Hienprakuratura pahražaje zasnavalnikam «Hołasa» štrafam u 540 rubloŭ
Hienprakuratura prakamientavała stvareńnie anłajn-płatformaŭ «Hołas» i Zubr.in dla alternatyŭnaha padliku hałasoŭ, a taksama zakliki da fatahrafavańnia vybarčych biuleteniaŭ i adpraŭleńnie ich na alternatyŭnyja placoŭki. U viedamstvie zajavili, što płatformy zajmajucca praviadzieńniem sacyjałahičnych apytańniaŭ i daśledavańniaŭ biez akredytacyi.
Hienprakuratura zajaŭlaje, što vyklučnaje prava arhanizacyi apytańniaŭ hramadskaj dumki i sacyjałahičnych daśledavańniaŭ, akredytacyi jurydyčnych asob dla ich praviadzieńnia pradastaŭlena kamisii pa apytańniach hramadskaj dumki pry Nacyjanalnaj akademii navuk.
«Arhanizatary anłajn-płatformaŭ «Hołas», Zubr.in nie majuć akredytacyi na zbor i interpretacyju nazvanaj sacyjałahičnaj infarmacyi».
Tam taksama vykazali zdahadku, što praviadzieńnie padobnych anłajn-apytańniaŭ moža paciahnuć za saboj niepravamiernaje atrymańnie ich arhanizatarami i trecimi asobami piersanalnych źviestak hramadzian, što moža stać faktaram, jaki spryjaje ich razhałašeńniu biez zhody ŭładalnikaŭ infarmacyi.
— Pry ŭstanaŭleńni faktaŭ praviadzieńnia hramadzianami, naziralnikami niepravamiernych apytańniaŭ hramadskaj dumki, jakija adnosiacca da hramadska-palityčnaj situacyi ŭ krainie, vybaraŭ prezidenta Biełarusi, biez atrymańnia adpaviednaj akredytacyi majucca padstavy dla pryciahnieńnia ich da administracyjnaj adkaznaści pavodle art. 9.28 KaAP, — paviedamili ŭ Hienprakuratury. Tam taksama nahadali, što sankcyi pa hetym artykule praduhledžvajuć štraf u pamiery da dvaccaci bazavych vieličyń (540 rubloŭ), a na jurydyčnuju asobu — da sta bazavych vieličyń (2700 rubloŭ).