Z «dahavarniakom» u biełaruskim chakiei daručyŭ razabracca asabista Alaksandr Łukašenka
president.gov.by
Inicyjataram razboru pra «damoŭny matč» u čempijanacie Biełarusi pa chakiei staŭ Alaksandr Łukašenka. Pra heta raspavioŭ adzin z abvinavačanych — Mikita Uścinienka, piša Tut.by.
Pavodle jaho słoŭ, paśla matča prajšoŭ schod z udziełam kiraŭnictva kłuba. Na im hulcam abviaścili, što razabracca z padazronaj hulnioj daručyŭ kiraŭnik krainy.
Havorka idzie pra matč «Dynama-Maładziečna» — «Mahiloŭ» (5:6). Pa chodzie hulni haspadary viali 5:1, ale siensacyjna sastupili aŭtsajdaru. U kłubie da taho momantu ŭtvarylisia vielizarnyja zapazyčanaści pa zarpłacie.
«Było zrazumieła, što dobra heta nie skončycca, bo pačali źjaŭlacca artykuły ŭ presie. Ja bajaŭsia sieści ŭ turmu. U kłub prychodzili ludzi ŭ maskach i sa zbrojaj. A ja bieź ich siabie nakruciŭ», — skazaŭ Uścinienka.
Abaronca taksama raspavioŭ, što žyŭ razam z adnakłubnikam Paŭłam Piačuram, jaki adrazu paśla hulni abvinavaciŭ partnioraŭ u zdačy matča. Spačatku Uścinienka apraŭdvaŭsia, što heta nie damoŭny matč, ale praź niekatory čas pryznaŭsia.
Padčas dačy pakazańniaŭ Uścinienka razabraŭ padazronyja momanty sa svaim udziełam, adznačyŭšy, što niepasredna jaho pamyłak niama, a vydaleńnie jon atrymaŭ jašče ŭ pieršym pieryjadzie, pryčym heta byŭ hulniavy epizod.
Adznačym, što ŭ chutkim časie paśla matča sustreču z kiraŭnictvam «Dynama-Maładziečna» pravodziŭ Dźmitryj Baskaŭ — hiendyrektar minskaha «Dynama» i trenier kamandy prezidenta.
Siarod ŭdzielnikaŭ «dahavarniaka» jość i chakieist prezidenckaj kamandy Viačasłaŭ Lisičkin.
Mikita Uścinienka źjaŭlajecca dziejučym hulcom zbornaj Biełarusi, za jakuju jon vystupaŭ na čempijanatach śvietu.
Chakieist paprasiŭ nie adłučać jaho ad chakieja i paabiacaŭ zahładzić vinu svajoj hulnioj za nacyjanalnuju kamandu.
