Žonki i mužy biełaruskich apazicyjanieraŭ: chto jany i čym zajmajucca?
«Naša Niva» pacikaviłasia siamiejnym žyćciom dziejačaŭ biełaruskaj apazicyi: chto tyja druhija pałovy, jakija stajać za śpinami kiraŭnikoŭ partyj i kandydataŭ u prezidenty?
Taćciana Dźmitryjeva
Žonka lidara «Havary Praŭdu!» Andreja Dźmitryjeva.
Paznajomilisia jany ŭ lifcie.
«My paznajomilisia ŭ lifcie ŭ ofisnym budynku. Ja zajšoŭ, i mnie padałosia, što jana mnie niešta skazała… ja da jaje źviarnuŭsia, nu i voś tak paznajomilisia, zaviazałasia razmova. A paśla jašče pačali bačycca praz moładź AHP: Taćciana im dapamahała, a ja byŭ sakratarom, była dobraja nahoda», — raspavioŭ «Našaj Nivie» Dźmitryjeŭ.
«Chto ŭ našaj siamji ŭvieś čas siamjoju zajmajecca, to tut vielizarnaja zasłuha Taćciany — majoj žonki, na jaje plačach šmat usiaho, i ja pierad joj u takim viečnym daŭhu… Zrazumieła, u mianie mahčymaściaŭ dla karjery bolš, čym u jaje. Maja žonka — heta i siabar, i partnior. My ź joj niadaŭna abmiarkoŭvali, što daŭno nie byli ŭ choć-jakich kłubach, tamu što kali jość dzieci, ty pa-inšamu pačynaješ hladzieć na adpačynak i na viečary. Ale ŭsie hetyja abmiežavańni nie źjaŭlajucca ciažaram. Jość paniaćcie «alternatyŭny košt» — vidavočna, heta i jość. My ź joj pažanilisia ŭ 30 hadoŭ, heta značyć, byŭ užo peŭny žyćciovy dośvied», — kazaŭ pra žonku Dźmitryjeŭ u hutarcy z madeljeram Varłamavym.
Siońnia ŭ Taćciany i Andreja dvoje synoŭ (Dźmitryjeŭ maje jašče adnaho darosłaha syna ad pieršaha šlubu).
«Taćciana — całkam samastojny i samadastatkovy čałaviek. Jana siońnia pracuje ŭ IT-kampanii, prodžekt-mieniedžaram», — raspavioŭ Andrej Dźmitryjeŭ.
Ina Kulej
Žonka byłoha kandydata ŭ prezidenty Alaksandra Milinkieviča. U ich — dvoje synoŭ.
Ina Kulej naradziłasia ŭ paleskaj vioscy Kruki, što ŭ Brahinskim rajonie, u siamji nastaŭnicy biełaruskaj movy i pijaniervažataha. Paźniej jaje baćka skončyŭ jurydyčny fakultet i ŭładkavaŭsia na pracu śledčym u Lachavičy, pierabraŭsia tudy ź siamjoj.
Sama Ina Kulej skončyła pieduniviersitet pa śpiecyjalnaści «defiektałohija». Pracavała ŭ adnoj z bresckich škoł. U 1990‑ia ŭznačaliła fond rehijanalnaha raźvićcia «Vieža», jaki abjadnoŭvaŭ i dapamahaŭ hramadskim arhanizacyjam Bresckaj vobłaści.
Paśla spadarynia Kulej uznačalvała kamitet dapamohi represavanym «Salidarnaść».
Była inicyjataram i kurataram prahramy Kalinoŭskaha, z dapamohaj jakoj biełaruskija studenty, jakija mieli prablemy z uładami praz svaju palityčnuju pazicyju, mahli atrymać vyšejšuju adukacyju ŭ Polščy.
«Vielmi važna, što ŭ nas z majoj pieršaj žonkaj i ź pieršym mužam Iny dobryja adnosiny. Kali my ŭ Harodni, to idziem da majoj žonki Natašy, pjom kavu, razmaŭlajem. Navat abdymajemsia pry Inie, surjozna vam kažu. I ŭsio całkam ščyra. A kali my ŭ Homieli, idziem da pieršaha muža Iny i da jaho siońniašniaj žonki. Inin muž z žonkaj byli ŭ nas na viasielli, a my ŭ ich. Usie siabry kažuć: brazilski sieryjał», — raskazvaŭ Alaksandr Milinkievič partału tut.by.
