Redki vypadak: adrazu dźvie žančyny ŭznačalili rajvykankamy
Halina Unukovič stała staršynioj u Biešankovickim rajonie, a Alaksandra Michiejenka — u Čerykaŭskim.
Alaksandr Łukašenka niačasta pryznačaje žančyn kiravać rajonnaj viertykallu. Na hety momant tolki čatyry žančyny źjaŭlajucca kiraŭnicami administracyjnych adzinak: Volha Mocharava ŭ Dobrušskim rajonie, Alena Paŭlečka — u Mazyrskim, Vieranika Bajkova — u Łojeŭskim, Alena Aleksina — u Homielskim.
Pry hetym adznačym, što Mocharava na siońnia rekardsmienka pa časie znachodžańnia na pasadzie, jana kiruje Dobrušskim rajonam až z 2005 hoda.
Da 16 sakavika žančyny-kiraŭnicy byli tolki ŭ Homielskaj vobłaści.
Halina Unukovič. Fota Hlybokaje.by
Halina Unukovič apošnim časam źjaŭlałasia staršynioj rajonnaha savieta deputataŭ u Hłybockim rajonie. Jašče raniej, kali rajonam kiravaŭ Aleh Morchat, jana była jahonaj namieśnicaj pa sacyjalnych pytańniach. Unukovič prymała ŭdzieł u arhanizacyi viadomych hłybockich «Višniovych festaŭ». Niaredka vystupała pa-biełarusku, u jaje całkam prystojnaja biełaruskaja mova.
Alaksandra Michiejenka. Fota rodniva.by
Alaksandra Michiejenka da apošniaha času była pieršaj namieśnicaj staršyni Klimavickaha rajvykankama, adkazvała za ekanamičnyja pytańni. Jašče raniej była načalnicaj finansavaha adździełu. Čerykaŭski rajon miažuje z Klimavickim, tamu śpiecyfika rehijonu prykładna adnolkava.
Takim čynam na siońnia z 153 administracyjnych adzinak tolki šaściu kirujuć žančyny.