Saudaŭskaja Aravija ŭ try razy pavyšaje PDV, kab vyratavać ekanomiku. Biudžet krainy apuścieŭ z-za pandemii
Ułady Saudaŭskaj Aravii ŭ try razy pavyšajuć padatak na dadadzienuju vartaść (PDV) u ramkach mier žorstkaj ekanomii, što prymajucca dla padtrymki zacisnutaj u ciski pandemii ekanomiki, piša Bi-bi-si.
Taksama buduć časova prypynienyja vypłaty ŭ suviazi z rostam pražytačnaha minimumu (nadbaŭka na darahoŭlu) biudžetnikam.
Pastupleńni ŭ kaznu Saudaŭskaj Aravii rezka skaracilisia z padzieńniem koštaŭ na enierhanośbity i spynieńniem pavietranych pieralotaŭ na fonie pandemii karanavirusa.
PDV u hetaj krainie byŭ uviedzieny ŭsiaho tolki dva hady tamu ŭ sprobie skaracić zaležnaść ekanomiki krainy ad suśvietnych koštaŭ nafty-syrca. Dachody ad nafty ŭ karaleŭstvie ŭpali za hety pieryjad amal na 25% u paraŭnańni z tym ža pieryjadam papiaredniaha hoda — da 34 młrd dalaraŭ, a ahulnaja vyručka skaraciłasia na 22%.
U toj ža čas Centrabank Saudaŭskaj Aravii jašče ŭ sakaviku daŭ spravazdaču ab rezkim skaračeńni zołatavalutnych reziervaŭ da samaha nizkaha ŭzroŭniu z 2011 hoda.
Hetyja miery, jak čakajecca, zamarudziać tempy i maštab Prahramy ekanamičnych reformaŭ «Bačańnie 2030», jakuju sprabuje ažyćciavić kronprync Muchamied ibn Sałman.
Letaś Saudaŭskaja Aravija zdoleła atrymać rekordnyja 25,6 młrd dalaraŭ, vypuściŭšy na biržu ŭ Er-Ryjadzie pieršasnyja akcyi Nacyjanalnaha naftavaha hihanta Aramco.
Hety krok staŭ adnym z asnoŭnych u płanach kronprynca pa madernizacyi ekanomiki i pasłableńni jaje zaležnaści ad naftavych koštaŭ.
Pavodle novych praviłaŭ, z 1 lipienia PDV vyraście z 5% da 15%, a vypłata nadbaŭki na darahoŭlu žyćcia budzie prypynienaja z 1 červienia.