Paźniej prahrama Kalinoŭskaha była refarmavanaja. Ciapier jana padtrymlivaje nie studentaŭ, a tych, chto ŭžo maje vyšejšuju adukacyju i choča atrymać pracoŭny staž, pavysić kvalifikacyju, raspaviała «Našaj Nivie» Ina Kulej.
Sama spadarynia Ina pakinuła kamitet «Salidarnaść» dva hady tamu. Siońnia jana dyrektarka ahienctva «Tvajo zaŭtra», jakoje zajmajecca dapamohaj studentam.
«My adyšli ad kancepcyi «ŭciečka-viartańnie rozumaŭ» i vitajem sučasnuju kancepcyju «cyrkulacyja rozumaŭ». My pryznajem fakt mižnarodnaj mabilnaści biełarusaŭ jak častku akademičnaj mabilnaści i ličym biełaruskich studentaŭ, aśpirantaŭ i stažoraŭ, jakija vučacca ŭ zamiežnych univiersitetach, šmattysiačnym patencyjnym navukova-techničnym, kulturnym i hramadskim reziervam dla dla našaj krainy.
Naša meta — naładžvańnie navukovych, ekśpiertnych, kulturnych i arhanizacyjnych suviaziaŭ pamiž biełaruskaj akademičnaj dyjasparaj i Biełaruśsiu.
My dapamožam vam padvysić svoj navukovy i prafiesijny ŭzrovień i znajści pierśpiektyŭnaje miesca pracy na Radzimie», — havorycca na sajcie ahienctva.
«My zajmajemsia vypusknikami, u tym liku i kalinoŭcami, jakija ŭžo atrymali vyšejšuju adukacyju. Dapamahajem im atrymać novyja viedy, praktyku, znajści pracu, uładkavacca ŭ žyćci», — patłumačyła «Našaj Nivie» Ina Kulej.
Maryna Adamovič
Žonka Mikałaja Statkieviča.
«Naša znajomstva adbyłosia vielmi daŭno — na pačatku 90-ch. Pamiataju, siabry zaduryli mnie hałavu pra toje, jaki kłasny chłopiec Mikoła Statkievič. Upieršyniu my sustrelisia ŭ Domie litaratara na dni narodzinaŭ našaha ahulnaha siabra Mikoły Michnoŭskaha. Tam ja i ŭbačyła Statkieviča — kiraŭnika Biełaruskaha zhurtavańnia vajskoŭcaŭ. Mikoła — pryjazny, ź jarkimi błakitnymi vačyma, pryhožy mužčyna. Za niekalki tydniaŭ da taho jaho zvolnili z vojska. Nie pry samych lepšych abstavinach adbyłosia naša znajomstva. Jon zastaŭsia biez spravy, jakoj pryśviaciŭ žyćcio, ale vypramieńvaŭ dobrazyčlivaść i aptymizm.
Paśla my ź im sustrakalisia ŭ kole znajomych. U 1996-m ja stała siabram Biełaruskaj sacyjał-demakratyčnaj partyi, dapamahała jamu i partyi», — raskazvała Adamovič u intervju «Salidarnaści».
Da znajomstva sa Statkievičam Maryna 12 hadoŭ pracavała vykładčykam epidemijałohii ŭ miedycynskim univiersitecie. Paśla, pa jaje słovach, pracavała ŭ biznesie, paźniej — u pravaabarončaj arhanizacyi.
Siońnia Maryna Adamovič nie pracuje.
«Ciapier ja zajmajusia siamjoj. Z pravaabarončaj arhanizacyi ja ŭžo syšła. Što tyčycca inšaj pracy, to paśla 2010 hoda maje mahčymaści znajści pracu stali vielmi i vielmi abmiežavanymi», — paviedamiła «Našaj Nivie» Adamovič.
