«Daśviedčany» Łukašenka — «niaśpiełamu» Makronu: Zajmisia spravami Francyi
Łukašenka adkazaŭ prezidentu Francyi Emanuelu Makronu na zajavy datyčna situacyi ŭ Biełarusi. BiełTA pacikaviłasia ŭ pres-sakratara Łukašenki Natalli Ejsmant jaho reakcyjaj na niadaŭnija zajavy Makrona, zroblenyja im u intervju vydańniu Le Journal du Dimanche. Jon, u pryvatnaści, vykazaŭ mierkavańnie, što ŭłada ŭ Biełarusi nie moža pryniać «łohiku demakratyi», byŭ uražany «mužnaściu pratestujučych» i zrabiŭ vysnovu, što «Alaksandr Łukašenka pavinien syści ŭ adstaŭku».
Voś, što adkazaŭ Łukašenka:
«Pieršaje. Jak prezident krainy, zychodziačy z pryncypaŭ samoha spadara Makrona (zakładzienych u jaho zajavie-pryzyvie syści ŭ adstaŭku), chaču skazać, što sam prezident Francyi, pa ŭłasnaj łohicy, pavinien byŭ by syści ŭ adstaŭku jašče dva hady tamu — kali na vulicy Paryža tolki pačali vychodzić «žoŭtyja kamizelki». Hady iduć, «kamizelki» da hetaha času na vulicach, spadar Makron na ździŭleńnie taksama dahetul na pasadzie, a Francyja stała krainaj, dzie masavyja pratesty stali zvykłaj źjavaj…
Akramia «žoŭtych kamizelek» taksama varta zhadać prablemy Francyi, što pieryjadyčna ŭźnikajuć z rucham BLM i musulmanskija pratesty ŭ Marsieli i Lijonie.
Padsumavaŭšy ŭsio heta, Minsk žestam dobraj voli hatovy prapanavać siabie ŭ jakaści ŭniviersalnaj pieramoŭnaj placoŭki, što dakazała svaju efiektyŭnaść — dla mirnaj pieradačy ŭłady luboj z vyšejnazvanych hrup.
Druhoje. Jak vopytny palityk — niaśpiełamu — chaču paraić spadaru Makronu mienš hladzieć pa bakach i zamiest hetaha zaniacca, narešcie, unutranymi spravami Francyi. Chacia b pačać vyrašać prablemy, jakich u krainie było niamała.
I, narešcie, jak čałaviek chaču adznačyć, što, jak zdajecca nam tut, u Biełarusi, Emanuel Makron zanadta šmat uvahi nadaje adnamu z eks-kandydataŭ u prezidenty Biełarusi. Z ulikam taho, što hety eks-kandydat — dama, francuzski lidar ryzykuje da ŭnutranych prablem Francyi atrymać jašče i asabistyja — u siabie doma».
