a paśla praciahnuć pasiadžeńnie. Ale pakolki z momantu zatrymańnia ŭžo prajšli troje sutak, žurnalistku pavinny adpuścić.
Čytajcie taksama: Nastaŭnica małodšych kłasaŭ, sabačnica, viedaje italjanskuju. Raskazvajem pra žurnalistku Nadzieju Kalininu, jakaja znoŭ trapiła na Akreścina za svaju pracu
«Davajcie pahavorym pra čałaviečnaść». Redaktarka Tut.by źviarnułasia da kiraŭnikoŭ haliny achovy zdaroŭja
