«Heta palityčnaje rašeńnie»: biełaruskamu «Bieśśmiarotnamu pałku» treci raz admovili ŭ rehistracyi
Haradskoje ŭpraŭleńnie justycyi Minharvykankama treci raz admoviła ŭ rehistracyi hramadskamu abjadnańniu «Bieśśmiarotny połk». Pra heta «Našaj Nivie» paviedamiŭ staršynia arhkamiteta Valeryj Drako.
Valeryj Drako (u centry). Fota rodveche.org
«Bieśśmiarotny połk» sprabujuć zarehistravać radykalnyja levyja aktyvisty stalinska-balšavickaha kirunku. Jany prymierkavali heta da 75-hodździa Pieramohi ŭ Druhoj suśvietnaj vajnie.
«Znoŭ iduć na parušeńnie Kanstytucyi pa rehistracyi hramadskich arhanizacyj, — skazaŭ Valeryj Drako. — Na tytulnym arkušy nie było napisana słova «zaćvierdžana», a ŭ jurydyčnym adrasie zamiest złučka (haryzantalnaj ryski) utvaryŭsia drob (viertykalnaja rysačka) — heta paličyli za pamyłku».
Valeryj Drako ličyć, što pryčyny admovy ŭ rehistracyi całkam nadumanyja i hetaje rašeńnie nosić vyklučna palityčny charaktar. Na pres-kanfierencyju jon pryjšoŭ u halštuku ź siarpom i mołatam.
«Nam nie dajuć čas vypravić niedakładnaści, a adrazu admaŭlajuć u rehistracyi. Vyrašyli 20 sakavika pravieści čarhovy schod, a ŭžo na nastupny dzień nieści dakumienty znoŭ na rehistracyju. I heta kožny raz za hetuju praceduru treba zapłacić 165 rubloŭ!»
Na dadzieny momant arhkamitet «Bieśśmiarotnaha pałka» rychtuje skarhu ŭ Ministerstva justycyi albo ŭ Administracyju prezidenta na dziejańni ŭpraŭleńnia justycyi Minharvykankama.
«Bieśśmiarotny połk» — heta akcyja pa ŭšanavańni achviaraŭ Druhoj suśvietnaj vajny, jakaja zaradziłasia ŭ rasijskaj hłubincy. Paźniej akcyju na ŭzbrajeńnie ŭziała rasijskaja prapahanda, vykarystoŭvajučy jaje ŭ svaich metach. Na biełaruski «Bieśśmiarotny połk» prychodziać prychilniki «ruskaha śvietu», a taksama Stalina. Biełaruskija ŭłady robiać usio, kab minimizavać kolkaść udzielnikaŭ takich šeściaŭ.
Hladzi taksama: Stalinisty-balšaviki: chto arhanizoŭvaje «Nieśmiarotny połk» u Minsku?
