Bieraściejca asudzili da dvuch hadoŭ «chatniaj chimii» za repost dopisa pra kamandzira AMAPa
U Breście 6 studzienia byŭ vyniesieny prysud pa artykule 188 KK (Paklop) u dačynieńni da 28-hadovaha bieraściejca Maksima Śmirnova za repost u telehram-kanale pra kamandzira atrada AMAP UUS Bresckaha abłvykankama Maksima Michoviča. Paciarpieły amapaviec prasiŭ sud stroha nie karać abvinavačanaha, matyvujučy heta tym, što «Alaksandr Łukašenka abviaściŭ 2021 hod Hodam narodnaha adzinstva».
Sud Maskoŭskaha rajona Bresta pakaraŭ chłopca dvuma hadami abmiežavańnia voli biez nakiravańnia ŭ vypraŭlenčuju ŭstanovu adkrytaha typu, paviedamlaje spring96.org.
Pavodle abvinavačvańnia, Maksim Śmirnoŭ ranicaj 14 vieraśnia 2020 hoda z dapamohaj svajho mabilnaha telefona raźmiaściŭ u adnym z rehijanalnych telehram-kanałaŭ infarmacyju asabistaha charaktaru pra kamandzira Bresckaha AMAPa Maksima Michoviča. Infarmacyja supravadžałasia tekstam, «jaki źmiaščaŭ paklopnickija, iłžyvyja i hańbickija supracoŭnika milicyi źviestki».
Da Maksima Śmirnova da suda była prymieniena miera strymańnia — padpiska ab niavyjeździe i naležnych pavodzinach. U sudzie abvinavačany całkam pryznaŭ svaju vinu, skazaŭ, što raskajvajecca, i ŭ zale suda paprasiŭ prabačeńnia ŭ paciarpiełaha.
Paciarpieły Maksim Michovič paprasiŭ sud stroha nie karać abvinavačanaha, matyvujučy heta tym, što «Alaksandr Łukašenka abviaściŭ 2021 hod Hodam narodnaha adzinstva». Materyjalnych pretenzij da abvinavačanaha paciarpieły nie pradjaŭlaŭ.
Prakuror prapanavaŭ pakarać bieraściejca za paklop dvuma hadami abmiežavańnia voli z nakiravańniem u vypraŭlenčuju ŭstanovu adkrytaha typu. Ale sudździa Maskoŭskaha rajona Bresta Jaŭhien Brehan pakaraŭ chłopca dvuma hadami abmiežavańnia voli biez nakiravańnia ŭ vypraŭlenčuju ŭstanovu adkrytaha typu, piša «Bresckaja Viasna».
Jak zaŭvažyła bresckaje vydańnie «Binokl», kamandzir bresckaha AMAPu Maksim Michovič značycca ŭ sankcyjnym śpisie Jeŭrapiejskaha Sajuza. Sankcyi ŭ dačynieńni da jaho ŭviedzienyja «za kampaniju represij i zapałochvańnia, jakaja pravodzicca siłami AMAP u Breście paśla prezidenckich vybaraŭ 2020 hoda, u pryvatnaści za advolnyja aryšty i žorstkaje abychodžańnie ź mirnymi demanstrantami».
