Pieršaj jeŭrapiejskaj krainie ŭdałosia pierałamać chod epidemii karanavirusa
Kancler Aŭstryi Siebaśćian Kurc padaje prykład našeńnia maski. Fota Arno Melicharek, bild.de.
Pazityŭnaja statystyka prychodzić z Aŭstryi. Hetaja alpijskaja kraina apynułasia na piarednim froncie karanavirusa, bo susiedničaje ź italjanskim epicentram. Jana była taksama pieršaj siarod tych, chto ŭvioŭ rašučyja karancinnyja abmiežavańni.
Praz 11 dzion paśla ŭviadzieńnia strohaha karancinu kolkaść zaražeńniaŭ u Aŭstryi pajšła na spad.
Prykład Aŭstryi natchnialny, bo pakazvaje, što karanavirus možna strymać i pry hetym biez abmiežavańnia pravoŭ hramadzian, jak było ŭ Kitai.
4 krasavika ŭ krainie ŭpieršyniu vyzdaravieła bolš ludziej (485 čałaviek), čym było zaražana (257). Heta nie razavy fakt. Kolkaść novych zaražeńniaŭ padaje z 26 sakavika.
Kolkaść vyjaŭlenych chvorych pačała padać praz 11 dzion paśla ŭviadzieńnia karancinnych abmiežavańniaŭ. Infahrafika worldometers.info.
Kolkaść novavyjaŭlenych chvorych za dzień (aranžavym) adnosna kolkaści vyzdaraviełych za dzień (zialonym). Infahrafika worldometers.info.
Aŭstryja pieršaj u Jeŭrasajuzie, jašče 10 sakavika, zakryła miažu — ale tolki adnu, ź Italijaj, dzie było najbolš zaražeńniaŭ. Inšyja miežy zastalisia adkrytyja.
Aŭstryja taksama adnoj ź pieršych, z 15 sakavika, pieraviała hramadskaje i ekanamičnaje žyćcio na «avaryjny režym», kab praduchilić raspaŭsiud novaha karanavirusa.
Zaniatki va ŭsich navučalnych ustanovach byli pieraviedzienyja na dystancyjny režym. Pry hetym niekatoryja dziciačyja sady i škoły adkryty, kab hladzieć dziaciej, baćki jakich pracujuć.
Byli spynienyja spartovyja mierapryjemstvy.
Byli začynienyja restarany, bary i kafe, akramia słužby dastaŭki ježy.
Chramy admianili carkoŭnyja słužby, chrosty i šluby.
Začynilisia muziei i teatry.
«Univiersitety byli pieršymi, kaho pačali zakryvać. Potym škoły i dziciačyja sady, — raskazvaje biełaruska Kaciaryna Cholcapfiel-Varažun, jakaja žyvie ŭ Vienie. — My zajmajemsia z synam pa tych padručnikach, jakija pieradała nastaŭnica. U nas jość płan na kožny tydzień.
Nastaŭnica taksama zapisvaje na videa čytańnie dzieciam knih, pakazvaje, jak možna rabić aryhami i malavać kvietki. Dastupna dla prahladu na juciubie. Absalutna spakojna ŭsie pierajšli na karancin, kali ŭrad rastłumačyŭ, jakim čynam buduć kampiensavać straty tych, chto nie zmoža praciahvać pracavać», — raskazvaje spadarynia Cholcapfiel-Varažun.
«Na vulicach, u kramach, piakarniach, aptekach ludzi vytrymlivajuć dystancyju. U apteki možna zachodzić pa 1—2 čałavieki, — kaža jana. — Moj muž pracuje dystancyjna, z domu. Za try tydni karancinu ja asabista vychodziła 2 razy ŭ mahazin i 4 razy — padychać śviežym pavietram. Zvyčajna heta karotkija prahułki. Palicyja kantraluje, kab nie źbiralisia vialikimi hrupami. Dazvolena vychodzić razam na dvor tolki z tymi, z kim žyvieš u adnoj kvatery ci ŭ adnym domie», — kaža jana.
U Aŭstryi zakryli kramy adzieńnia, mebli, bytavoj techniki, dziciačych tavaraŭ, juvielirnych vyrabaŭ, cyrulni, spartyŭnyja zały. Vyklučeńnie zroblena dla abjektaŭ žyćciova važnaha zabieśpiačeńnia: supiermarkietaŭ, aptekaŭ, zapravak, pošty, bankaŭ, pralniaŭ, centraŭ mabilnaj suviazi.
Ludziam zabaroniena źbiracca hrupami bolš za 5 čałaviek.
Abmiežavańni nie zakranali pracu hramadskaha transpartu, zavodaŭ i orhanaŭ dziaržaŭnaha kiravańnia.
Kancler u zajavie dla aŭstryjskaha ahienctva APA taksama zaklikaŭ ludziej maksimalna zastavacca doma.
Za vykanańniem novych abmiežavańniaŭ sočyć palicyja.
Kab dabić karanavirus, z 1 krasavika ŭłady Aŭstryi zrabili našeńnie maski ŭ kramach abaviazkovym.
Kab harantavać heta, Aŭstryja źbirajecca razdavać maski biaspłatna na ŭvachodach u mahaziny.
Usiaho za pieryjad epidemii ŭ Aŭstryi zaraziłasia amal 12 tysiač čałaviek, 186 čałaviek pamierli. Heta 21 śmierć na kožny miljon nasielnictva, našmat mienš, čym u mnohich inšych krainach, dzie epidemija jašče nie pajšła na spad.
Ministerstva achovy zdaroŭja Aŭstryja štodzionna publikuje źviestki pa chvorych i śmiarotnaści pa kožnym rehijonaŭ krainy.
Śmiarotnaść u Aŭstryi nabližajecca da 2% ad kolkaści vyjaŭlenych vypadkaŭ. Na žal, hetaja ličba z časam vyraście, bo ŭ reanimacyjach krainy zastajecca šmat ludziej ź ciažkimi pnieŭmanijami.
Aŭstryjaj kiruje kaalicyja chryścijanskich demakrataŭ z Narodnaj partyi i Zialonych. Nasielnictva Aŭstryi składaje kala 9 miljonaŭ čałaviek.
Kiraŭnik krainy, kancler Siebaśćian Kurc asabista paśladoŭna tłumačyć hramadzianam sens i mety abmiežavańniaŭ.
«U našaj kultury hetaha, viadoma, niama, ale mienavita tak krainy Azii pryjšli da taho, što ŭ ich usiaho niekalki chvorych za dzień», — tak Kurc patłumačyŭ uviadzieńnie abaviazkovaha našeńnia masak.
Ludzi chutka pryvykli da novych abmiežavańniaŭ i staviacca da ich z razumieńniem, kaža Kaciaryna Cholcapfiel-Varažun.
«Usio spakojna. Ludzi starajucca prytrymlivacca pravił. I myjuć ruki», — kaža jana.
