Biełarusku sa Šviejcaryi sudziać za nibyta sarvanuju ź milicyjaniera bałakłavu
Treciaha śniežnia pačynajecca sud nad biełaruskaj sa Švajcaryi Natallaj Chierše, jakuju abvinavačvajuć u supraciŭleńni supracoŭniku milicyi pry vykanańni im słužbovych abaviazkaŭ. Pavodle aficyjnaj versii, Natalla źniała bałakłavu ź milicyjanta, za heta na jaje i zaviali kryminalnuju spravu, piša «Radyjo Svaboda».
Biełaruska Natalla Chierše stała žyvie ŭ Švajcaryi ciaham 12 hadoŭ. Tam ža žyvuć jaje darosłyja dzieci. Kali sarvaŭsia adpačynak, jaki Natalla z mužam Robertam chacieła pravieści ŭ ciopłych krainach, vyrašyła pryjechać na radzimu i pabačyć na ŭłasnyja vočy, što adbyvajecca ŭ Biełarusi. Pasialiłasia ŭ Miensku ŭ siabroŭki. Chadziła na akcyi pratestu ŭ Miensku i Maładečnie, dzie žyvie jaje brat Hienadź. Planavała pahaścić na radzimie paru tydniaŭ, a zastałasia tut nadoŭha.
Zatrymali spačatku na 15 sutak, paśla zaviali kryminalnuju spravu
Natallu Chierše zatrymali na žanočym maršy 19 vieraśnia ŭ Miensku. Tady kala handlovaha centru «Ajsberh» na skryžavańni vulic Surhanava i Jakuba Kołasa byli žorstkija zatrymańni žančyn. Natalla — asoba vielmi jarkaja, jana trapiła na fota karespandentaŭ z razhornutym bieł-čyrvona-biełym ściaham.
Spačatku žančynu pasadzili na 15 sutak pavodle artykułu 23.34 — za ŭdzieł u niesankcyjanavanym mierapryjemstvie. Źmiaścili na Akreścina. A potym zaviali kryminalnuju spravu za supraciŭ supracoŭniku ŭnutranych spraŭ z prymianieńniem hvałtu (artykuł 363.2 Kryminalnaha kodeksu) — za toje, što jana nibyta sarvała bałakłavu z amapaŭca. Amal dva miesiacy žančyna praviała ŭ žodzinskaj turmie №8, a tydzień tamu, pierad sudom, Natallu Chierše pieraviali ŭ mienski SIZA №1 na Vaładarskaha.
U «Vaładarcy» šaściora — u kamery na čaćviarych
Pra heta raskazaŭ «Svabodzie» brat Natalli Hienadź, jaki žyvie ŭ Maładečnie. Raniej jon pracavaŭ doktaram, ciapier u farmaceŭtyčnaj kampanii.
«Trymajecca Natalla vielmi stojka. Sapraŭdnaja zmaharka — jak Maryja Kaleśnikava, ź jakoj siastra pierasiakałasia ŭ žodzinskaj turmie.
Umovy na Vaładarcy jašče horšyja, čym u Žodzinie. Kamera raźličanaja na čatyry čałavieki, a ŭ joj trymajuć šeść. Piać žančyn kurać, a Natalla nie. I dla jaje heta vielmi ciažka. Pra heta mnie raskazała siońnia advakatka, jakaja naviedała siastru apošni raz pierad sudom», — kaža Hienadź.
Spačatku z Natallaj pracavała adna advakatka, ale jana zachvareła na COVID-19 i pieradała spravu svajoj kalažancy (taksama ź Mienskaj abłasnoj kalehii advakataŭ), praciahvaje Hienadź.
«Jany vielmi dobra paładzili, novaja advakatka ŭžo dvojčy za apošni tydzień sustrakałasia z Natallaj u SIZA na Vaładarskaha.
Litaralna hadzinu tamu ja ź joj razmaŭlaŭ. Advakatka kaža, što razmova była vielmi kanstruktyŭnaja, jany razam vypracavali taktyku dla sudu», — paviedamiŭ Hienadź.
Kali listy stali bolš-mienš stabilna dachodzić i inšaj infarmacyi nijakaj nie było, ja pačaŭ pisać vielmi doŭhija listy, časam na biełaruskaj movie. Apošni list byŭ na 8 staronkach farmatu A4. Zaŭsiody adpraŭlaju ich zakaznymi. Dyk voś, u apošni dzień u Žodzinie ŭ kameru pryjšoŭ turemnik i paviedamiŭ, što Natalli pryjšła zakaznaja karespandencyja. A jaje samoj u toj momant u kamery nie było, jaje paviali ŭ ambulatoryju.
Kali Natalla viarnułasia, susiedki abradavali jaje, što pryjšło dva listy. Ale ŭ vyniku Natalli tak i nie addali ich. Jana vielmi zasmuciłasia i mnie ŭ apošnim liście z žodzinskaj turmy napisała, što heta svavola i ździek. A voś ci dachodziać na Vaładarku maje listy, ja nia viedaju», — kaža brat Natalli. Brat spadziajecca na sudzie ŭpieršyniu za apošnija dva z pałovaj miesiacy ŭbačyć siastru. Maryć pieradać joj knihu Orueła «1984».
