U Kłajpiedu prybyŭ pieršy tankier z nabytaj u trejdaraŭ rasijskaj naftaj
Pieršy z dvuch tankieraŭ z rasijskaj naftaj, nabytaj u trejdaraŭ biez premii da cany, prybyŭ u port Kłajpiedy, paviedamiŭ ahienctvu «Interfaks-Zachad» pres-sakratar kancerna «Biełnaftachim» Alaksandr Ciščanka.
«U Kłajpiedu prybyŭ pieršy z dvuch tankieraŭ, viečaram jon stanie na razhruzku», — skazaŭ Ciščanka.
Čakajecca, što ŭ čaćvier pačniecca adpraŭka hruzu pa čyhuncy ŭ Navapołack na AAT «Naftan», dadaŭ jon.
U siaredzinie lutaha kancern «Biełnaftachim» paviedamiŭ ab kupli 160 tys. ton rasijskaj nafty ŭ trejdaraŭ biez premii ź pieravałkaj u Litvie. Biełaruskaja kampanija pa eksparcie nafty BNK infarmavała čyhunku Litvy, što tankiery čakajucca 3-4 sakavika i 13-15 sakavika.
Kampanija Lietuvos gelezinkeliai płanuje pieravozić z Kłajpiedy da biełaruskaj miažy pa 100—150 vahonaŭ z naftaj u sutki, a ŭvieś hruz pavinien być dastaŭleny na praciahu 10 dzion.
