«Muž pracuje, ja pryhožaja»: što viadoma pra druhija pałovy patencyjnych kandydataŭ u prezidenty
Ajcišnicy, błohiery, biznesoŭcy… «Naša Niva» sabrała cikavyja fakty pra spadarožnikaŭ i spadarožnic patencyjnych kandydataŭ u prezidenty.
Siarhiej Cichanoŭski
Palityčny błohier, na čyj kanał «Strana dla žiźni» padpisana ŭžo bolš za 220 tysiač čałaviek, sam musiŭ stać kandydatam. Ale paśla taho jak CVK admoviŭ jamu ŭ rehistracyi inicyjatyŭnaj hrupy, źbiraje podpisy za žonku. Pryčym vielmi paśpiachova — tysiačy čałaviek vystrojvajucca ŭ čerhi, kab addać za Cichanoŭskich svoj hołas.
Fota Nadziei Bužan
41-hadovamu pradprymalniku z Homiela naležyć studyja pa vytvorčaści videakantentu «Kompas», jakaja zdymaje rekłamu. Svoj błoh Cichanoŭski viadzie ź minułaha hoda. Jeździŭ z aŭtadomam pa rehijonach i ładziŭ «adkryty mikrafon», u jaki kožny moh vykazacca.
Sama Śviatłana pakul redka vystupaje na publicy i ad intervju admaŭlajecca. Joj 38 hod, pa adukacyi — vykładčyca i pierakładčyca z anhielskaj movy. Na hety momant biespracoŭnaja. Žyvie ŭ Minsku z dvuma dziećmi.
Fota z Facebook
Vieranika Capkała
Žonka Valeryja Capkały supravaždaje jaho va ŭsich pajezdkach. U intervju Tut.by jana raskazvała, što pakazvacca na publicy ź siamjoj dla palityka — narmalnaja mižnarodnaja praktyka, jakuju varta było b pieraniać i biełaruskim čynoŭnikam.
«Ludzi chočuć bačyć, chto znachodzicca pobač z kiraŭnikom krainy. Dumaju, što i ŭ našaj krainie mnohija chočuć bačyć paŭnacennuju siamju», — razvažała jana.
Vieranika Capkała rodam z Mahilova. Skončyła fakultet mižnarodnych adnosin BDU, paśla — Vyšejšuju škołu kiravańnia i biznesu BDEU. Pracavała ŭ Velcom, kanadskaj kampanii Teleglobe.
Apošnija 10 hod pracuje ŭ kampanii Microsoft — kiraŭnikom pa raźvićci ŭ mižrehijanalnym ofisie (takaja infarmacyja paznačana ŭ jaje profili na Linkedin).
«Śpiecyjalna iści ŭ IT nie płanavała, navat nie dumała, tak syšlisia zorki», — patłumačyła jana «Našaj Nivie», čamu abrała śfieru vysokich technałohij.
Fota Nadziei Bužan
Z mužam jany razam 20 hod. Vychoŭvajuć dvuch synoŭ. Vieranika ŭspaminaje, jak paznajomiłasia z Valeryjam:
«Na apošnim kursie ŭniviersiteta prachodziła pieraddypłomnuju praktyku ŭ Ministerstvie zamiežnych spraŭ. U adzin ź pieršych dzion praktyki mianie paprasili adnieści dakumienty ŭ adno z upraŭleńniaŭ MZS. Ja išła pa kalidory, kali ŭbačyła maładoha mužčynu, jaki išoŭ nasustrač i dapamoh znajści patrebny kabiniet.
Tady ja nie viedała ni jaho imia, ni pasady. Padziakavaŭšy, syšła. Praź niekalki miesiacaŭ my znoŭ vypadkova sustrelisia, ale na hety raz u kole ahulnych znajomych. Paśla hetaha my razam».
Elehantnaja błandzinka kaža, što ŭ jaje niama ikony stylu. Natchniajecca mocnymi žančynami, jakija zmahli źmianić žyćcio inšych, — Marharet Tetčer, Indziraj Handzi i Anhiełaj Mierkiel (ličyć jaje najlepšym kiraŭnikom Hiermanii paśla Druhoj suśvietnaj vajny). Ź biełarusak vyłučaje Darju Domračavu, Viktoryju Azaranku, Jeŭfrasińniu Połackuju i Śviatłanu Aleksijevič.
«Ale, kaniečnie, nie treba zabyvać, što žančyna, jakuju b vysokuju pasadu ci hramadskaje stanovišča jana ni zajmała, heta pierš za ŭsio maci, achoŭnica siamiejnaj utulnaści», — dzielicca Vieranika.
