270 pacyjentaŭ ź pnieŭmanijami, 12 pamierłych za miesiac — pieršaja aficyjnaja statystyka sa Stoŭbcaŭ. I ni słova prabačeńnia za miesiac zamoŭčvańnia
U dziaržaŭnym vydańni źjaviŭsia pieršy materyjał z aficyjnym pryznańniem asablivaj situacyi z karanavirusam u Stoŭbcach. Prykładna 70 pacyjentaŭ sa Stoŭbcaŭ nakiravanyja ŭ balnicy inšych rehijonaŭ, a špital u rajcentry całkam zapoŭnieny chvorymi ź pnieŭmanijaj. Pra heta raspaviała hałoŭnaja doktarka Staŭbcoŭskaj rajonnaj balnicy Śviatłana Hlebka ŭ intervju mlyn.by. Ale ni słova prabačeńnia za miesiac zamoŭčvańnia i zamiest ich — novyja vypady na adras tych «chavajučysia pa kutach, fatahrafavali, jak mašyny chutkaj dapamohi padjazdžali da damoŭ žycharoŭ rehijona».
«Z samaha pačatku pandemii my byli hatovyja da napłyvu pacyjentaŭ i praviali metanakiravanuju padrychtoŭčuju pracu, — z hetaha pačynaje doktarka. — Pačynajučy z sakavika abstalavali adździaleńni kisłarodam, padrychtavali piersanał, zakupili nieabchodnyja srodki indyvidualnaj abarony, raźmierkavali abaviazki. Tamu, kali my atrymali ŭsplosk karanavirusa na terytoryi rajona i, adpaviedna, rost kantaktaŭ pieršaha ŭzroŭniu, my pačali vyrazna heta ŭsio adpracoŭvać».
«Tak, było składana, — praciahvaje jana. — Dumaju, što virus nasiŭ zavozny charaktar: na terytoryi rajona byli i dalnabojniki, i ludzi, jakija viarnulisia ź Ispanii, Italii i Hiermanii. Mabyć, usio heta i dało taki vynik.
Pieršyja vypadki byli vielmi ciažkimi. Pad udaram akazałasia stałaje nasielnictva sa spadarožnymi zachvorvańniami».
«U nas byŭ trochtydniovy pieryjad intensiŭnaj pracy. Tak, my vazili pacyjentaŭ u inšyja rehijony. Navat pry najaŭnaści takoj padrychtavanaj bazy razumieli, što kali nie dastavim čałavieka ŭ inšy rajon, dzie niama takoha napružańnia, my jaho prosta stracim. Vazili — dziakuj kaleham — i ŭ Vałožyn, i ŭ Kapyl, u Marjinu Horku, i ŭ Salihorsk. Takim čynam, my ratavali ludziej, jakim patrebna była reanimacyjnaja dapamoha.
My paličyli, što nakiravali ŭ inšyja rehijony 60—70 čałaviek.
Siarod ich byli i paćvierdžanyja pnieŭmanii, i vierahodnyja», — paviedamiła S. Hlebka
Hrafik kolkaści pacyjentaŭ ź pnieŭmanijami ŭ balnicy Stoŭbcaŭ. Jana maje 159 łožkaŭ, i ŭ kancy krasavika pnieŭmanijniki zaniali ich całkam. Vialikuju častku ich, a taksama ludziej ź inšymi chvarobami stali adpraŭlać u inšyja harady.
«Na praciahu hetaha tydnia ŭ nas stabilizavałasia abstanoŭka, — kaža Śviatłana Hlebka. —
U papiaredni pieryjad da nas pastupała pa 30 čałaviek ź pnieŭmanijaj u sutki. Zaraz u siarednim 8, — skazała doktarka. — My ŭžo vypisvajem zdarovych pacyjentaŭ. Učora, naprykład, vypisali 30 čałaviek. Siońnia — 19.
