Žančyna z-pad Žłobina stvaryła fejkavyja staronki ŭ sacsietkach i vyciahvała hrošy ŭ mužčyn
Imknieńnie da «lohkich hrošaj» daviało 41-hadovuju žycharku Žłobinskaha rajona da kryminalnaha artykuła za bujnoje machlarstva, piša mvd.gov.by.
Na praciahu niekalkich hadoŭ žančyna padmanvała dvuch mužčyn, atrymlivajučy ad ich hrošy na vyrašeńnie vydumanych žyćciovych prablem. Dla adnaho z paciarpiełych aficyjnaja suma škody skłała amal 7 tysiač rubloŭ. Praŭda, 39-hadovy žychar Śvietłahorska zapeŭnivaje, što pieraličyŭ virtualnaj surazmoŭnicy značna bolš.
Jašče adnoj achviaraj pierapiski na sajcie znajomstvaŭ staŭ žychar Minskaha rajona.
— U sacyjalnaj sietcy i na sajcie znajomstvaŭ padazravanaja stvaryła psieŭdaakkaŭnty maładoj dziaŭčyny ź Śvietłahorska, adkrytaj da znosin z procilehłym połam. Dla bolšaj pryvabnaści žančyna azdobiła ankietu fatahrafijami pryhožaj nieznajomki ź internetu. U pačatku znosin paciarpieły sa Śvietłahorska dobraachvotna pieravodziŭ joj hrošy — na pradukty charčavańnia albo na apłatu mabilnaj suviazi. Padman pačaŭsia, kali ŭ adnoj z razmoŭ žančyna paprasiła akazać finansavuju dapamohu ŭ lačeńni ciažkaj chvaroby, raspaviali ŭ Žłobinskim RAUS.
Spačatku jana narakała na chrypły hołas i vykazała zdahadku, što ŭ jaje rak horła. Mužčyna pahadziŭsia apłacić spačatku dyjahnostyku, a zatym i lačeńnie, pieraličyŭšy patrebnyja sumy na kartu padazravanaj. Šmatlikija pieravody varjiravalisia ad 10 da 900 rubloŭ.
Paśla fihurantka paprasiła ŭ jaho hrošy nibyta na afarmleńnie spadčyny ŭ vyhladzie kvatery i doma. Nieruchomaść płanavałasia pradać, a častku vyručki vykarystoŭvać na pahašeńnie daŭhoŭ. Pazykadaviec znoŭ pavieryŭ.
Ciaham 2016-2019 žančyna vydumała šmat roznych nahodaŭ dla vymantačvańnia hrošaj, u tym liku apłata kamunalnych pasłuh i kupla praduktaŭ charčavańnia, a potym pierastała vychodzić na suviaź. Vyśvietliłasia, što anałahičnuju schiemu jana ažyćciaviła raniej z 23-hadovym žycharom Minskaha rajona. Pry hetym ni z adnym z paciarpiełych jana ni razu nie sustrełasia — kamunikavała pa telefonie i ŭ siecivie.
Usie hrošy padazravanaja vydatkavała na siabie i svaich dziaciej.