Łarysa Kastusiova
Žonka lidara partyi BNF Ryhora Kastusiova. Para razam amal 40 hadoŭ! Majuć traich darosłych dziaciej: dźviuch dačok i syna.
«Paznajomilisia na viasielli ŭ Ryhoravych svajakoŭ, niešta paciahnuła adno da adnaho. Vidać, tak losam było nakanavana… Jon tady vučyŭsia ŭ Horackaj akademii, času «raskačvacca» nie było, i miesiacy praz try jon zrabiŭ prapanovu. To-bok u mai my paznajomilisia, a ŭ lutym užo było viasielle», — raspaviadała «Radyjo Svaboda» Łarysa Kastusiova.
Kastusiova amal usio žyćcio zajmałasia dziećmi: pracavała vychavalnicaj, a paśla zahadčycaj dziciačaha sadka.
U apošnija hady pierad piensijaj Łarysa Kastusiova była vymušanaja zvolnicca z pracy: dahladała babulu, jakaja złamała šyjku ściahna.
Siońnia Łarysa Kastusiova ŭžo na piensii.
Śviatłana Labiedźka
Žonka šmathadovaha lidara Abjadnanaj hramadzianskaj partyi Anatola Labiedźki. Jon užo syjšoŭ z pasady, ciapier razhladaje pierśpiektyvy pracy ŭ hramadskich arhanizacyjach i zabaŭlajecca videazvarotami da Łukašenki.
Śviatłana rodam z Ašmianaŭ, raniej razam z mužam jany žyli ŭ jaje baćkoŭ. Paśla pierabralisia ŭ Minsk, kali Labiedźka staŭ deputatam Viarchoŭnaha Savieta.
«U siamiejnym płanie ja ščaślivy čałaviek. Kali Tola nie ŭ turmie, to kožnuju ranicu jon hatuje mnie kavu. Praŭda, ź ježy muž moža zrabić tolki jaječniu, adrezać chleba i kaŭbasy, nu i jašče razahreć pryhatavanaje. I što takoje pyłasos uziać u ruki, Tola taksama nie viedaje. Tamu my padzialajem hetyja abaviazki z synam», — kaliści raskazała pra svajo siamiejnaje žyćcio Śviatłana ŭ intervju «Narodnaj Voli».
Śviatłana pracavała nastaŭnicaj u škole, vykładała anhlijskuju movu.
«Hetym i zajmajecca pa siońnia. Usio jašče pracuje ŭ toj ža škole vykładčycaj anhlijskaj movy.
Prablem z pracaj praz maju palityčnuju dziejnaść žonka faktyčna nie mieła. Jana vielmi dobraja śpiecyjalistka, a kiraŭnictva škoły zaŭsiody było matyvavana, kab mieć dobraha śpiecyjalista ŭ štacie, — raspavioŭ «Našaj Nivie» Anatol Labiedźka. — Tak, žonkaj cikaviŭsia KDB, raspytvali ŭ škole pra jaje, ale cisku nikoli nie było.
Jašče cikavy taki fakt: nivodnaha nastaŭnika ź jaje škoły, nakolki ja viedaju, nie ŭklučali ŭ skład vybarčych kamisij, zaŭsiody pryvozili ŭ ich škołu inšych ludziej».
Nasta Daškievič (Pałažanka)
Žonka aktyvista i byłoha palitviaźnia Źmitra Daškieviča.
Siońnia jana ŭ dekrecie, niadaŭna ŭ Daškievičaŭ naradziłasia dačka. Heta treciaje dzicia ŭ siamji.
Historyja kachańnia Nasty i Źmitra, kaniečnie, uražvaje. Jany byli znajomyja doŭhi čas, ale ažanilisia, pakul Daškievič byŭ za kratami, asudžany paśla Płoščy-2010. Spačatku štamp pastavili Naści — u ZAHSie, paśla jany z supracoŭnicaj pajšli ŭ hrodzienskuju turmu. Śviedkami na cyrymonii byli pracaŭniki kałonii. Paśla cyrymonii maładym dazvolili pieršaje 10-chvilinnaje spatkańnie.
