«Pika nie było, źnižeńnie budzie płaŭnym». Biełaruskija epidemijołahi znoŭ pamianiali prahnoz pa karanavirusie
Fota Nadziei Bužan
Za čas pandemii karanavirusa dali nie adzin prahnoz ab tym, kali ŭ Biełarusi čakać pika zachvorvańnia. Zaraz śpiecyjalisty sychodziacca ŭ mierkavańni: my na płato. Što budzie dalej? Čakać nam pika ci nie? Na pytańni TUT.BY adkazała namieśnik hałoŭnaha doktara Respublikanskaha centra hihijeny, epidemijałohii i hramadskaha zdaroŭja Iryna Hlinskaja. Pavodle jaje słoŭ, ŭstojlivaje źnižeńnie zachvorvańniaŭ COVID-19 prahnazujecca na kaniec maja — pačatak červienia.
— My zaraz na płato, a kali budzie źnižeńnie?
— Da kanca maja — pačatku červienia.
— Ale kali paśla płato budzie źnižeńnie, ci značyć heta, što pik my ŭžo prajšli?
— U nas nie było, jak takoha, pika. My płaŭna raśli i potym vyjšli na płato. Byli dni, kali kolkaść vypadkaŭ była vyšejšaja, nižejšaja, ale kłasičnaha pika, jak byŭ u Italii, Ispanii, kali jany ŭzychodzili na jaho vielmi chutka i kali sistema achovy zdaroŭja była pierahružanaja, u nas nie adznačałasia. My paśla płaŭnaha pavieličeńnia kolkaści vypadkaŭ vyjšli na płato.
— Heta značyć, my ŭžo pojdziem tolki na źnižeńnie?
— Pavodle prahnozu — tak, źnižeńnie prahnazujecca płaŭnaje.
— U nas u krainie vychad na płato i źnižeńnie ŭ adzin i toj ža čas va ŭsich rehijonach adbyvajucca?
— Kaniešnie nie. Viciebskaja vobłaść i Minsk raniej uvajšli ŭ epidemičny praces, tamu ŭ ich źnižeńnie nadychodzić raniej, a inšyja rehijony ŭvojduć u hety pieryjad paźniej.
— Kali ŭ nas u červieni budzie źnižeńnie, my možam dasiahnuć u lipieni i žniŭni takoha ŭzroŭniu, kali praktyčna nie buduć rehistravacca novyja vypadki?
— Heta małavierahodna, niejkaja kolkaść vypadkaŭ budzie rehistravacca. Siońnia niama padstaŭ mierkavać, što virus sydzie i my ŭsie pra jaho zabudziem.
— Ci dakładna ja razumieju termin «płato» - heta pieryjad, kali štodnia praktyčna adnolkavy pryrost novych vypadkaŭ?
— Heta znachodžańnie kolkaści vypadkaŭ u peŭnych miežach, u nas heta prykładna ad 800 da 1000. Kali raźličvać dolu novych vypadkaŭ u struktury ahulnaj kolkaści vypadkaŭ, to jana prykładna ŭ hety pieryjad na adnym uzroŭni — dzieści 3-5%. Kali hety pakazčyk pavialičvajecca — heta niespryjalnaja prahnastyčnaja prykmieta. Kali jon znachodzicca ŭ peŭnych ramkach — heta prahnastyčnyja spryjalnyja prykmiety.
— Kali pa padručnikach, to kolki ŭ siarednim doŭžycca płato?
— Hetaj infiekcyi niama ŭ padručnikach, jana zusim novaja. My prachodzim šerah etapaŭ: dla taho kab naładzić i sistemu dyjahnostyki, i sistemu ŭliku i pryjści da adnastajnych pryncypaŭ pa ŭsich krainach, kab možna było paraŭnoŭvać i stvarać niejkija madeli prahnozu. Dziakujučy tym mieram, jakija my prymali, my ŭvachodzili na płato vielmi płaŭna. Takich krain mała, u ich płato doŭžyłasia čatyry-piać tydniaŭ. U nas płato ŭžo bolš za try tydni.
— U mnohich krainach da vosieni čakajuć druhuju chvalu karanavirusa, u nas jaje moža nie być?
— Zaraz adsutničajuć źviestki ŭ krain dla taho, kab adnaznačna adkazać na hetaje pytańnie. Vyvučeńnie situacyi praciahvajecca.
— Jak ludziam, asabliva tym, chto ciapier pierajšoŭ na vydalenuju pracu i skaraciŭ svaje sacyjalnyja kantakty, zrazumieć, što možna viartacca da zvyčajnaha žyćcia?
— Rekamiendacyi Ministerstva achovy zdaroŭja zachoŭvajucca: pa sacyjalnym dystancyjavańni, kudy ŭ tym liku ŭvachodzić i addalenaja praca, i režym našeńnia masak tam, dzie mohuć być krynicy infiekcyi.
Ministerstva achovy zdaroŭja prainfarmuje ŭ vypadku adsutnaści nieabchodnaści ŭ vykanańni prafiłaktyčnych mierapryjemstvaŭ. Pakul situacyja dyktuje, što hetych mier treba prytrymlivacca, i ad taho, nakolki my budziem vykonvać hetyja miery, budzie zaležać i temp źnižeńnia kolkaści novych vypadkaŭ.
