Jakuju rolu ŭ krainie vykonvaje Kačanava, u čym jaje promachi i za što jaje palubiŭ Łukašenka?
Mnohija źviartajuć uvahu, što staršynia Savieta Respubliki Natalla Kačanava ciapier vyhladaje takim kiraŭnikom Administracyi biez administracyi, hałoŭnym antykryzisnym mieniedžaram krainy.
Jana tłumačyć dziaržaŭnuju palityku i łohiku pryniaćcia rašeńniaŭ, pa daručeńniach Łukašenki jeździć pa abłaściach, padaje sihnały namienkłatury: słovam, zajmajecca dziejnaściu, jakaja daloka vychodzić za prapisanyja abaviazki kiraŭnika zakanadaŭčaha i pradstaŭničaha orhana.
Čamu tak adbyvajecca i jakuju rolu jana ciapier vykonvaje ŭ dziaržavie?
Fota: telehram-kanał «Puł piervoho»
Sapraŭdy, ciapierašni kiraŭnik Administracyi prezidenta Ihar Siarhiejenka (abo IP, jak jaho nazyvajuć padnačalenyja) pieršyja miesiacy praktyčna pa kožnym pytańni kansultavaŭsia z Kačanavaj.
Ekśpierty ŭnutry sistemy tłumačać taki tandem prosta, vyłučajučy dva asnoŭnyja momanty:
a) Kačanava pieradaje Siarhiejenku spravy (Kosiniec u svoj čas nie vadziŭ za ruku Kačanavu tolki tamu, što trapiŭ u apału, i Łukašenka jaho vyhnaŭ), sama ž jana bolš nie mahła znachodzicca ŭ statusie kiraŭnika Administracyi prezidenta praz uzrost;
b) Kačanava, imavierna, budzie realnym kiraŭnikom vybarčaha štaba Łukašenki: arhanizacyja viertykali ŭ častcy adboru ludziej dla zboru podpisaŭ i raboty ŭ kamisijach, arhanizacyja taho samaha «vybarčaha pracesu», dziakujučy jakomu Łukašenka zachoŭvaje ŭładu — heta ŭsio na joj. A Siarhiejenka budzie kantralavać vykanańnie i vykanaŭcaŭ, słovam, rabić toje ž, što rabiŭ u KDB, ale z bolšymi paŭnamoctvami. Tamu jany časta bačnyja ŭtraich.
Fota: telehram-kanał «Puł piervoho»
Kiraŭnik Savieta Respubliki — heta častka sistemy strymlivańnia i supraćvah, tamu raniej tam byli šeryja ludzi nakštałt Rubinava, a ciapier tam vielmi aktyŭnaja Kačanava.
Tamu padajecca, što jana budzie zajmacca i praviadzieńniem kanstytucyjnaj reformy, pra jakuju apošni čas šmat havoryć Łukašenka, jakaja, pa idei, pavinna ŭzmocnić pradstaŭničyja orhany ŭłady.
Heta nazirajecca ŭžo ciapier.
«Za Saviet Respubliki jana ŭziałasia, rabotniki zabiehali. Heta chiba nie ŭpieršyniu za moj čas raboty, kali sakrataryjat SR staŭ bačny i čutny, moža, niechta i sydzie z hetaj siniekury, bo nie vytrymaje cisku», — kažuć jaje padnačalenyja.
Ale vidavočna, što kali Łukašenka čarhovy raz adkładzie zakanadaŭčaje ŭrazańnie paŭnamoctvaŭ prezidenta, to rola i SR, i Kačanavaj pakrysie pojdzie ŭniz.
Niejkaje, prynamsi časovaje, uzvyšeńnie roli SR vyhladaje łahičnym z prychodam tudy Kačanavaj, ale hetak ža jano adkacicca ŭ vypadku, kali Siarhiejenka vyrašyć abmiežavać Kačanavaj dostup da cieła. A mahčymaść asabista havaryć z Łukašenkam — heta asnoŭny čyńnik, jaki vyznačaje ŭpłyvovaść čynoŭnika ŭ Biełarusi.
Ciapier ža, nakolki nam viadoma, z Kačanavaj, prynamsi na ŭzroŭni načalnikaŭ upraŭleńniaŭ AP, sapraŭdy ŭzhadniajucca niekatoryja rečy pierad tym, jak čynoŭnik pojdzie ź imi da Łukašenki ci budzie pisać jamu list.
Za što Łukašenka tak palubiŭ Kačanavu?
«Časta na pasadzie kiraŭnika AP byli nievyraznyja ludzi, jakija mała ŭpłyvali na chadu padziej, naprykład — Hienadź Niavyhłas. Ale Kačanava realna spryčyniłasia da ŭsiaho, što adbyvałasia. Nazvać jaje efiektyŭnym mieniedžaram? Nu nie. Navapołack pry joj nie staŭ horadam-sadam, jak i nie zakvitnieła Biełaruś. Vidavočna, jana cenicca nie za heta.