Heta nie tolki karanavirusnaja pnieŭmanija. Siońnia ŭvieś naš infiekcyjny špital adkryty na 159 łožkaŭ [18 krasavika ŭ intervju rajonnaj haziecie Hlebka śćviardžała, što ŭ špitali 134 miescy. Mahčyma, pad upłyvam abstavin pad pryjom kavidnikaŭ za hety čas prystasavali dadatkovyja pamiaškańni — NN].
Praktyčna ŭsie jany byli zaniatyja hetymi pnieŭmanijami, siońnia zastałosia 119 čałaviek.
Viadoma, jašče treba pieražyć vychodnyja. Tamu što, jak by my ni prasili nasielnictva bierahčy siabie, našy ludzi ŭsio roŭna iduć u hości, naviedvajuć miescy masavaha zboru ludziej, bačacca sa svajakami. Nu a my, miedyki, pracavać budziem usie vychodnyja.
— A z momantu ŭspyški karanavirusa kolki pacyjentaŭ ź pnieŭmanijami praz vašu balnicu prajšło?
— Dzieści 260—270 pacyjentaŭ. Ale takija ličby źviazany i z tym, što my vyjaŭlali pnieŭmaniju na rańnich stadyjach praz vydadzienyja raniej listki niepracazdolnaści. Heta značyć, asablivuju ŭvahu nadali ludziam, jakija chvareli na VRVI i znachodzilisia na balničnym. Jany prachodzili dadatkovyja miedycynskija ahlady. Tak vyjaŭlałasia pnieŭmanija na rańniaj stadyi, i dziakujučy svoječasova pryznačanamu lačeńniu chvaroba prachodziła lohka, a časam bieśsimptomna», — śćviardžaje S. Hlebka.
«Z momantu pačatku epidemii 7 pacyjentaŭ z paćvierdžanym dyjahnazam COVID-19 syšli z žyćcia», — kaža Śviatłana Hlebka i dadaje. — u reanimacyi pamierła jašče 5 pacyjentaŭ z admoŭnym testam na karanavirus».
Śviatłana Hlebka śćviardžaje, što za 4 miesiacy hetaha hoda ŭ paraŭnańni z anałahičnym pieryjadam minułaha kolkaść pamierłych u rajonie pamienšała na 7 — z 254 vypadkaŭ da 247. Takija nizkija ličby śmiarotnaści ŭ pieršyja miesiacy hoda mohuć być źviazanyja ź ciopłaj zimoj i tym, što praktyčna nie było chvali hrypu i VRVI.
«Kali adšturchoŭvacca ad hetych ličbaŭ, to tady absalutna niezrazumiełaja hetaja panika», — zaŭvažaje ŭ adkaz žurnalist.
Śviatłana Hlebka, u svaju čarhu, doŭha i padrabiazna spyniajecca na tym, jakija jašče chvaroby byli ŭ pamierłych nośbitaŭ karanavirusa, nibyta paćviardžajučy znakamituju tezu, što «ad karanavirusa ŭ nas nichto nie pamior».
Hlebka taksama pryznała, što ŭ Stoŭbcach na karanavirus zachvareli i 4 supracoŭnicy balnicy. «Choć usie byli ŭ achoŭnych supraćčumnych kaściumach. Zachvareli 3 maładyja dziaŭčyny i ja. Tak, vy dobra pačuli, ja. Možacie nie pieražyvać, učora byŭ zakryty moj balničny list.
Ja znachodziłasia na izalacyi ŭ svaim kabiniecie, tut i žyła. Dadomu mnie jechać nielha było pa ŭsich sacyjalnych pakazańniach, bo ŭ mianie doma muž i pažyłaja mama. Adčuvała ja siabie narmalna, tamu z kabinieta kaardynavała pracu.
Ja chvareła, možna skazać, biez adryvu ad vytvorčaści. Našy dziaŭčatki-daktary taksama dobra siabie adčuvajuć. Nastrojeny aptymistyčna», — kaža doktar Hlebka.