Taćciana Dźmitryjeva
Žonka lidara «Havary praŭdu!» Andreja Dźmitryjeva ź Dziaržynskaha rajona. Vučyłasia ŭ Minskim linhvistyčnym univiersitecie, ale karjeru źviazała ź inšaj śfieraj — pracuje ŭ IT-kampanii.
Fota z Facebook
Zamuž Taćciana vyjšła ŭ 30 hod. Dźmitryjeŭ raniej raskazvaŭ «NN», što jany paznajomilisia ŭ lifcie ofisnaha budynka. U pary dvoje synoŭ (plus u palityka jość starejšy syn ad pieršaha šlubu).
Fota z Facebook
Andrej Dźmitryjeŭ kaža, što žonka dapamahaje jamu padčas ciapierašniaj kampanii:
«Jana całkam uziała na siabie dom i dziaciej, kab ja moh biazvyłazna jeździć pa rehijonach. Vielmi joj udziačny».
Maryja Chodzič
U sacyjalnych sietkach žonka staršyni partyi «Hramada» Siarhieja Čeračnia adnaznačna bolš papularnaja za jaho — u jaje staronki ŭ instahram 40 tysiač padpisantaŭ. Efiektnaja błohierka lubić futra, sukienki-mini i jarki makijaž. Nie ŭpuskaje mahčymaści pachvalicca točanaj fihuraj u kupalniku i darahimi padarunkami, naprykład novieńkim Mercedes Benz.
Maryja z Kalinkavič. Ale jašče ŭ dziacinstvie siamja pierajechała ŭ Minsk. Tut jana skončyła škołu i ŭniviersitet, maje čyrvony dypłom (była najlepšaj na patoku) i śpiecyjalnaść psichołaha (ale nie pracavała pa joj).
Razam ź Siarhiejam jany 12 hadoŭ, hadujuć dačku Emiliju.
«Paznajomilisia my na Niamizie. Ja byŭ małady i nachabny, tamu i padyšoŭ», — raskazvaje «Našaj Nivie» pra pieršuju sustreču palityk.
Maryja — dačka biznesmiena Andreja Chodziča. Trymała sałon viasielnaj i viačerniaj mody «Marry me», jaki ŭ vyniku zakryŭsia.
«Daŭnieńka zakryli — nie praz karanavirus, a praz ahulnuju situacyju ŭ krainie. Bo viasielny biznes i sukienki, asabliva kali heta darahija kalekcyi, nie zapatrabavanyja ŭ Biełarusi. Ciapier novaja moładź, inšyja padychody, niama hetych pafasnych viasiellaŭ», — patłumačyŭ Siarhiej Čeračań.
Žonka ciapier zajmajecca saboj i dačkoj.
«Kožny mužčyna pavinien imknucca zrabić tak, kab kachanaja mahła zajmacca svaimi biahučymi spravami, siamiejnymi pytańniami», — dzielicca Siarhiej.
«U nas ščaślivaja siamja. Tata pracuje, mama — pryhožaja», — žartavała ŭ instahram sama Maryja pad fota z kurorta.
Vital Kisiel
Pra muža biznesvumen Natalli Kisiel viadoma mała. 26 hod jany ŭ šlubie, stolki ž viaduć sumiesny biznes ŭ śfiery hruzapieravozak. Vital — dyrektar firmy, žonka — jaho namieśnica. Majuć dvaich dziaciej.
Fota z Facebook
«My ščaślivyja, dzieci vyraśli ŭ lubovi. Vital — moj adziny partnior i ŭ biznesie. Liču heta dastatkovaj infarmacyjaj. Usio astatniaje — techničnyja momanty», — koratka raskazała Natalla Kisiel.
Alesia Hurskaja-Tabolič
Z muzykaj i tatuiroŭščykam Alesiem Taboličam jany ažanilisia ŭ 2010 hodzie. Viasielle ładzili pa biełaruskich tradycyjach minułaha stahodździa.
Alesia na 11 hod maładziejšaja za muža. Skončyła fiłfak BDU. Arhanizatarka Biełaruskaj intelektualnaj hulni i fiestyvala «Kupalskaje koła». Zdymałasia ŭ klipach hurta Znich. Alesia časta padarožničaje pa Biełarusi i dzielicca pryhožymi fota rodnych miaścin u instahramie.
Z mužam jany vychoŭvajuć maleńkuju dačku. Praŭda, sama Alesia niejak namiakała ŭ sacsietkach, što jany z Alesiem razychodziacca.
Čytajcie taksama:
Žonka zahinuła, dačka ŭ Aŭstralii. Što viadoma pra siamju Viktara Babaryki
