Pradaŭcy minskich kvater stali masava skidać ceny
Na minułym tydni adbyłasia znakavaja padzieja dla rynku žyłoj nieruchomaści — rezki razvarot u dynamicy koštaŭ na kvatery. Kursavyja vahańni i naviny pra karanavirus prymusili mnohich pradaŭcoŭ kvater pierahledzieć košty ŭ svaich abjavach, paviedamlaje realt.by.
fota Nadziei Bužan
Kožny tydzień vyrastaje kolkaść achvotnych pradać kvateru ŭ Minsku. Z pačatku sakavika ahulnaja prapanova na druhasnym rynku pavialičyłasia amal na 1,5 tysiačy kvater. I heta sapraŭdy šmat — u siarednim za miesiac nabyvajuć mienš.
Až da apošnich tydniaŭ novaśpiečanyja pradaŭcy vystaŭlali canu ŭ abjavach z ahladkaj na ŭžo raźmieščanyja ŭ prodažy kvatery-anałahi, nie sprabujučy prapanavać mienš. Ale da kanca miesiaca stała vidavočna, što z takim padychodam naŭrad ci ŭdasca pryciahnuć uvahu pakupnikoŭ. U vyniku siaredni ŭzrovień koštaŭ u abjavach, jakija raźmiaścili paśla 23 sakavika, užo byŭ na $50 za kvadratny mietr nižejšy.
Nie dremluć i tyja, chto pradaje kvateru daŭno. Treba razumieć, što ceny karektujuć zaŭsiody — i na stabilnym, i na ŭzrastajučym rynku. Raspaŭsiudžanaja siarod pradaŭcoŭ taktyka — raźmiaścić abjavu z zavyšanaj canoj i pastupova źnižać jaje da taho času, pakul nie atrymajecca namacać popyt.
Tak było i sioleta: u studzieni i lutym štotydzień u troch sotniaŭ abjaŭ karektavali canu ŭ bok źnižeńnia. U pieršaj pałovie sakavika hety pakazčyk vyras da 400 abjavaŭ, a ŭ druhoj pałovie miesiaca adbyŭsia sapraŭdny ŭsplosk. Košty ŭ 900 abjavavach padvierhlisia redakcyi na minułym tydni — heta prykładna 11,5% ad ich ahulnaj kolkaści.
Chto źnižaje ŭ pieršuju čarhu? Staličnyja pradaŭcy, jak praviła, raniej za svaich «kalehaŭ» z rehijonaŭ pačynajuć karektavać košty, a taksama robiać bolš istotnyja źnižki na pačatku kryzisu. Zrešty, navat ich na minułym tydni abyšli pradaŭcy kvater u pryharadzie Minska.
U Zasłaŭi, Kopiščy, Dziaržynsku i Kałodziščach cana była źnižana ŭ 12-15% abjavaŭ. U Mačuliščach hety pakazčyk dasiahaŭ 16%. Absalutnym lidaram pa dadzienym pakazčyku źjaŭlajecca Fanipal, dzie canu adkarektavali ŭ mienšy bok u kožnaj čaćviortaj abjavie.
Moža zdacca, što ŭ pieršuju čarhu canu źnižajuć na mienš likvidnyja kvatery ź vialikaj kolkaściu pakojaŭ, ale heta nie tak. Samy vysoki pracent źnižak nazirajecca ciapier u siehmiencie 1-pakajovych kvater.
Taksama na ahulnym fonie vyłučajucca kvatery, pabudavanyja ŭ 2019 hodzie. Mnohija ź ich nabyvalisia jašče na stadyi budaŭnictva z metaj dalejšaha pieraprodažu, i ciapierašnija ich uładalniki imknucca chutčej zafiksavać prybytak.
Cikavy fakt: ułaśniki, jakija pradajuć kvateru samastojna, u siarednim advažylisia na źnižku ŭ dva razy čaściej, čym ahienctva nieruchomaści.
Źnižajuć na kolki? $2000 — heta standartny «krok» pry źnižeńni cany ŭ abjavach u studzieni i lutym. Z 17 pa 23 sakavika siaredniaja źnižka vyrasła da $2500, z 23 pa 30 sakavika — da $3000. U pracentnych vyražeńni siaredniaja vieličynia źnižki pavialičyłasia za apošni čas z 2,7% da 3,7%, pry hetym maksimalny dyskont pa niekatorych abjektach moh dachodzić da 13-15%.
U absalutnym vyražeńni samaja značnaja źnižka adznačana ŭ kvatery na praśpiekcie Niezaležnaści — canu źnizili na $91 000, praŭda, jana ŭsio roŭna kaštuje kala paŭmiljona dalaraŭ.
Paśla praciahłaha pieryjadu rostu koštaŭ staličny rynak žylla stanovicca «miadźviedžym». Minuły tydzień pakazaŭ rašučaść častki pradaŭcoŭ, jakija śpiašajucca maksimalna chutka pradać svaju nieruchomaść. Bolšaść pakul zajmaje pazicyju čakańnia, ale pa dośviedzie minułych kryzisaŭ možna skazać, što asnoŭnaja chvala cenavaj karekcyi jašče napieradzie.
