Pieršyja pasłableńni karancinu ŭ Italii: 4,5 miljona čałaviek viartajucca da pracy
Pieršyja pasłableńni karancinu, uviedzienaha ŭ suviazi z pandemijaj karanavirusa, ustupajuć u siłu ŭ Italii, adnoj z najbolš paciarpiełych ad nastupstvaŭ pašyreńnia karanavirusnaj infiekcyi krain, piša tass.ru. Usiaho tut vyjaŭlena 210 tysiač vypadkaŭ, amal 29 tysiač śmiarotnych zychodaŭ pry siarednim vieku achviar 79 hadoŭ.
Pasłableńni ŭ asnoŭnym tyčacca vytvorčaj i budaŭničaj dziejnaści, prypynienaj 22 sakavika. U štodzionnym žyćci italjancaŭ mała što źmienicca. Kramy zastajucca začynienyja, jak i restarany, bary, handlovyja centry, spartyŭnyja zały, basiejny, cyrulni i kaśmietyčnyja sałony. Ludzi, čyja pracoŭnaja dziejnaść źviazana z akazańniem piersanalnych pasłuh, zastajucca doma, faktyčna biez zarobku. Nie adčyniajucca i navučalnyja ŭstanovy, dziciačyja sady. Školniki i vypuskniki rychtujucca zdavać ispyty anłajn.
Da pracoŭnaj dziejnaści viartajucca 4,5 młn hramadzian, jakija ŭ tym liku pačnuć karystacca hramadskim transpartam. Heta stanie surjoznaj pravierkaj na zdolnaść suisnavańnia ź virusam. 3 maja sutačny pryrost novych vypadkaŭ skłaŭ krychu mienš za 1,4 tysiačy čałaviek, heta adzin z samych nizkich pakazčykaŭ za čas pandemii.
Akramia taho, za dva miesiacy ŭdałosia razhruzić adździaleńni intensiŭnaj terapii i źnizić cisk na sistemu achovy zdaroŭja ŭ cełym. Na 80% było pavialičana kolkaść łožka-miescaŭ u miedustanovach. Vyrašana i prablema z maskami, u jakich bolš niama niedachopu, jak u pačatku epidemii.
Adno z hałoŭnych pasłableńniaŭ — dazvoł špacyravać u parkach i sadach, a taksama addalacca ad miesca žycharstva bolš čym na 200 m. Špacyravać i biehać možna tolki ŭ vuzkim siamiejnym kole.
Dazvalajecca naviedać blizkich svajakoŭ i pastajannych partnioraŭ u miežach rehijonu pražyvańnia. U haradach adkryvajuć mohiłki. U cerkvach adnaŭlajucca adpiavańni, ale ŭdzielničać u ich mohuć nie bolš za 15 čałaviek, jakija abaviazany trymacca biaśpiečnaj dystancyi (nie mienš za mietr) i być u maskach.
Spartyŭnyja kompleksy adčyniajuć dla prafiesijnych spartoŭcaŭ, jakija vystupajuć na spabornictvach mižnarodnaha ŭzroŭniu. Italjanski futbolny čempijanat pa-raniejšamu prypynieny.
Kali ŭzrovień zaražeńniaŭ budzie zastavacca pad kantrolem, 18 maja adkryjucca kramy i muziei, 1 červienia — restarany i cyrulni.