Łukašenka ŭbačyŭ u joj toje, da čaho zaŭsiody imknuŭsia — takoha kiraŭnika Administracyi, jaki nie budzie piarečyć, a budzie ŭznosić słovy hałoŭnakamandujučaha. Jana całkam adpaviadaje jahonamu stylu — nie viedaje sumnievaŭ u vykanańni dziaržaŭnaha kursa, ale nibyta nadaje jamu niejkaje čałaviečaje abličča.
Ale ŭsio hetaje ŭnutranaje tarmažeńnie, kansiervacyja pracesaŭ, adsutnaść dynamiki pad vyhladam dynamiki — heta ŭsio jana», — kaža abaznany čałaviek z uładnych kołaŭ.
Asnoŭnymi promachami Kačanavaj namienkłaturniki ličać kadravyja pamyłki ŭ rehijonach (kali staršyni vykankamaŭ zvalnialisia, pabyŭšy na pasadzie litaralna paru miesiacaŭ), a taksama kultyvacyju režymnaha dahmatyzmu, jaki zaminaje efiektyŭnamu kiravańniu i tvorčym prajavam mieniedžaraŭ.
Pry hetym pry žorstkaj Kačanavaj ustanaviłasia palityčnaja stabilnaść łukašenkaŭskaj sistemy, zadušana alternatyŭnaja palityčnaja dumka, što možna razhladać jak minus, bo ŭłada, jakuju nichto nie padviarhaje praviercy i krytycy, zaminaje ćviaroza hladzieć na rečy — nastupstvy hetaha i niezadavolenaść kansiervacyjaj pačali prajaŭlacca jašče da pačatku elektaralnaha cykłu.
Čytajcie taksama: Videabłohier Cichanoŭski pieranios pratesty z anłajna na vulicy. I akazałasia, što «kraina dla žyćcia» zakipaje
Što datyčyć kadravaj palityki ŭ samych viarchach, to Kačanava zdoleła pavalić niamała favarytaŭ Łukašenki.
Čaho vartyja tolki Pavieł Jakubovič, Ryhor Kisiel ci Lilija Ananič, abo kiraŭnik «Naftana», jakoha, pa staroj niepryjaznaści, Kačanava, jak kažuć, źniała adnym ź pieršych, kali atrymała takuju ŭładu.
Źjeła Kačanava i bieskampramisnaha Ihara Šunieviča, jaki, pa-pieršaje, admaŭlaŭsia padparadkoŭvacca kiraŭnicy Administracyi: «Ja słužu prezidentu», a, pa-druhoje, svajoj manieraj prymianiać siłu biez dastatkovych padstaŭ (naprykład — cyhany ŭ Mahilovie ci raŭnivaja abarona pomnika haradavomu na Haradskim Vale) mietadyčna dyskredytoŭvaŭ sproby stvareńnia «čałaviečnaha» imidžu uładaŭ.
Tut Kačanava prajaviła siabie i vyznačyła Administracyju prezidenta jak apošniuju instancyju ŭ spravie pošuku spraviadlivaści, a potym i ŭvohule źniała Šunieviča biez prava viartańnia ŭ sistemu.
Heta vyhladaje adnym z samych značnych jaje ŭčynkaŭ: pa asobie novaha Juryja Karajeva prasočvajecca styl kiravańnia — jon užo išoŭ na novuju pasadu z ustanoŭkaj mianiać rabotu MUS, tamu i pieršyja słovy jaho byli pra «čałaviečnaść» i «adkrytaść».
Raskazvajuć takuju historyju, jak u adnoj ź viosak dva inśpiektary ŭnačy zatrymali mužčynu za pierachod vulicy ŭ nienaležnym miescy, ale zatrymali nie prosta, a zakavaŭšy ŭ kajdanki, kali toj pačaŭ uciakać.
Usio było nibyta zroblena pa zakonie, i Šunievič admachnuŭsia b ad skarhi na dziejańni inśpiektaraŭ, adkul by jamu ni pryjšła zadača razabracca.
Karajeŭ ža paśla pierasłanaj z AP skarhi nikomu nie pieradaručyŭ razbor, a sam vyklikaŭ inśpiektaraŭ dla praviadzieńnia ŭnušeńniaŭ.
Vialikaja rola Kačanavaj była taksama ŭ historyi z pryznańniem «Matčynaha ruchu 328» i spravaj apraŭdanaha inžyniera Hałavača.
Možna taksama skazać, što Kačanava spryčyniłasia da šyrokaha śviatkavańnia «BNR-100», ale, vyhladaje, jana prosta nie zrazumieła, na što dała dabro.
Padsumoŭvajučy, možna vykazać zdahadku, što vynachodnictva Kačanavaj «novaj sacyjalnaj palityki», dzie va ŭmovach adsutnaści ekanamičnych pośpiechaŭ akcent robicca na sacyjalnuju spraviadlivaść i čullivaść uładaŭ da prablem maleńkich ludziej stanie trendam kiravańnia ŭ łukašenkaŭskaj sistemie.
