Łukašenka: Daktary kažuć, što my na płato. Ale ja nie tak aptymistyčny
Alaksandr Łukašenka adznačaje pastupovaje palapšeńnie epidsituacyi ŭ Biełarusi, ale zaklikaje nie rassłablacca. Pra heta kiraŭnik dziaržavy zajaviŭ siońnia na naradzie ŭ Minsku pa aktualnych sacyjalna-ekanamičnych i palityčnych pytańniach, pieradaje BIEŁTA.
«Kali, ja časta kažu heta apošni miesiac, i dalej tak pojdzie, to budziem ličyć, što my spravilisia z Boskaj dapamohaj z hetym zachvorvańniem. Pačałosia heta ź Viciebska. Viciebsk užo kanstatuje fakt, što jany ŭnizie pa zachvorvańni. Śviedčańniem tamu źjaŭlajecca, što my balnicy pačali začyščać, vymyvać — tyja, jakija rychtavali jak rezierv dla karanavirusa», — zajaviŭ biełaruski lidar.
Pavodle jaho słoŭ, anałahičnaja situacyja nazirajecca i ŭ Minsku. «Na płato ŭžo znachodzimsia, pa zajavach daktaroŭ. Ja, praŭda, nie tak aptymistyčny ŭ siłu svaich zababonaŭ», — skazaŭ kiraŭnik dziaržavy.
Tym nie mienš, hruntujučysia na raźvićci situacyi, užo i ŭ Minsku płanujuć u najbližejšy čas viartać da zvyčajnaj pracy šerah lačebnych ustanoŭ, u tym liku ankałahičnaha i hiniekałahičnaha profilu, balnicu chutkaj mieddapamohi. «U pryncypie, my adčuvajem, što nam užo nie spatrebiacca hetyja balnicy ŭ Minsku [pad lačeńnie chvorych z karanavirusam], — zajaviŭ jon.
Alaksandr Łukašenka adznačyŭ stabilizacyju zachvorvańnia i navat niekatoraje źnižeńnie ŭ Minskaj vobłaści. Niadrennaja abstanoŭka i ŭ Mahiloŭskaj vobłaści.
«Kali tak, to ŭ nas zastanucca tolki dźvie vobłaści — Bresckaja i Homielskaja, — jakija my pavinny kantralavać. Jany paźniej za ŭsich uvajšli ŭ hety praces, i śpiecyjalisty kažuć pra toje, što jany paźniej za ŭsich i vyjduć, na tydzień dzieści», — skazaŭ kiraŭnik dziaržavy.
Jon padkreśliŭ, što ŭ štodzionnym režymie, ranicaj i ŭviečary, cikavicca adpaviednymi pytańniami i prablemami. «Łožkaŭ dastatkova. Ciažkich mienš stała. Mabyć, virus usio ž asłabieŭ užo, virulentnaść jaho ŭžo nie taja. Daj boh, kab nie taja. Ale pry hetym my pavinny trymać u hałavie druhuju chvalu. Nichto nie dakazaŭ, što jana budzie, ale my pavinny da hetaha rychtavacca. I nichto nie viedaje, kali jana pryjdzie. Kali zimoj i vosieńniu, to daj boh, kab my surjozna zmahli padrychtavacca da hetaha. A, moža być, hetaja biada nas minie. Tym nie mienš, rassłablacca nielha», — padkreśliŭ biełaruski lidar.
Jon taksama na prykładzie Minska adznačyŭ dobruju arhanizacyju kantrolu za raźvićciom situacyi va ŭmovach pandemii. Alaksandr Łukašenka paprasiŭ staršyniu Savieta Respubliki Natallu Kačanavu, jakaja kuryruje stalicu, raspavieści ab adpaviednych padychodach. «Nie jak lečym ludziej (ja heta viedaju, a jak vy arhanizavali kantrol źvierchu). Napeŭna, budzie čamu pavučycca ŭ vas pa Minsku.
Bo niaprostaja situacyja — dva ź lišnim miljony čałaviek, i niaprosta było tut arhanizavać spravu. Ale ni ŭ jakim razie nielha rassłablacca», — reziumavaŭ kiraŭnik dziaržavy.
