Śledčyja orhany atrymali prava prypyniać pravierku na niavyznačany termin. I mienavita spravy ab źvierstvach 9-12 žniŭnia pad hetuju mahčymaść padpadajuć
Śledčyja orhany zmohuć prypyniać pravierku pa zajavie ab zaviadzieńni kryminalnaj spravy na niavyznačany termin. Takija źmieny ŭtrymlivajucca ŭ abnoŭlenym Kryminalna-pracesualnym kodeksie. Na heta źviarnuli ŭvahu advakaty Siarhiej Zikracki i Michaił Badnarčuk.
Fota Dźmitryja Bruško
Raniej paśla zajavy abo paviedamleńnia ab ździajśnieńni złačynstva termin daśledčaj pravierki składaŭ try miesiacy, adnak jana mahła być prypynienaja jašče na try miesiacy — naprykład, dla praviadzieńnia ekśpiertyzy. Heta značyć, u sumie — maksimum paŭhoda, paśla jakoha śledstva pavinna było pryniać rašeńnie ab zaviadzieńni kryminalnaj spravy. U vypadku admovy zajaŭnik moh aznajomicca z vynikami pravierki i abskardzić takuju admovu, piša Tut.by.
Zhodna z abnoŭlenym Kryminalna-pracesualnym kodeksam, ahulny termin prypynieńnia pravierki nie pavinien pieravyšać troch miesiacaŭ. Adnak u im praduhledžana mahčymaść prypyniać pravierku na termin i zvyš troch miesiacaŭ, pry hetym maksimalny termin nie ŭstanoŭleny. Zrabić heta majuć prava načalnik vyšejstajačaha Śledčaha padraździaleńnia, staršynia Śledčaha kamiteta abo ich namieśniki (kali materyjały znachodziacca ŭ vytvorčaści śledčaha) albo prakuror vyšejstajačaha orhana prakuratury, hienieralny prakuror abo ich namieśniki (kali materyjały znachodziacca ŭ vytvorčaści orhana daznańnia abo prakurora).
Bolšaść źmianieńniaŭ u KPK, prapisanych u zakonie «Ab źmienie kodeksaŭ pa pytańniach kryminalnaj adkaznaści», ustupajuć u siłu praz try miesiacy paśla aficyjnaha apublikavańnia, heta značyć u krasaviku 2021 hoda. Prava prypyniać pravierku na termin zvyš troch miesiacaŭ źjaviłasia ŭ śledstva adrazu paśla aficyjnaha apublikavańnia zakona, heta značyć paśla 13 studzienia 2021 hoda.
Advakaty źviartajuć uvahu, što šaścimiesiačny termin z momantu padziej 9-12 žniŭnia 2020 hoda pavinny skončycca 9-12 lutaha 2021 hoda.
