Pačaŭsia sud nad błohieram Paŭłam Śpirynym. Jon admoviŭsia ad advakata
U Minskim haradskim sudzie pačaŭsia razhlad kryminalnaj spravy suprać videabłohiera Paŭła Śpiryna. Na sud pryjšła vialikaja kolkaść ludziej, u zale źmiaścilisia kala 50 čałaviek. Kala 70 čałaviek zastałosia stajać pa-za załaj.
Fota BiełaPAN
Paŭła Śpiryna dastavili ŭ sud pad kanvojem, jon znachodzicca ŭ kletcy. U pačatku pracesu jon zajaviŭ chadajnictva ab admovie ad advakata, budzie abaraniać siabie sam. «Admova ad advakata nie źviazanaja z maim materyjalnym stanoviščam», — skazaŭ Pavieł. Sud pastanaviŭ zadavolić chadajnictva, piša «Radyjo Svaboda».
Śpiryn taksama zajaviŭ, što nie daviaraje prakuroru i vystupiŭ z chadajnictvam ab vykliku ŭ sud śviedak, jakija vykazvali svaju dumku pra jahony film i jakich dapytvała śledstva.
Videabłohiera abvinavačvajuć pavodle art. 130 Kryminalnaha kodeksa («Naŭmysnyja dziejańni, nakiravanyja na ŭzbudžeńnie rasavaj, nacyjanalnaj, relihijnaj albo inšaj sacyjalnaj varožaści pa prykmiecie rasavaj, nacyjanalnaj, relihijnaj, moŭnaj ci inšaj sacyjalnaj prynaležnaści).
Padstavaj dla zaviadzieńnia suprać jaho kryminalnaj spravy staŭ jahony film «Hrań» pra narkahandal u Biełarusi. Film byŭ zaniesieny ŭ śpis ekstremisckich materyjałaŭ.
Paŭła Śpiryna zatrymali 4 vieraśnia, praz troje sutak vypuścili i praz paŭtara dnia znoŭ zatrymali 9 vieraśnia paśla taho, jak jon apublikavaŭ novy videabłoh.
Na minułych vybarach Pavieł zajaviŭ pra namier bałatavacca kandydatam u prezidenty. Adnak u CVK jaho inicyjatyŭnaj hrupy nie zarehistravali.