Akramia vychavańnia dziaciej, enierhičnaja Nastaśsia Daškievič paśpiavaje dapamahać mužu ŭ mieniedžmiencie pradpryjemstva i absłuhoŭvańni klijentaŭ, a taksama aktyŭničaje ŭ carkvie i roznych hramadskich inicyjatyvach, siarod jakich kampanija pa padtrymcy biełaruskaj kultury «Budźma biełarusami».
Volha Sieviaryniec
Žonka palityka, piśmieńnika i chryścijanina Paŭła Sieviarynca.
Para paznajomiłasia ŭ 2009 hodzie, u 2014 — ažanilisia.
Volha, jak i Pavieł, ščyraja chryścijanka, tolki z katalickaj siamji. Jana rodam z Pastaŭskaha rajona, paśla vučyłasia ŭ Minsku, skončyła fiłfak BDU.
Raniej Volha vykładała polskuju movu ŭ Centry słavianskich movaŭ i kultur. Siońnia jana ŭ dekrecie, dahladaje małoje dzicia. Ale praciahvaje pracavać.
«U nas ža chryścijanskaja internet-krama kroplia.by: ja tam i dyrektar, i kasir, i buchhałtar», — śmiajecca Volha.
Ci prynosić krama prybytak?
«Jana pakul maleńkaja, troški prynosić, ale hrošy, jakija atrymlivajem, układvajem nazad u biznes. Da taho ž ja atrymlivaju tolki pałovu dekretnych hrošaj, bo ŭ mianie adkryta IP — takija ŭ nas zakony. Tamu, možna skazać, što našaja krama — heta nie stolki biznes, kolki paklikańnie», — raspaviała «Našaj Nivie» Volha Sieviaryniec.
Nastaśsia Hubarevič
Žonka Juryja Hubareviča, lidara Ruchu «Za Svabodu!».
Nastaśsia ŭžo daŭno pracuje ŭ Biełaruskim dziaržaŭnym univiersitecie infarmatyki i radyjoelektroniki inžynieram kafiedry IT.
Juraś Hubarevič uzhadaŭ znajomstva z žonkaj:
«My paznajomilisia ŭ Viarchoŭnym sudzie ŭ časie pracesu pa spravie rehistracyi Svabodnaha prafsajuza studentaŭ «Salidarnaść», dzie ja pradstaŭlaŭ pazicyju prafsajuza, jaki atrymaŭ admovu ŭ rehistarcyi ad minjusta, a Nastaśsia (Stasia) była nakiravana ad redakcyi haziety «Rabočy» aśviatlać praces».
U intervju «Biełaruskamu partyzanu» Hubarevič skardziŭsia na małyja zarobki ŭ śfiery adukacyi, dzie pracuje jaho žonka:
«I mnie, i majoj siamji, jak i ŭsiamu biełaruskamu hramadstvu, siońnia davoli niaprosta. Maja žonka pracuje ŭ śfiery adukacyi, a tam zarobki zusim nievialikija.
Ja jak staršynia ruchu «Za Svabodu» zarobak nie atrymlivaju — chutčej, marnuju na hetuju spravu siamiejny biudžet (uśmichajecca). Ale ja zarehistravany jak indyvidualny pradprymalnik. Jasnaja sprava, što vialikich prybytkaŭ niama, u siarednim kala 1000 rubloŭ vychodzić, ale ich taksama nie tak prosta zarabić».
U Hubarevičaŭ dźvie dački.
Taćciana Kalakina
Žonka Siarhieja Kalakina, lidara kamunistyčnaj partyi «Spraviadlivy śviet».
Pra svaju druhuju pałovu «Našaj Nivie» koratka raspavioŭ sam Kalakin:
«Taćciana vyraściła dvaich dziaciej, syna i dačku. Siońnia jana ŭžo na piensii.
Raniej žonka pracavała ŭ administracyi Partyzanskaha rajona Minska, zahadčycaj adździeła, paśla była śpiecyjalistkaj u ZAHSie».
