Jak arhanizavana dystancyjnaje navučańnie dla ŭkrainskich školnikaŭ
U Ministerstvie adukacyi Biełarusi zajavili, što nie bačać ni technałahičnaj mahčymaści, ni harantyj jakaści dla dystancyjnaha navučalnaha pracesu. U hety ž čas u susiednich krainach školniki pierajšli na dystancyjnaje navučańnie. Jak z hetym vyklikam i niestandartnaj situacyjaj spraviłasia Ukraina, dzie škoły zakryli na karancin jašče 12 sakavika?
Ministerstva adukacyi i navuki Ukrainy razam z ofisam prezidenta ŭ kaapieracyi z hramadskimi abjadnańniami zapuścili prajekt «Usieŭkrainskaja škoła anłajn».
Videaŭroki tranślujucca pa dakładnym hrafiku na ŭkrainskich telekanałach, na YouTube-kanale Ministerstva adukacyi i navuki i na miedyjapłatformach.
U prajekcie biaruć udzieł 40 nieabyjakavych piedahohaŭ, jakija dobraachvotna stali nastaŭnikami dla ŭsioj krainy.
«Naša zadača jak dziaržavy — zabiaśpiečyć kožnamu dziciaci svabodny dostup da viedaŭ», — skazaŭ prezident Ukrainy Uładzimir Zialenski.
Uroki prachodziać pa takich pradmietach: ukrainskaja mova, ukrainskaja litaratura, historyja Ukrainy, suśvietnaja historyja, anhlijskaja mova, fizika, ałhiebra, hieamietryja, hieahrafija, chimija, bijałohija, fizkultura.
Zaniatki prachodzić štodnia a 10:00, z paniadziełka pa piatnicu, da zakančeńnia karancinu. A karancin, chutčej za ŭsio, budzie praciahvacca da kanca navučalnaha hoda.
Hrafik zaniatkaŭ možna spampavać na sajcie ministerstva.
Na kanale YouTube ministerstva, u apisańni pad kožnym videa, nastaŭniki taksama pakidajuć damašniaje zadańnie dla zamacavańnia temy. Spasyłki na elektronnyja viersii hetych padručnikaŭ možna znajści ŭ apisańni pad videa.
Videaŭroki pastaralisia zrabić u cikavaj formie. U ich biaruć udzieł ukrainskija zorki: viadučyja, muzykanty, akciory, spartsmieny i h.d. Jany adkazvajuć na pytańni, rašajuć zadačy i pravodziać ekśpierymienty z nastaŭnikami.
Videaŭroki na kanale YouTube znajści vielmi prosta — stvorany płej-listy, z dapamohaj jakich možna znajści ŭrok pa adpaviednym pradmiecie i za nieabchodny tydzień.
Ale adnymi tolki videaŭrokami dystancyjnaje navučańnie dla ŭkrainskich školnikaŭ nie abmiažoŭvajecca.
Ministerstvam na čas karancinu byŭ stvorany admysłovy sajt, na jakim možna znajści ŭsiu infarmacyju pra dystancyjnaje navučańnie, kaniec navučalnaha hoda i ŭstupnuju kampaniju, a taksama rekamiendacyi dla piedahahičnych rabotnikaŭ.
Kali nie ŭličvać videaŭroki, struktura i forma dystancyjnaha navučańnia vyznačajecca piedahahičnaj naradaj škoły z ulikam adukacyjnaj prahramy, vučebnaj prahramy i asablivaściej kožnaj ustanovy i rehijona. Heta značyć, škołam dali aŭtanomiju ŭ vybary formy dystancyjnaha navučańnia. Jakija resursy treba vykarystoŭvać dla dystancyjnaha navučańnia, vyrašajuć škoły i nastaŭniki, a nie ministerstva.
Na jašče adnym sajcie, stvoranym ministerstvam u partniorstvie ź niedziaržaŭnymi hramadskimi abjadnańniami, «Nova ukrajinśka škoła», možna znajści praktyčnyja parady i rekamiendacyi pa dystancyjnym navučańni ad piedahohaŭ z usioj Ukrainy.
Škoły arhanizoŭvajuć dystancyjnaje navučańnie praz kambinacyju prahram Zoom, Skype, Instagram, Google Hangouts, Google Classroom, Moodle, Microsoft Teams, z dapamohaj zahadzia zapisanych nastaŭnikam videaŭrokaŭ i inšymi sposabami.
Padčas dystancyjnaha navučańnia nastaŭnik moža rabić natatki ab chodzie navučańnia, stavić adznaki.
Kłasny žurnał možna budzie zapaŭniać, kali nastaŭniki i vučni viernucca ŭ škołu. Pry najaŭnaści možna vieści elektronny žurnał.
Karancin nijakim čynam nie adabjecca na mahčymaści svoječasova atrymać dakumienty ab adukacyi, bo ŭvieś praces ažyćciaŭlajecca ŭ elektronnym vyhladzie.
Praz karancin va Ukrainie nie stali admianiać ZNO («Zovnišnie niezaležnie ociniuvańnia» — anałah biełaruskaha CT). Ale jaho dakładnyja daty pakul što nieviadomyja — heta zaležyć ad taho, da jakoha miesiaca budzie praciahvacca karancin. Miarkujecca, što ZNO projdzie nie paźniej za pačatak vieraśnia. Farmat i paradak ZNO ŭ 2020 hodzie nie źmieniacca.
Ministerstva vyrašyła, što ŭ 2019/2020 navučalnym hodzie vučni 4 i 9 kłasaŭ nie buduć prachodzić dziaržaŭnuju vynikovuju atestacyju.
Z-za karancinu vykładčykaŭ maksimalna pieraviali na pracu ŭ hnutkim i dystancyjnym režymie. Navat dla supracoŭnikaŭ, jakija faktyčna zaraz nie pracujuć, siaredniaja zarabotnaja płata zachoŭvajecca. Adpraŭlać rabotnikaŭ padčas karancin na prymusovy adpačynak za svoj košt zabaroniena.
