Adzinaborac Alaksiej Kudzin nie źjaviŭsia ŭ sud u Maładziečnie. Jaho abjavili ŭ vyšuk
Alaksiej Kudzin padčas akcyi 10 žniŭnia. Fota Nastaśsi Utkinaj
Siońnia ŭ maładziečanskim sudzie pavinna adbycca pieršaje pasiadžeńnie pa spravie adzinaborca Alaksieja Kudzina. Kudzina abvinavačvajuć pa častcy 2 artykule 363 Kryminalnaha kodeksa — «Supraciŭleńnie supracoŭniku orhanaŭ unutranych spraŭ abo inšaj asobie, jakija achoŭvajuć hramadski paradak». Maksimalnaja sankcyja — da piaci hod pazbaŭleńnia voli, paviedamlaje Rehijanalnaja hazieta.
Kudzina zatrymali ŭ žniŭni, jon pravioŭ niekalki tydniaŭ u śledčym izalatary ŭ Žodzinie. Paśla jaho pieraviali pad chatni aryšt 21 žniŭnia.
Na pasiadžeńnie Kudzin nie źjaviŭsia. Dziaržaŭny abvinavaŭca Alena Bałocina skazała, što biez abvinavačvanaha raźbiralnictva praciahvać niemahčyma. Sudździa Volha Dubovik pastanaviła prymusova dastavić jaho da 14:30.
Žonka kaža, što Kudzin pajechaŭ u sud
Paśla dźviuch hadzin pasiadžeńnie praciahnułasia. Sudździa Dubovik atrymała rapart ad supracoŭnika Maładziečanskaha RAUS. U im milicyjanier napisaŭ, što pryjechaŭ dadomu da Alaksieja Kudzina, ale jaho tam nie było. Žonka Kudzina skazała, što ranicaj muž paviedamiŭ, što źjazdžaje ŭ sud. Bolš jana jaho nie bačyła, na telefon nie adkazvaje.
Kudzina abjavili ŭ vyšuk
Sudździa Dubovik źmianiła mieru strymańnia z chatniaha aryštu na zaklučeńnie pad vartu.
Alaksieja Kudzina aficyjna abjavili ŭ vyšuk.
Sudździa adznačyła, što Kudzina (kali jaho znojduć) buduć utrymlivać u SIZA ŭ Žodzinie. Pakul kryminalnaja sprava prypynienaja.