Valer Anisim
Heta muž Aleny Anisim, deputata Pałaty pradstaŭnikoŭ i staršyni Tavarystva biełaruskaj movy.
Z mužam jana paznajomiłasia jašče ŭ časy studenctva, pabralisia šlubam na piatym kursie.
Fota ź viasiella Aleny i Valeryja Anisimaŭ.
Jon skončyŭ miechmat na pačatku 1980-ch, raźmierkavaŭsia na «Intehrał»: byŭ majstram, načalnikam učastka. U 1990-ja zajmaŭsia biznesam: ekspartavaŭ mikraschiemy, elektronnyja hadzińniki ŭ Rasiju i Ukrainu.
Byŭ pieryjad, kali Valer vymušany byŭ nie pracavać: dahladaŭ staruju maci žonki, paśla svaju maci.
Ciapier jon užo na piensii.
«Muž siońnia dahladaje siadzibu ŭ Staŭbcoŭskim rajonie i haduje ŭnučku. Zachapiŭsia vyroščvańniem sadaviny i harodniny, vyroščvaje navat vinahrad», — raspaviała Alena Anisim.
Alena i Valer Anisimy razam vyhadavali traich synoŭ.
Vieranika Mazurkievič
Žonka Alesia Łahvinca, lidara ruchu «Dzieja».
Aleś i Vieranika hadujuć syna. Dla Łahvinca heta druhi šlub, jon užo maje syna Antosia ad papiaredniaha.
Pa prafiesii Vieranika pierakładčyca z anhlijskaj i francuzskaj, mahistr miždyscyplinarnych jeŭrapiejskich daśledavańniaŭ, pierakładčyk, linhvist.
Nastaśsia Rymašeŭskaja
Žonka Vitala Rymašeŭskaha, eks-kandydata ŭ prezidenty i lidara Biełaruskaj chryścijanskaj demakratyi.
Nastaśsia i Vital ažanilisia ŭ 2002 hodzie. Hadujuć dačku.
«Spadabalisia adno adnamu nie adrazu, iskra prabiehła paźniej. Navat nie mahu skazać, u jaki dakładna momant. Pahladzieŭ jon na mianie niejak asabliva», — raskazvała Nastaśsia ŭ intervju «Našaj Nivie».
Padrabiaźniej pra žonku raspavioŭ sam Rymašeŭski:
«Siońnia Nasta zajmajecca hramadskaj dziejnaściu, haduje dačku. Časam dapamahaje mnie — u BCHD my pravodzim šmat niepalityčnych hramadskich kampanij.
Taksama zajmajecca dabračynnaściu: razam ź inšymi vałanciorami jana apiakujecca adnym z damoŭ-internataŭ.
Taksama Nasta pracuje, možna skazać, na fryłansie: pierakładaje na biełaruskuju movu, vykonvaje redaktarskuju pracu — karaciej, usio, što źviazana z vydaviectvam knih.
Nu i chatniaja haspadarka na joj — ale tut užo i ja dapamahaju taksama!»
Maryja Hajdukievič
Žonka siońniašniaha lidara praŭładnaj Libieralna-demakratyčnaj partyi Aleha Hajdukieviča i niaviestka byłoha lidara toj ža partyi Siarhieja Hajdukieviča.
Historyju svajho znajomstva z budučaj žonkaj Hajdukievič-małodšy padrabiazna raspaviadaŭ «Našaj Nivie»:
«Jaje baćkam akazaŭsia Valancin Šuchno. Heta čałaviek, jaki stajaŭ la vytokaŭ abarotu kaštoŭnych papier našaj krainy. Byŭ staršynioj Kamiteta pa kaštoŭnych papierach pry Saviecie ministraŭ — heta ŭzrovień ministra praktyčna. Dastatkova viadomy čałaviek, jaki pracavaŭ z usimi bankami i viedaŭ usich dyrektaraŭ bankaŭ.
Ja hetaha nie viedaŭ, kali paznajomiŭsia. A paznajomiŭsia na dyskatecy. I ažaniŭsia vypadkova. Jak vypadkova? Kachańnie, jano zaŭsiody prychodzić, kali jaho nie čakaješ.
