«Biellehpram» prapanuje prybrać kramy «sekand-chend» z bujnych haradoŭ
«Biellehpram» nastojvaje na rehulavańni dziejnaści mahazinaŭ sekand-chend. Pra heta ŭ prahramie «Tydzień» na telekanale STB zajaviła staršynia kancerna Taćciana Łuhina, piša Tut.by.
Pavodle jaje słoŭ, u 2019 hodzie było zavieziena tavaru pa katehoryi «sekand-chend» na 78 młn dalaraŭ.
— Zakryvać — nie zakryvać — my svaje prapanovy vykazvali i budziem vykazvać. A niejkaje rehulavańnie hetaha vidu handlu my ŭsio roŭna prapanoŭvali i budziem prapanoŭvać. Mahčyma, kali nie zakryćcio, to, prynamsi vynas jaho ź niejkich abłasnych haradoŭ, bujnych haradoŭ, z centralnych vulic. My za sumlennuju kankurencyju. Kali našy pradpryjemstvy vytrymlivajuć usie techrehłamienty, patrabavańni, my praviarajem na ŭsie pakazčyki biaśpieki adzieńnia, tamu i na rynku chočacca, kab usie anałahična pracavali, — patłumačyła Taćciana Łuhina.
Jana taksama raspaviała, što «Biellehpram» płanuje adkryć u hetym hodzie siem multybrendavych kram «made in Belarus».
— Usio ŭpirajecca ŭ hrašovyja srodki, jak zvyčajna. Ale ŭsio roŭna my ruchajemsia. U nas zadača — 7 kram adkryć da kanca hoda pa krainie, — raspaviała staršynia kancerna.
Raniej Taćciana Łuhina u intervju TUT.BY vykazała mierkavańnie, što Biełaruś nie moža pieratvarycca ŭ śmietnik dla b/k adzieńnia. Jana adznačyła, što «vybirać, viadoma ž, pakupniku, ci nasić vopratku ź Jeŭropy, jakuju ŭžo nieviadoma chto apranaŭ, rečy z azijackich kram sumniŭnaha pachodžańnia abo našy».
