Łukašenka: Niekatorych zatrymali z amierykanskimi pašpartami
Pra heta Alaksandr Łukašenka zajaviŭ siońnia na naradzie pa vybarach, piša BiełTA.
Pavodle jaho słoŭ, u Biełarusi ŭžo zatrymali niamała ludziej, jakija — i heta ŭžo dakazana — stavili pierad saboj metaj destabilizavać abstanoŭku ŭ krainie. I havorka daloka nie tolki ab zatrymańni členaŭ PVK.
«Viadomyja imiony, proźviščy, adrasy, paroli, jaŭki. Da cudaŭ časam dachodzić. ŚMI naściarožvajuć nas, što nas tut chočuć zachapić amierykancy, nataŭcy. Niekatorych ludziej zatrymali z amierykanskimi pašpartami, žanatych na amierykankach, jakija pracujuć u Dziarždepie. Ale sa štykami napieravies ich abaraniajuć rasijskija kiraŭniki», — skazaŭ Łukašenka.
Jon adznačyŭ, što ŭ hetych chitrasplacieńniach usio vyrašajuć hrošy i prynaležnaść da toj ci inšaj krainie abo partyi nie maje značeńnia. «Nie važna, amierykaniec, dziarždepaviec, prynaležnaść u ciabie da demakratyčnaj partyi… Udzielničali ŭ pieradvybarnaj kampanii ŭ Rasii, atrymali za heta dobryja hrošy. Siońnia chajpujucca (chajpavalisia) na terytoryi Biełarusi. Ja dumaju: amierykancy pačnuć ich ciapier abaraniać. Ničoha padobnaha, — zaŭvažyŭ Łukašenka. — Hrošy zaściłajuć vočy, pazielanieli ad hetych hrošaj: chto płacić, za taho i śpiavajuć. Voś adzinaja razhadka. I ŭ nas takich ludziej niamała».
Viadoma, što byŭ zatrymany palittechnołah Vital Šklaraŭ. Paviedamlajecca, što ŭ jaho amierykanski dyppašpart. Jaho žonka — hramadzianka ZŠA, pracuje ŭ pasolstvie ŭ Kijevie.