Ja paznajomiŭsia z žonkaj na dyskatecy na «Medysan-kłab». Jana na miesiac pryjechała z Amieryki aformić dakumienty i nazaŭsiody źjechać tudy. Jana prapracavała ŭ Amierycy paŭtara hoda i prosta pryjechała ŭ Minsk. U jaje ŭžo ŭsio tam skłałasia ŭ Amierycy. Jana pryjechała pa mamu svaju. Jana aformiła dakumienty mamie, kab maci pajechała razam ź joj pracavać i tam zastacca žyć.
I vy ŭjaŭlajecie, čym usio skončyłasia? My paznajomilisia. Maci jejnaja źjechała praź miesiac, a my ažanilisia.
Maja žonka dziela mianie kinuła ŭsio: kinuła Amieryku, kinuła płany.
Kinuła hetyja ŭsie rečy i zastałasia sa mnoj. Za heta ja joj ŭdziačny».
Maryja skončyła ekanamičny fakultet BDU. Cikava, što ŭ pieršyja hady šlubu Aleh Hajdukievič nastojvaŭ, kab jaho žonka nie pracavała. Ale paźniej pahadziŭsia z vybaram žonki — Maryja stała instruktarkaj pa jozie. Siońnia jana pracuje ŭ minskaj studyi «Yoga Place».
Bonus: Kazłoŭ, Karatkievič, Janukievič, Kanapackaja
Ale nie ŭsie biełaruskija palityki žyvuć u šlubie. Niekatoryja paśpieli raźvieścisia, niekatoryja — nijak nie znojduć svaju pałovu.
Mikałaj Kazłoŭ, siońniašni lidar AHP, niežanaty. «Ja nad hetym pracuju», — śmiajecca jon, adkazvajučy na pytańnie pra budučuju žonku.
Hanna Kanapackaja, deputatka Pałaty Pradstaŭnikoŭ i siabar AHP, daŭno ŭ razvodzie.
Jana vielmi nieachvotna ŭzhadvaje pra svajho byłoha muža. Kazała tolki, što jon zajmaŭsia biznesam. Ad muža zastałosia dvoje dziaciej, ich Kanapackaja haduje adna.
U pačatku 2017 hoda raźviałasia i byłaja kandydatka ŭ prezidenty Taćciana Karatkievič.
Šlub ź Vitalom Karatkievičam praciahvaŭsia 16 hadoŭ. Taćciana paznajomiłasia ź im na sieminary ŭ Vilni. Palityk raspaviadała, što jaje muž pracuje aŭtaślesaram — źbiraje mašyny chutkaj dapamohi.
«My razyšlisia z-za roznych pohladaŭ na inšyja kaštoŭnasnyja momanty. Šlub trymajecca na prostych rečach, jakija vy lubicie rabić razam: mieć znosiny, hladzieć kino, padarožničać. Nastupiŭ momant, kali my ŭ hetym razyšlisia, — patłumačyła Karatkievič. — Moj vybar byŭ prosty: kali adnosiny nie jakasnyja, nie prynosiać bakam sapraŭdnaha dabrabytu i ŭzajemnaha spakoju, upeŭnienaści, nie vidać pierśpiektyŭ — ich treba spyniać».
Karatkievič zapeŭnivaje, što razvod nie źviazany ź jaje palityčnaj karjeraj. Jana zastałasia žyć z mamaj i 13-hadovym synam Jelisiejem.
«Pra svajo siońniašniaje pryvatnaje žyćcio ja pramaŭču. Tak i napišycie!» — paviedamiła Karatkievič «Našaj Nivie».
Były staršynia partyi BNF Alaksiej Janukievič jašče nie žanaty. Jon taksama vyrašyŭ zachavać tajamnicu pryvatnaha žyćcia.
«Ja maju druhuju pałovu, vielmi dobraha čałavieka. Ale afišavać svaje adnosiny pakul nie chaču. Ci nie źbirajusia ja ažanicca? Skažam tak: moža być, u hetym hodzie i zdarycca takaja padzieja», — paviedamiŭ «Našaj Nivie» Janukievič.