U intervju nie prahučała ni słova prabačeńnia za miesiac zamoŭčvańnia situacyi, ni słova spačuvańnia rodnym pamierłych, a tolki novyja vypady na adras «błohieraŭ».
«Ja pryjechała ŭ Stoŭbcy ŭ 2015 hodzie, — kaža doktar Hlebka. — Ja dušu ŭ hety kalektyŭ ŭkłała. My pryznanyja najlepšaj balnicaj ŭ hetym hodzie. I kali paliŭsia hety brud, vy razumiejecie, jak nam było baluča.
Ja doŭha tryvała, ale zaraz skažu. Heta prosta kryk dušy. Jany, tavaryšy błohiery, lepš by pryjšli i dapamahli mnie hety bałon kisłarodny ciahać. A nie, chavajučysia pa kutach, fatahrafavali, jak mašyny chutkaj dapamohi padjazdžali da damoŭ žycharoŭ rehijona. Heta nachabstva, heta chamstva. Nie viedaju, jak im nie soramna pisać usie hetyja paskudstvy, raskidvacca źjedlivymi vykazvańniami, nieadpaviednymi rečaisnaści. Navošta ŭsio hetaje ckavańnie?
Ja na adnym z resursaŭ ubačyła, što situacyju kamientuje nibyta pracaŭnica našaj balnicy. Ale hetaja žančyna ŭ nas užo hadoŭ 10 nie pracuje.
Chočacca skazać: «Adčapiciesia ad hetych Stoŭbcaŭ!» Ja ŭpeŭnienaja, što narmalnych ludziej bolš, i jany zrazumiejuć, što my robim usio, kab hety pieryjad chutčej prajšoŭ».
Žurnalist, u svaju čarhu, nie pacikaviŭsia ŭ hałoŭnaj doktarki, ci była b chvala zaražeńnia mienšaj pry jasnym, vyčarpalnym i paśladoŭnym infarmavańni pra niebiaśpieku karanavirusa, jakoha nie było ni na nacyjanalnym, ni na rajonnym uzroŭni.
Tolki 18 krasavika Śviatłana Hlebka dała pieršaje intervju ŭ rajonnaj haziecie, u jakim u davoli abciakalnaj formie ŭpieršyniu pryznała ekstraardynarny ŭsplosk pnieŭmanij u rajonie.
23 krasavika ŭ niezaležnym ŚMI źjavilisia śviedčańni taho, što situacyja ŭ rajonie zajšła daloka.
Čytajcie taksama: U Stoŭbcach šmatlikija śmierci ad pnieŭmanij i karanavirusa. Raskazvajuć svajaki
Tym nie mienš, usiaho 5 dzion nazad, 27 krasavika, nazad staŭbcoŭskaja dziaržaŭnaja rajonka znoŭ apublikavała artykuł, u jakim śćviardžałasia, što ad pnieŭmanii ŭ rajonie nichto nie pamior i vyśmiejvała materyjały, dzie śćviardžałasia, što rajionny špital pierapoŭnieny. Paśla taho, jak publikacyja vyklikała škvał aburanych kamientaroŭ hramadzian, jaho na niejki čas vydalili z sajta vydańnia, ale paśla viarnuli.
Miarkujučy pa razroźnienaj infarmacyi, sabranaj ŚMI i ahučanaj tymi čynoŭnikami i daktarami, jakija praryvajuć zasłonu maŭčańnia, Staŭbcoŭski rajon staŭ adnym z samych uražanych pandemijaj. Takaja ž napružanaja situacyja skłałasia ŭ Viciebsku, Dokšyckim, Biešankovickim rajonach Viciebskaj vobłaści, Minsku, Łuninieckim rajonie Bresckaj vobłaści. U apošnija tydni pahoršała situacyja ŭ Asipovičach, Maładziečnie, Baranavičach, Navapołacku, Pastaŭskim, Hłybockim i Loźnienskim rajonach Viciebskaj vobłaści.
Apytanka
