Pa ŭsioj krainie abmiežavali naviedvańnie balnic rodnymi pacyjentaŭ
U Biełarusi abmiežavali naviedvańnie pacyjentaŭ u špitalach. Jak doŭha praciahniecca abmiežavańnie, budzie zaležać ad uzroŭniu zachvorvańnia vostra-reśpiratornymi zachvorvańniami, piša Tut.by.
U redakcyju partała TUT.BY pryjšoŭ list ad čytački. U 10-j balnicy Minska lažyć jaje babula z apošniaj stadyjaj raku.
— Čałaviek nie chodzić, sam nie moža jeści balničnuju ježu, prynosim usio, zdrabniajučy ŭ blendary, kłopat lažyć na svajakach. Jak ciapier trapić u balnicu, jakuju začynili dla naviedvańnia, niezrazumieła, što rabić svajakam lažačych chvorych, taksama niezrazumieła, — piša jana.
U Kamitecie pa achovie zdaroŭja Minharvykankama paćviardžajuć, što ŭ balnicach Minska z 2 sakavika sapraŭdy ŭviali abmiežavańnie na naviedvańnie svajakami pacyjentaŭ. Načalnik adździeła śpiecyjalizavanaj miedycynskaj dapamohi kamiteta Iryna Drozd raspaviadaje, što vyjšaŭ zahad ab uzmacnieńni mier pa prafiłaktycy vostrych reśpiratornych zachvorvańniaŭ u ramkach epidemijałahičnaha ŭzdymu.
— Heta treba, kab praduchilić pierakryžavanaje zaražeńnie, — tłumačyć śpiecyjalist, dla čaho ŭviali takija abmiežavańni. — Infiekcyja raspaŭsiudžvajecca pavietrana-kropielnym šlacham, a ŭ pacyjentaŭ, jakija lažać u balnicach, asłableny imunitet, i jany bolš schilnyja da parazy virusnymi infiekcyjami.
Kali abmiežavańnie na naviedvańnia zdymuć, pakul niezrazumieła. Heta budzie zaležać ad uzroŭniu zachvorvańnia VRZ.
— Na ščaście, vysokaha zachvorvańnia na hryp u Minsku dva apošnija hady nie było, ale da hetaha kožny hod padčas ŭzdymu zachvorvańnia na VRVI, my prymali taki zahad. Zachvorvańnie idzie na spad — i zahad admianiajecca, — raspaviadaje jana.
Kali ŭ pacyjenta nie ciažki stan, to jon, pa słovach Iryny Drozd, zmoža spuścicca ŭ choł balnicy i sustrecca z rodnymi.
Dyjana Pratasievič, namieśnik hałoŭnaha doktara pa miedycynskaj ekśpiertyzie i reabilitacyi 10-j haradskoj kliničnaj balnicy, patłumačyła, što ŭ klinicy zastajecca mahčymaść niešta pacyjentam pieradać. Heta možna zrabić praz stoł daviedak u centralnym chole balnicy ŭ luby čas, akramia cichaj hadziny, a jana doŭžycca z 15.00 pa 17.00.
— Taksama svajaki mohuć źviarnucca da zahadčyka adździaleńnia, kab jon vydaŭ propusk na naviedvańnie. Ci vydaduć propusk, zaležyć ad stanu zdaroŭja pacyjenta. Kali jon maje patrebu ŭ dapamozie, kali heta ankałahičnaje zachvorvańnie, to rodnym dazvolać naviedvać takich pacyjentaŭ.
Pres-sakratar Ministerstva achovy zdaroŭja Julija Baradun patłumačyła, što z-za dalejšaha pieryjadu siezonnaha ŭzdymu vostrych reśpiratornych infiekcyj naviedvańnie chvorych svajakami abmiežavana va ŭsich ustanovach achovy zdaroŭja Biełarusi.