«Ruki ŭharu»? Ale ž Łukašenka sam padpisaŭ Sajuznuju dziaržavu»
Pra zajavy pasła Siamaški piša ŭ fejsbuku Jahor Lebiadok.
Ambasadar Biełarusi ŭ Rasiei Uładzimir Siamaška ŭčora zajaviŭ: «A ŭ tym dakumiencie [płanie dalejšaj intehracyi z Rasiejaj], jaki nam 13 lutaha 2019 hoda prapanavali [rasiejcy, jakich ambasadar nie nazvaŭ], ja naličyŭ 95% funkcyj nadnacyjanalnych».
Čytajcie taksama. Siamaška: Rasija prapanoŭvała Biełarusi pieradać na nadnacyjanalny ŭzrovień 95% paŭnamoctvaŭ
Zdavałasia b, pra takuju prapanovu treba było b paviedamić hramadzianam Biełarusi. Ale nie, jak zaŭsiody hramadzian Biełarusi nie pytajucca, jak nie pytalisia zhody hramadzian na ŭstupleńnie Biełarusi ŭ niejkuju Sajuznuju dziaržavu (pytańnie na refierendumie 1995 hoda było tolki ab padtrymcy dziejańniaŭ prezidenta Respubliki Biełaruś, nakiravanych na ekanamičnuju intehracyju z Rasiejaj, pryčym pytańnie sfarmulavana tak, što razumieć jaho chutčej jak adabreńnie prymanych na toj momant dziejańniaŭ, a nie ab dalejšych płanach).
Bolš za toje, 1 sakavika 2019 hoda (usiaho praz dva tydni paśla zhadanaj prapanovy «ruki ŭvierch», jak nazvaŭ jaje Uładzimir Siamaška) Łukašenka zajaviŭ: «Nijakich zamašak z boku, prynamsi, prezidenta Rasiei, što Biełaruś treba inkarparavać ci ŭklučyć u skład Rasiei, ja ni razu nie čuŭ, navat nastroju takoha nie było. Niama nijakich namieraŭ u vialikaj krainy pahłynuć Biełaruś. …Isnujuć peŭnyja orhany [SD], jakija vałodajuć vialikimi paŭnamoctvami dla vyrašeńnia pytańniaŭ. Davaj pytańni, jakija siońnia chvalujuć ludziej, vyrašać na vyšejšym dziaržsaviecie».
Alaksandr Łukašenka ŭ svaich pramovach dosyć časta abvinavačvaje Rasieju, ale nie naŭprost, a abo vykarystoŭvajučy pustyja słovy nakštałt «jany», abo namiokami ŭ toj čas na Dźmitryja Miadźviedzieva abo nienazvanych aliharchaŭ, jak niadaŭna. Ale nikoli praktyčna Uładzimira Pucina. I heta zaŭsiody vyhladaje kamična: chtości surjozna miarkuje, što ŭ Rasiei niejkija hrupy abo aliharchi mohuć vieści zamiežnuju palityku ŭ važnym rehijonie bieź viedama i sankcyi Pucina i jaho, nazaviom tak, administracyi? Tak, roznyja ŭradavyja i niaŭradavyja hrupy mohuć być vykarystanyja dla praviadzieńnia nieabchodnych rasijskim uładam dziejańniaŭ (naprykład, tyja ž aliharchi ŭ padparadkavańni kampanii suprać Ukrainy), ale jany nie subjekty takich kampanij. I całkam zrazumieła, čamu Łukašenka tak siabie pavodzić: vykazvańnie pa asobie Uładzimira Pucina pahražaje vielmi surjoznymi nastupstvami dla asabistaj ułady.
Viartajučysia da kamientaroŭ Siamaški, dy i Łukašenki, pra nibyta adnabakovaje ŭzrastajučaje žadańnie RF pavieličeńnia abjomu nacyjanalnych funkcyj, jakija pieradajucca ŭ nadnacyjanalnyja orhany. U hetym vypadku možna tolki parekamiendavać padpisantu dakumienta ab stvareńni Sajuznaj dziaržavy Alaksandru Łukašenku i jaho ambasadaru pačytać uvažliva, što jon padpisaŭ. Faktyčna rasiejcy nie patrabujuć bolš za toje, što tam napisana. I ciapier kazać, maŭlaŭ, rasiejcy nas chočuć pahłynuć, a Łukašenka adbivajecca jak moža, prosta śmiešna — jon sam naŭmysna i śviadoma stvaryŭ takuju situacyju i vychodzić ź jaje nie maje namieru, inakš my b z 2019 hoda rychtavali refierendum ab vychadzie z SD, pry hetym zusim nie abaviazkova denansavać usie ekanamičnyja i nie tolki pahadnieńni ŭ ramkach hetaha ŭtvareńnia. Ale navat siońnia nie raskryvajuć dla hramadzian tak zvanyja darožnyja karty «pahłyblenaj intehracyi», što całkam abhruntavana vyklikaje aściarohu ab ich značeńni dla suvierenitetu Biełarusi. Darečy, rasiejcy ŭličyli dośvied spynieńnia dziejańnia SSSR i śpiecyjalna ŭviali normu ŭ nazvanuju damovu, što vyjści ź jaje možna tolki pravioŭšy refierendum, choć, jak ja pisaŭ vyšej, nichto nie pravodziŭ refierendum pa ŭstupleńni ŭ SD.
Chaču taksama źviarnuć uvahu čytačoŭ, što samy pieršy artykuł damovy ab stvareńni SD abviaščaje: «Respublika Biełaruś i Rasiejskaja Fiederacyja stvarajuć Sajuznuju dziaržavu, jakaja aznačaje saboj novy etap u pracesie jadnańnia narodaŭ dźviuch krain u demakratyčnuju pravavuju dziaržavu».
Jak bačycie, havorka nie pra stvareńnie sajuza dziaržaŭ (jak, naprykład, ES, ź jakim Siamaška pravodziŭ paraŭnańnie i ŭ jakim možna było b kazać pra pracent pieradačy suvierennych paŭnamoctvaŭ). A havorycca pra adnu dziaržavu, u jakoj, naturalna, i orhan kiravańnia adzin. Voś i ŭsio. Usie astatnija zajavy ab chodzie intehracyi, ab roŭnych umovach i h.d. biessensoŭnyja. Meta damovy ab SD — adna dziaržava — apryjory nivieliruje suvierenitet Biełarusi. Hetuju metu razumieŭ i razumieje Alaksandr Łukašenka, jaki ciapier imituje ź siabie zmahara za zachavańnie niezaležnaści Biełarusi.
