Jak žyvie Uchań, horad, dzie vyrvaŭsia karanavirus
Va Uchani, pieršapačatkovym centry pandemii karanavirusa, pastavili pomnik u honar paśpiachovaj baraćby Kitaja z kavidam. Adnak daloka nie ŭsie ličać taki žest darečnym, piša The Wall Street Journal.
Fota Depositphotos.com
Na miescy byłoha špitala chutkaj dapamohi va Uchani, dzie lažali tysiačy infikavanych na piku ŭspyški, ciapier raźmieščanaja vystava, pryśviečanaja pieramozie horada nad virusam.
Adnak isnuje mierkavańnie, što tryumf niedarečny i havaryć pra pieramohu rana. A tyja, chto zhubiŭ blizkich, uvohule hnievajucca.
Kali ŭ sakaviku minułaha hoda vice-premjerka Suń Čuńłań naviedała horad i pierakonvała, što ŭsio pad kantrolem, ludzi kryčali joj z akon, što ŭsio heta padman, choć u Kitai krytykujuć redka, bo heta niebiaśpiečna.
Žycharka horada, jakaja zhubiła svajho baćku ŭ lutym praz kavid, ličyć, što, zamiest taho, kab supraćstajać uspyšcy, čynoŭniki zamoŭčvali jaje.
Baćka jašče adnoj 36-hadovaj žycharki Čžan Chun, imavierna, pamior ad kavidu padčas uspyški va Uchani. Aficyjna ŭ jaho nie byŭ dyjahnastavany karanavirus, i jaho nie ŭklučali ŭ aficyjnyja śpisy, jak i šmat inšych ludziej, što pamierli padčas uspyški va Uchani.
Niadaŭna ŭłady Kitaja pryznali, što aficyjnaja statystyka z Uchania (50 340 vypadkaŭ zachvorvańnia) nie adlustroŭvaje realnych maštabaŭ uspyški virusa. Na pačatku studzienia hetaha hoda Kitajski centr pa kantroli i prafiłaktycy zachvorvańniaŭ zajaviŭ, što testavańnie vyjaviła najaŭnaść antycieł da kavidu ŭ 4,43% nasielnictva horada, z čaho možna zrabić vysnovu, što va Uchani, imavierna, pierachvareli kala paŭmiljona čałaviek.
Jość prykmiety taho, što ŭłady Kitaja zaniepakojenyja abureńniem žycharoŭ Uchania, dzie ludzi pieražyli samyja strašnyja žachi pandemii. Paśla hetaha ŭzmacniłasia cenzura, a žurnalista Čžan Čžania, jaki z samaha pačatku aśviatlaŭ pandemiju, aryštavali na 4 hady za «raspalvańnie varožaści».
Tym nie mienš, u cełym pa krainie Kamunistyčnaja partyja ćviorda trymaje ŭładu, i za čas pandemii kantrol nad hramadstvam tolki ŭzmacniŭsia. Letaś Kitaj zastaŭsia adzinaj vialikaj ekanomikaj, dzie naziraŭsia rost, a ekspart dasiahnuŭ rekordnaha ŭzroŭniu.
