Z-za karanavirusa płanavyja apieracyi i kansultacyi daktaroŭ pieranosiacca na maj-červień
Pandemija karanavirusa ŭniesła karektyvy i ŭ pracu paliklinik. Ministerstva achovy zdaroŭja prosić maksimalna skaracić vizity da doktara, asabliva pažyłych pacyjentaŭ. Płanavaja dapamoha — i špitalizacyja, i kansultacyi — pieranosicca na kaniec viasny — pačatak leta. Skaračajucca i pryjomy ŭ stamatołahaŭ da momantu stabilizacyi epidemijałahičnaha stanovišča ŭ krainie, piša Tut.by.
Hałoŭny doktar 39-j palikliniki ŭ Minsku Volha Jesmančyk raspaviała, jak źmianiłasia rabota paliklinik na čas abvastreńnia karanavirusnaj infiekcyi ŭ krainie.
Va ŭsich paliklinikach vydzieleny asobnyja patoki z pacyjentami z tempieraturaj. Jany zachodziać u budynak albo praz asobny ŭvachod, albo na pieršy pavierch u asobny kabiniet, abminajučy rehistraturu. Pacyjenty z surjoznym niedamahańniem mohuć vyklikać doktara damoŭ. Pacyjenty z chraničnymi zachvorvańniami, jakija raniej byli ŭ śpiecyjalistaŭ i chočuć atrymać novy recept na miedpreparaty, pavinny patelefanavać u palikliniku, recept im dastaviać damoŭ. Dla hetaha buduć pryciahvać nie tolki daktaroŭ, miedsiaścior i pamočnikaŭ daktaroŭ, ale i vałancioraŭ «Čyrvonaha kryža».
U zonie ryzyki — pažyłyja pacyjenty (ad 60 hadoŭ) i pacyjenty z chraničnymi zachvorvańniami. Im rekamiendujuć nie naviedvać masavyja mierapryjemstvy i miescy zboru ludziej.
Płanavyja špitalizacyi i kansultacyi pieranosiać na kaniec viasny — pačatak červienia. Vuzkich śpiecyjalistaŭ ciapier taksama pryciahvajuć dla pracy z pacyjentami ź virusnaj infiekcyjaj.
Paŭpłyvaje karanavirus i na pracu stamatołahaŭ.
Kali pacyjent zapisany na pryjom, jaho prymuć, pa mahčymaści akažuć maksimalnuju dapamohu, ale nastupny raz zapišuć užo na maj ci navat červień, kali stabilizujecca epidemijałahičnaja situacyja ŭ krainie.
Ekstranaja dapamoha akazvajecca nieadkładna. Adznačym, što takija ž zachady zrobleny ŭ Litvie, Łatvii, Polščy i inšych krainach, dzie zafiksavanyja vypadki karanavirusa.
— Pakul situacyjaj kirujuć za košt taho, što my špitalizujem tych, u kaho vyjaŭleny karanavirus, navat bieśsimptomna, i špitalizujem na 14 dzion usie kantakty pieršaha ŭzroŭniu, — tłumačyć namieśnik ministra achovy zdaroŭja Alena Bohdan. — łožkavaha fondu pakul dastatkova, a my, miž tym, nie pierastali akazvać miedycynskuju dapamohu pacyjentam ź infarktami, insultami, vostraj chirurhičnaj patałohijaj. My prosta na čas spynili ŭsie płanavyja ahlady, kab nie pavialičvać ryzyku dla pacyjentaŭ starejšaha ŭzrostu: što chavać, pažyłyja pacyjenty i pacyjenty z chraničnaj patałohijaj źjaŭlajucca najbolš častymi naviedvalnikami miedustanoŭ, tamu minimizujem kantakty ź imi.
Nahadajem, na 23 sakavika ŭ Biełarusi zafiksavany 81 vypadak karanavirusa, 22 pacyjenty ŭžo vyzdaravieli. Samamu starejšamu pacyjentu — 78 hadoŭ, samamu małodšamu — 3 hady (dzicia było ŭ kantakcie z mamaj, u jakoj taksama stanoŭčyja vyniki).
