Anfimaŭ: Žartam kažu siabram, što ŭ nas 150 tysiač infikavanych
Pierad adkryćciom viasnovaj siesii parłamienta «Kamsamołka» źviarnułasia da kiraŭnika Kamiteta dziaržkantrolu Leanida Anfimava z prośbaj prakamientavać situacyju z karanavirusam. 11 krasavika Leanidu Vasiljeviču spoŭnicca 66 hadoŭ.
— U zonie ryzyki znachodziacca tyja, chto starejšyja za 60-65 hadoŭ…
— Čaho ja chadžu pa vulicach, vy majecie na ŭvazie? — kaža Leanid Vasiljevič.
— Tak, vy taksama znachodziciesia ŭ zonie ryzyki! Jakija miery biaśpieki prymajecie? Siońnia vy nie ŭ mascy.
— Ja nie viedaju, chto heta prydumaŭ — zonu ryzyki, chto starejšy za 60-65 hadoŭ. Jość značna maładziejšyja za mianie pa pašparcie (u 40 i 30 hadoŭ), jakija majuć bolš šancaŭ zarazicca i znachodziacca, napeŭna, bolš u zonie ryzyki, čym ja, 65-hadovy, — kaža Anfimaŭ. — Kali čałaviek kuryć mnoha, pje, nie zajmajecca sportam. Ja ž viadu davoli aktyŭny ład žyćcia. Dumaju, što jašče da 80 hadoŭ jašče dažyvu…
Anfimaŭ raskazaŭ, što tema karanavirusa abmiarkoŭvajecca i ŭ jaho kole.
— Mnie pastajanna dasyłajuć hetyja paviedamleńni siabry: «Skažycie praŭdu». Ja kažu: «U nas 150 tysiač zaražanych». «Nu ty nie žartuj tak užo», — raspavioŭ kiraŭnik Dziaržkantrolu.
— Vy čytajecie paviedamleńni Ministerstva achovy zdaroŭja?
— Nie, nie čytaju. U mianie davoli chapaje i pa pracy niehatyŭnaj infarmacyi. (…) Pračytaŭ [na infarmacyjnym partale. — Red.], kolki ŭ nas zaražanych pa infarmacyi Ministerstva achovy zdaroŭja. Ja navat nie viedaju, jak sajt Ministerstva achovy zdaroŭja nazyvajecca. Mahu, praŭda, patelefanavać ministru i spytać jaho: «Kolki ŭ ciabie zaražanych?». Jon mnie skaža, kolki zaražanych. Jon mnie chłusić nie budzie.
Pa słovach Anfimava, pierad adkryćciom viasnovaj siesii jon abmiarkoŭvaŭ karanavirus.
— My kazali, što nie było takoha infarmacyjnaha ažyjatažu, kali idzie epidemija prostaha hrypu. Ludzi chiba nie pamirajuć pry hetym? Dla čaho siońnia voś hetymi infarmacyjnymi ŭspyškami, ukidami nahniatać hetuju paniku.
Anfimaŭ raspavioŭ pra svaju žonku.
— Žonka maja pracuje ŭ prajektnaj arhanizacyi. Zdavała prajekt, šmat pracavała. Zdała abjekt i ŭ subotu, niadzielu napisała zajavu: «Prašu dać mnie 4 adhuły». Usie viedajuć, chto maja žonka. Joj padpisali hetuju zajavu. Tut ža prybiehła jaje siabroŭka i kaža: «Viera, a što ŭ krainie tak usio drenna?» Słuchajcie, nu što heta za spravy? Razumiejecie, z abyvacielskich pazicyj: «Anfimava žonka napisała zajavu na 4 dni. Napeŭna, niešta tam… Jon, napeŭna, joj šapnuŭ: «Biary adpačynak», bo ŭsio. Treba trunu zamaŭlać».
Taksama Anfimaŭ skazaŭ, što siońnia (2 krasavika) jon ranicaj pračytaŭ, što ŭ krainie 200 zaražanych.
