Mitrapalit Kandrusievič maliŭsia kala Vostraj Bramy i vystupiŭ z šeraham zajaŭ
21 listapada Mitrapalit Tadevuš Kandrusievič słužyŭ Imšu ŭ vilenskim kaściole śviatoj Terezy (pry Vostraj Bramie), piša «Radyjo Svaboda». Na pačatku słužby jon zaklikaŭ malicca za Biełaruś, jakaja «pieražyvaje niabačny hramadzka-palityčny kryzis, jaki praciahvajecca bolš za try miesiacy, jakomu nia bačna kanca i jaki moža zaviaršycca hramadzianskaj vajnoj».
«My viedajem, što takoje padzielenaje hramadztva, jano budzie źniščana, jak kaža Jezus Chrystos. A my chočam, kab naša Baćkaŭščyna žyła i była ščaślivaj. My suprać hvałtu, suprać niapraŭdy, suprać niespraviadlivaści i ŭsio heta asudžajem. Ale musim ź luboŭju stavicca da kožnaha čałavieka, umieć prabačać tym, chto robić zło. Heta nialohka, ale treba suzirać kryž Jezusa Chrysta, jaki skazaŭ: «Ojča, prabač im, bo nia viedajuć, što robiać!» — zaznačyŭ katalicki hierarch.
Jon ličyć, što treba prasić u Boha łaski, kab u hramadztvie panavaŭ hałoŭny zakon — lubovi da Boha i bližniaha.
«Jaki b inšy byŭ śviet i naša kraina, kali b my žyli pavodle hetaha zakonu. My roznyja, ale pavinny być adzinymi ŭ žadańni ščaścia dla našaj Baćkaŭščyny», — zaklikaŭ Tadevuš Kandrusievič.
Amal try miesiacy jon žyvie za miažoj, u Polščy. Biełaruskija ŭłady nie puścili jaho na radzimu, pryznaŭšy pašpart niesapraŭdnym. U Vilni dla mitrapalita była druhaja imša na rodnaj biełaruskaj movie — pieršuju jon adsłužyŭ u Polščy. «Tamu ja vielmi rady, što, niahledziačy na składanyja abstaviny, vas sabrałasia tut niamała», — źviarnuŭsia jon da viernikaŭ.
